Piho nga ighihinambog ni Marcos ha iya ika-upat nga State of the Nation Address an programa han “kamurayawan ngan kauswagan” nga iginpapasulong han iya rehimen. Gagamiton niya ini nga okasyon para dayawon an iya mga pasista nga suruguon ngan alipures ha “pagpuypoy ha armado nga sumpakiay.” Kadungan hini, tatahuban niya an grabe nga pangabuso ha poder ngan pagtamas-tamas ha mga demokratiko nga katungod, ha kasyudaran ngan labina ha kabaryuhan.

Buwa ngan buaw an “kamurayawan ngan kauswagan” nga unod han “National Action Plan for Unity, Peace and Development” ni Marcos. Usa ini nga mapan-uwat nga islogan agud tahuban an kamatuoran han samwak nga kakablasan, kagutom ngan pag-inantos han pira kanapulo kamilyon nga parag-uma ngan trabahador ngan mga waray pakabuhi. Katuyuanan hini nga ipakarawat ha katawhan nga kapalaran an gin-aantos nira nga pananalumpigos ngan paniniyupi agud piangon an ira diwa ngan kusog nga magdepensa ngan umato, ngan payukbuon hira ha poder han terorista nga estado.

Ha tahub han “kamurayawan,” gin-gagamit ni Marcos an mga armado nga pwersa han estado ha pag-imponer han balaud militar ha kabaryuhan agud puypoyon an pag-ato han masa nga parag-uma. Tuyo hini nga manmanan an kada gios han mulopyo, kontrolon an suplay han pagkaon ngan komersyo, pati oras han pagtatrabaho ha uma han mga parag-uma. Ngatanan gin-oobliga nga magpa-“clear” han ira ngaran ngan “makigbuligay” ha mga upisyal militar. Waray hunong nga ginhaharas an kilalado nga mga lider ngan aktibo ha mga asosasyon han parag-uma. Paluyo-luyo an mga kaso han pagpatay, pagdakop ngan iligal nga pagpriso, tortyur ngan mga masaker, panganganyon ngan paghuhulog han bomba hirani ha mga komunidad.

Agud hadlukon an molupyo, ginkakampuhan han mga tim han mga sundalo an mga baryo, ngan gin-gagamit nga baraks an mga eskoylahan o barangay health center. Ginriringgal nira an kamingawan ha baryo ha paghinubog, paghuygo, paggamit han druga ngan waray wantas nga pagpapabuto han pusil. Ha ngaran han “panteritoryo nga depensa,” pwersahay nga ginrerekrut han mga sundalo an mga parag-uma ha paramilitar nga grupo nga CAFGU ngan Barangay Intelligence Network agud gamiton hira kontra ha ira mga kahimaryo.

Ha ngaran han “pagpapahitaas ha kapasidad” han mga komunidad ha kasyudaran, gin-gagamit ni Marcos an iya armado nga pwersa agud puypuyon an katungod han mga trabahador, baga-trabahador, kabatan-unan-nga-estudyante ngan iba pa nga sektor ha kasyudaran. An mga unyonista ngan mga aktibista ha eskoylahan ngan mga komunidad iginpapailarum ha sarbeylans ngan pananarhug agud paundangon ha ira pag-oorganisa ngan pagbulig ha ira igkasi. Sugad ha kabaryuhan, gin-gagamit nga taktika an pan-gigipit ngan waray hunong nga pananarhug ha ira mga pamilya agud puguson hira nga umalagad ha karuyagon han militar ngan pulis.

Engrande nga pan-nguwat ha masa nga parag-uma an iginrarakudako ni Marcos nga “pandistribwer han titulo” bisan kun kadam-an hiton hadto pa nira katin nga kolektibo nga titulo (Certificate of Land Ownership Award) ilarum han “agrarian reform communities,” kalakip an mga tuna nga naipanhatag hadto han rebolusyunaryo nga kagiusan ha mga parag-uma ngan nasyunal nga minoriya, nga ginbababhin agud masayon nga paliton o agawon han dagko nga parupanlupot han tuna.

