Ha nakalabay nga duha ka-tuig, todo-larga an pagpapahiluag han US han panmilitar nga presensya ngan pagtutukod han mga estratehiko nga panmilitar nga imprastuktura hini ha Pilipinas. Hadton 2024, iginpwesto hini an Typhon Missile System ha norte han Luzon. Ginsundan ini yana nga tuig han pagsakob han NMESIS, MADIS ngan iba pa nga mga hinganiban pan-gerra.

Hini gihap nga tuig, gin-amkon han US an nabal nga pasilidad ha Oyster Bay ha Palawan, iginmando an pagtitindog han pabrika han bala ha Subic ngan igin-gawas an pasiuna nga pondo para ha konstruksyon han Subic-Clark-Manila-Batangas Railway. (Kit-an an kasumpay nga artikulo ha AB, Hulyo 7, 2025.) Kaparte ini ngatanan ha pangangandam han US ha nasud komo usa nga dako nga forward operating base ha ginsusung-an hini nga imperyalista nga gerra kontra China.

Klaro nga lahos na gud ha siyam nga “ginkaurusahan nga EDCA site” (Enhanced Defense Cooperation Agreement) an gin-amkon ngan gin-gagamit han US nga mga base ha Pilipinas. Ha tahub han waray hunong nga mga war games, ginpadagmit han US an konstruksyon han mga baraks, bodega ngan iba pa nga imprastruktura ha sakob han mga kampo han Armed Forces of the Philippines (AFP) agud igbalay an tikadako nga ihap han mga tropa, higamit ngan sarakyan nga Amerikano nga bug-os nga tuig nga napirme ha sakob ngan palibot han nasud.

Hadton Hunyo, gin-aprubahan han Kongreso han US an $1-$5 kabilyon nga pondo para ha “upgrade” han nabal nga duongan han AFP ha Oyster Bay. Gin-gagamit na han US an duongan para ha mga “freedom of navigation operation” ngan “joint patrol” ha South China Sea, kaupod an Australia ngan Japan. Tikang pa 2020 igintransporma han US an murayaw nga komunidad han mga parupangisda didto ngadto ha usa nga yawe nga pasilidad para ha mga barko ngan pandagat nga drone nga gin-gagamit hini agud hangriton an mga Chinese nga barko ngan pahitas-on an tensyon ha South China Sea. Iginpapalusot han AFP ngan US an mga patrulya komo “pagdedepensa ha mga parupangisda nga Pilipino,” kundi ha aktwal, an US ngan higante nga mga barko hini an naghihikaw ha ira pakabuhi ha Oyster Bay ngan kasapit nga kadagatan.

Kadungan hini, nahibalita hadin Hulyo an pagtitindog han US han usa pa nga base nabal ha kadagatan han Palawan, ha atubangan han munisipalidad han Quezon. Sigon ha mga report, napili an lokasyon tungod kay hirani ini ha Second Thomas Shoal, usa ha gintikangan han sumpakiay ha dagat giutan han Pilipinas ngan China. Igbabalay dinhi an mga “inflatable boat” nga gin-gagamit ha pag-atake ngan pandugang ha gin-gagamit na han militar han Pilipinas ha pakiggitgitay hini ha mga barko han China. Target han US nga himuon nga aktibo an base ha syahan nga kwarter han 2026.

Hini gihap nga tuig, gintikangan na han US an plano hini nga gamiton an Pilipinas komo dako nga istakan han higamit pan-gerra. Subay ini ha 2025 Joint Vision Statement on Defense Industrial Cooperation nga ginpirmahan han rehimen Marcos ngan gubyerno ni Donald Trump hadton Marso. Pamaagi ini han US agud maseguro an kadagmitan ngan diri mauutod nga suplay han higamit pan-gerra oras nga bumuto an inter-imperyalista nga gerra.

Ha tahub han “kolaborasyon” ngan “pagpapauswag han kapasidad ha depensa han AFP,” titindugon han US ha magkalain-lain nga parte han nasud an mga pabrika hini ha bala, unmanned systems (drone), pasilidad agud magproseso han mga “kritikal nga mineral” nga gin-gagamit ha mga bomba, ngan “additive manufacturing” sugad han 3D printing.

Hadton Mayo, iginpwesto na han US ha Fort Magsaysay ha Tarlac an usa nga 3D printer nga mayda kapas nga maghimo han gudti nga drone (gintawag nga first-person view o FPV drone) nga nakahaum ha tereyn ngan klima han Pilipinas. Gin-gamit ini nga mga drone ha iginlansar nga Salaknib Exercises Phase 2 agud “punuan han mga mata” an kagugub-an ngan kabaryuhan ha Northern Luzon. Kabakyang hini nga aktibidad an 7th ID ngan 5th ID han AFP. Antes pa hini, igin-abre na han AFP ngan rehimen Marcos an Aurora para ha pagmamanupaktura han US han mga drone hadton 2024.

An mga pabrika, makina ngan higamit pan-gerra nga igpupusisyon ha Pilipinas direkta nga ig-oopereyt han militar ngan mga ahente han mga kapitalista ha militar nga industriya han US.