Ha iya syahan nga State of the Nation Address, iginpahayag ni Marcos nga an renewable energy (RE) iginkukunsidera han iya gubyerno nga yawe nga sektor para kuno ha pagpapauswag han ekonomiya han nasud. Tikang hadto, nagin agresibo ngan butaray an panlulupot han tuna ngan paghibang ha kalibungan agud tagan-dalan an mga mamuruhunan ha RE ha nasud. Maabot ha 68% han langyaw nga pamumuhunan hadton 2024 ha mga proyekto nga RE.

Ilarum han National Renewable Energy Program (NREP), target nga 50% han enerhiya han Pilipinas pag-abot han 2040 tikang ha RE. Binug-os ini ha katuyuanan kuno nga magkamayda hin “sustenable nga makukuhaan” han enerhiya. An RE diin man ha enerhiya nga biomass (pagdunot han organiko nga materyal), solar (adlaw), wind (hangin), geo- thermal (mapaso nga alisngaw tikang ha tuna) ngan hydropower (tubig).

Dugang nga ginpasayon ngan ginpadagmit ni Marcos an paghahatag han permit ngan lisensya ha mga langyaw nga kapitalista nga mamuruhunan ha RE. Hadton Abril, naghatag an Department of Energy han permit para ha 1,319 nga proyekto nga RE, 39% o 517 dinhi proyekto nga solar. An Ilocos an ika-upat ha mayda pinakadamo nga proyekto nga solar, nga mayda 53 nga proyekto. Target gihap han estado nga magkamayda hin 46,000 kaektarya nga solar farms pag-abot 2040.

Madagmit naman nga ginsingabot han mga lokal nga dagko nga burgesya kumprador an mga proyekto nga RE ha nasud agud mapulsan ini. Kalakip dinhi an Solar Philippines New Energy Corp. (SPNEC) ni Manny Pangilinan, AC Energy Corp. (ACEN) han mga Ayala, APC Group Inc./Philippine Geothermal Production Co. han pamilya Sy, Astra Solar Energy Corp. han kompaniya nga Aboitiz, San Miguel Global Power Holdings ni Ramon Ang ngan Energy Development Corporation (EDC) han Lopez Group.

Usa ha pinakamakahiribang nga RE nga proyekto an 3,500 kaektarya nga solar farm (mas dako pa ha bug-os nga tuna han Makati City ngan Mandaluyong) nga pananag-iya han Meralco Terra Solar ha parte han Bulacan ngan Nueva Ecija. Nakatalaan ini magin pinakadako nga solar ngan battery facility ha bug-os nga kalibutan. Pananag-iya ini han SPNEC ngan Actis, kompaniya nga nakabase ha United Kingdom.

Lulupgupon naman han Laguna Lake Floating Solar Project an 2,000 kaektarya han danaw ha parte han Calamba, Santa Rosa, Cabuyao, Bay ngan Victoria. Pananag-iya an proyekto han ACEN ngan mga kompaniya tikang Singapore ngan UK.

Kalakip ha pinakadagko nga offshore ngan onshore windfarm igtitindog ha San Miguel Bay, Camarines Sur, nga malupgop ha 23,307 kaektarya nga municipal waters han San Miguel. May kapasidad ini nga 1,000 megawatts (MW) ngan pananag-iya ini han Copenhagen Infrastructure New Market Fund Corp., kompaniya tikang Denmark ngan ACEN nga mayda 25% nga sosyo. Igtitindog gihap an 1,200 MW Guimaras Strait OSWF nga igtitindog ha butnga han Panay ngan Negros nga pananag-iya han mga kompaniya tikang Switzerland ngan Liechtenstein. Igtitindog gihap han ACEN an 2,510 MW Quezon North Wind Farm ha Real, Quezon ngan an 625 kaektarya nga North Luzon Renewable Wind Farm ha Pagupud, Ilocos Norte.

Aada ha 99 nga proyekto nga hydropower, nga mayda kabug-usan nga 4,000 MW, an gin-aprubahan han gubyerno ha Cordillera. Upat hini nga mga proyekto pananag-iya han kompaniya tikang Australia. Nakatalaan gihap magtindog han tulo nga geothermal power plant (GPP) ha rehiyon nga maghihimo han kabug-usan nga 300 MW nga kuryente. Ini an Buguias-Tinoc GPP nga pananag-iya han EDC, ngan Kalinga GPP ngan an Mainit-Sadanga GPP nga pareho nga pananag-iya han APC.

Iginrarason han reaksyunaryo nga estado an “pag-atubang ha krisis ha klima” agud igpalusot an bilyun-bilyon nga balor nga proyekto nga RE. Kundi an tinuod, ginpapaluya an kapas han nasud nga atubangon an mga bagyo han pagbabag-o han klima ha waray-hunong nga paghibang ha kalibungan agud tagan-dalan ini nga mga pasilidad.

Mas grabe pa, pira kanapulo kayukot nga parag-uma, parupangisda ngan nasyunal nga minoriya an mawawarayan han pakabuhi ngan puruy-anan ngan yukut-yukot kaektarya nga agrikultural nga tuna, kadagatan ngan kagugub-an an hihibangon ha ngaran han malimpyo nga enerhiya nga monopolisado han langyaw ngan lokal nga burgesya kumprador.