Padayon ang pagpanghasi sa militar ug pulis sa mga komunidad sa mag-uuma sa Cavite, Masbate ug Negros Occidental.

Sa Masbate, giaresto ug gipasakahan og kasong rebelyon ang upat ka sibilyan. Gidakop niadtong Hunyo 25 sa Barangay Baras, Esperanza silang Ronnie Ursal, Manlik Espinosa ug Melicio Malaras, ug niadtong Hunyo 11 si Vicente Colomna. Gawas kang Colomna, nakagawas na ang tulo. Gipailalum usa sa de facto nga balaod militar ang siyam ka barangay sa lungsod sa Palanas ug Dimasalang sukad Hulyo 11.

Sa Himamaylan City sa Negros Occidental, gihulga sa mga ahenteng traydor nga “surenderi” nga patyon ang magtiayong Jolibert ug Rica Basilio kung dili sila mosurender ug makigtinabangay sa 94th IB. Nahitabo ang pagpanghulga niadtong Hulyo 9 dihang giadtuan sa mga sundalo ang magtiayon sa ilang balay sa Sityo Cabagal, Barangay Buenavista. Nagbunga ang insidente og kahadlok dili lamang sa magtiayon kundili sa tibuo komunidad.

Sa Cavite, planong kampuhan sa 2nd Civil Military Operation(CMO) Company ug Task Force Ugnay ang komunidad sa Tartaria sa Silang, Cavite aron pig-oton ang makanunayong pagsukol sa mga mag-uuma ug residente ug palayason sila sa lugar.

Samtang gipig-ot sa Bureau of Corrections (BuCor) ang tigpamaba sa grupong Kapatid nga si Fides Lim human niyang gireklamo ang mga iligal ug dili makitawhanong palisiya sa ahensya. Gibawalan siyang makasulod sa tanang prisohan nga anaa ilalum sa hurisdiksyon sa BuCor. Aktibo si Lim sa pagpangalap ug paghatod og makitawhanong ayuda ug nakigbisog para sa mga katungod sa mga bilanggong pulitikal taliwala sa natahong pagpasagad ug abuso sulod sa New Bilibid Prison ug uban pang prisohan.