Higluag nga katunaan an ginsusubasta ni Marcos ha mga langyaw nga dagko nga kapitalista ha porma han “pagpapaplete” hin tubtub 99 katuig. Narunapulo kayukot nga parag-uma ngan mga nasyunal nga minoriya an ginpapalayas agud tagan-dalan an mga plantasyon, minahan, mga pan-enerhiya nga proyekto, turismo ngan iba pa nga operasyon han dagko nga kompaniya nga langyaw ngan lokal. Gintatanyagan hira ni Marcos nga mamuhunan nga waray o haros waray kabaraydan nga buhis. Piho nga mas mabug-at pa nga mga kontra-katawhan ngan kontra-nasyunal nga palisiya an igmamando ni President Trump han US ha papet nga hi Marcos ha pagkirita nira ha White House.

Kalugaringon la an gin-uuwat nira Marcos, han iya mga upisyal militar ngan kakunsabo ha NTF-Elcac ha pagrarakudako nga hirani na nira maperdi an Bagong Hukbong Bayan. Uusa nala kuno an prente gerilya ha bug-os nga nasud, kundi mayoriya pa gihap han mga pankombat nga batalyon han AFP an nakadeploy kontra ha BHB ha bug-os nga nasud.

Gin-gagamit ni Marcos an pipira nga nagtraydor ha masa agud kumanta hin pagdayaw ha iya “kamurayawan ngan kauswagan.” Hira ngatanan reaksyunaryo nga ispesyal nga ahente agud magyawyaw han disimpormasyon ngan buwa kontra ha rebolusyunaryo nga kagiusan.

An “kamurayawan” ni Marcos kamingawan han lubnganan han mga biktima han iya pasista nga paghahadi. Iginseselebrar han imperyalismo nga US ngan mga lokal nga naghahadi nga klase an kamingawan nga iginpaparayaw ni Marcos agud libyano nira nga luputon an tuna han masa nga parag-uma, panason an mga bukid ngan salog, dambungon an karikuhan han nasud, kurakuton an baul-karikuhan ngan tukuron ha nasud an poder han pwersa militar han US.

Ini nga buwa nga “kamurayawan” ni Marcos ngan han iya NTF-Elcac ngan AFP, dako man gud nga ulang ha pakig-erestorya pankamurayawan ha NDFP. Ulang gihap an padayon nga paglinanat, pagpapriso ngan pagpatay ha mga konsultant ngan tinaglawas han NDFP, sukwahi ha mga kasarabutan hadto. Diri makakab-ot an makatadungan, makataralwas ngan maihaan nga kamurayawan tubtub nga diri gin-aatubang ngan ginsosolbar an batakan nga mga problema nga aada ha gamot han armado nga sumpakiay ha nasud, ngan kun an katuyuanan gud la rumkon, puypuyon ngan pasurenderon an ngatanan nga naato.

Kinahanglan isalikway han katawhan Pilipino an buwa ngan buaw nga kamurayawan ni Marcos. Atubangan han natikagrabe nga panmuypoy, natikagrabe nga porma han pananalumpigos ngan paniniyupi, ngan paggrabe han krisis han dunot nga bagakolonyal ngan bagapyudal nga sistema, waray iba nga pagpipilian an katawhan Pilipino kundi an dalan han armado nga pakig-away. An armado nga pakig-away an pinakamabakod nga armas han katawahan agud depensahan an ira katungod, kinabuhi ngan pakabuhi. Kun waray armado nga pakig-away an katawhan, waray wantas nga mananawan-tawan an imperyalismo nga US ngan mga naghahadi nga klase ha pananalumpigos ngan paniniyupi ha katawhan.

Ha luyo han gin-antos nga mga kaperdihan bunga han kalugaringon nga mga kaluyahan ngan atubangan han todo nga atake han AFP, determinado an Bagong Hukbong Bayan nga magpursige ha dalan han armado nga pakig-away, itul-id an daan nga mga kaluyahan ngan pakusgon an rebolusyunaryo nga pag-ato. Ha pamumuno han Partido, dirudiretso nga mahiluag ngan makusog an BHB ngan base panmasa hini ha bug-os nga nasud. Nagpapabilin nga matambok gud an tuna agud mapasulong an armado nga pakig-away ngan utro nga pakusgon an mga prente gerilya agud magserbe nga kuta han pag-ato han katawhan para ha nasyunal ngan pankatilingban nga pagtatalwas.