Rinibo a Pilipino ti nagturong iti kalsada idi Hulyo 28 idiay Metro Manila ken dagiti prubinsya, uray iti ballasiw-taaw, tapno ibunannag ti pudno a kasasaad ti umili iti sidong ti tallo a tawen a panagari ti rehimen Marcos. Dagiti demonstrasyon, a tinawen a naisaysayangkat kas pangsungbat iti State of the Nation (SONA) ti nakatugaw a presidente, ket naawagan tatta a tawen kas SONA ti Panagsingir.

Nagmartsa ti nadumaduma a sektor ken grupo iti Commonwealth Avenue, Quezon City agturong iti House of Representatives idiay Batasan Hills iti panangiyuna ti Bagong Alyansang Makabayan (Bayan). Kas iti napalabas, linapdan ti rinibo a pulis ti martsa isu a naiduron dagiti grupo nga agisayangkat ti programa mano a kilometro pay nga adayo iti Batasan.

Segun iti Bayan, ti SONA ti Panagsingir ket ti lehitimo ken demokratiko a sungbat ti umili iti panaggundaway ken panangidadanes nga ipatpatungpal ti rehimen US-Marcos.

Naitampok iti demonstrasyon ti kinainutil ti rehimen a sungbatan ti epekto ti agsasaruno a bagyo ken habagat itay nabiit a nangitunda ti nakaro a panagtudo ken panaglayus. Binabalaw da met ti nadumaduma a lapped nga ipatpatungpal dagiti institusyon ti estado, kas ti Korte Suprema, a nangdiskaril iti panagdengngeg iti impeachment laban iti bise presidente a ni Sara Duterte.

Nakundenar met iti tignay ti ad-adda pay a konsolidasyon ti turay iti pulitika ti rehimen Marcos kadagiti napalabas a tawen babaen ti panagpaspasurot iti diktar ti imperyalismo a US iti ekonomya, patakaran a pangruar ken nailyan a seguridad. Binatikos da met dagiti agtultuloy a represibo a patakaran kas ti Anti-Terrorism Law, ti National task Force-Elcac ken ti National Action Plan for Unity, Peace and Development, ken uray ti “gera iti droga” ti dati a rehimen Duterte.

Nakikaykaysa met iti demonstrasyon dagiti nailyan-demokratiko a grupo manipud iti Southern Tagalog ken Central Luzon.

Sakbay ti mismo nga aldaw ti SONA, nagisayangkat dagiti organisasyon ti protesta iti nadumaduma nga ahensya ti rehimen Marcos tapno singiren ken pagsungbaten iti kinaawan sungbat ken bulok a serbisyo.

Kabayatanna, agarup 1,000 katao ti timmabuno iti tignay iti Iloilo City. Inkasa da dagiti tignay idiay Naga City idiay Camarines Sur, Roxas City idiay Capiz, Kalibo idiay Aklan, Bacolod City, Cebu City, Tacloban City ken Davao City. Kabayatanna, maysa a porum ti naisayangkat idiay Baguio City idi Hulyo 27.

Iti ruar ti Pilipinas, naisayangkat dagiti demonstrasyon idiay Hong Kong. South Korea, New Zealand, Australia, kadagiti estado iti US, Canada, Netherlands, Germany ken United Kingdom. Kaadwan kadagiti aktibidad ket naiyaramid iti batog dagiti konsulado ti Pilipinas tapno ipadanon iti gubyerno dagiti arungaing da.

SONA nga eppes

Kas ti namnamaen, ti diskurso ni Marcos ket awan ti linaon na a nabagas nga ulat ken patakaran a makapadur-as iti kasasaad ti Pilipinas. Nagisawang laeng isuna kadagiti pang-arkus a proyekto, nagipasaw iti ₱20/kilo a bagas a mailaklako iti sumagmamano a tyendaan ken dadduma pay.

Para iti umili, ubbaw ti deklarasyon ni Marcos kontra iti korapsyon nangruna ta agtultuloy nga agraraira ti binilyon a piso a confidential funds. Nayon met ditoy ti panangipawil na iti panaggunay ti kaso nga impeachment laban ken Duterte.

Pammarang a dinillaw ni Marcos dagiti upisyal ti gubyerno iti nabuntog a panagipatungpal kadagiti proyekto a pangkontrol iti layus gapu iti korapsyon. Iti kinapudno na, nakarkaro pay iti natatek ti korapsyon a proyekto, ni Marcos ti kangrunaan a didigra gapu ta palpalubosan na ti managdadael a panagkwari, dredging, panagminas ken dagiti proyekto a reklamasyon ti dadakkel a negosyo dagiti burukrata-kapitalista.

Ubbaw dagiti nadakamat na a proyekto para iti salun-at, edukasyon ken dadduma pay a serbisyo iti kagimongan. Adu a napapateg nga isyu a saan na a dinakamat karaman ti nabayagen a panawagan para iti nayon a sweldo dagiti mangmangged, daga para iti mannalon ken dadduma pay.