Susrunod nga petisyon an iginsubmiter han kampo ni hadto anay presidente Rodrigo Duterte agud igdelatar an pagbista ha iya kaso nga krimen kontra ha bug-os nga katawhan ha Pre-Trial Chamber 1 han International Criminal Court (ICC). Pinakaurhi dinhi an petisyon para ha “kadagmitan nga status conference” nga iginsalawad hadton Hunyo 17 agud kwestyunon an iskedyul han pag-atubang ni Duterte ha korte ha Septyembre 23. Gin-gamit pa hini nga rason an kunuhay mga “delay” o kadelatar han mga pangangandam han prosekusyon.

Antes hini, iginpabasura na han korte an iba pa nga mga “delaying tactic” han mga abugado ni Duterte. Usa dinhi an petisyon agud igdiskwalipika an duha nga huwes nga nakatin han iya kaso. Hadton Hulyo 3, diniri an plenaryo han ICC ha ira demanda nga tanggalon hira Judge María del Socorro Flores Liera ngan Judge Reine Adélaïde Sophie Alapini-Gansou tikang ha Pre-Trial Chamber I.

Sigon ha ICC, waray basaranan an alegasyon han kampo ni Duterte nga mayda ginpapaburan an mga huwes tungod ha nahiuna nira nga pagkakadabi ha desisyon kasumpay ha karukayaknon han hurisdiksyon han korte ha kaso. Ginklaro han ICC nga kaparte han trabaho han mga huwes an utro nga paghisgot ha mga ligal nga karukayaknon samtang naabante an kaso, ngan diri ini nangangahulugan han pagpabor o bias.

Duha pa nga petisyon nga pampadelatar ha proseso an iginsalawad han mga abugado ni Duterte. An syahan an hurisdiksyon han korte kan Duterte tungod kay diri na membro han ICC an Pilipinas ngan an ikaduha an paghangyo han iya interim release o temporaryo nga paggawas. Waray pa desisyon an korte ha pareho nga petisyon. Ha kaso han interim release, mahugot ini nga gintipahan han mga biktima, ngan ira mga abugado, ngan bisan han prosekusyon han ICC.

Samtang, padayon an pag-abante han kaso ha korte. Hadton Hulyo 1, nagsubmiter an prosekusyon han ika-11 nga katirig-uban han ebidensya kontra ha hadto anay nga presidente, kalakip an masobra 1,000 nga dokumento nga naglulupgop ha mga pagpatay tikang ha panahon niya komo meyor han Davao City tubtub ha iya termino komo presidente.