Yukut-yukot nga Pilipino an kinadto ha kakalsadahan hadton Hulyo 28 ha Metro Manila ngan mga prubinsya, bisan ha langyaw nga labnasan, agud ibuksas an tinuod nga kamutangan han katawhan ilarum han tulo katuig nga paghahadi han rehimen Marcos. An mga demonstrasyon, nga kada tuig iginlalansar komo pantugbang ha han State of the Nation Address (SONA) han nakalingkod nga presidente, gin-ngaranan yana nga tuig komo SONA han Panunukot.

Nagmartsa an magkalain-lain nga sektor ngan grupo ha Commonwealth Avenue, Quezon City tipakadto ha House of Representatives ha Batasan Hills ha pangunguna han Bagong Alyansang Makabayan (Bayan). Sugad ha nakalabay, ginpugngan han yukut-yukot nga pulis an martsa sanglit naduso an mga grupo nga maglansar han programa pira kakilometro pa an distansya ha Batasan.

Sigon ha Bayan, an SONA han Panunukot amo an lehitimo ngan demokratiko nga baton han katawhan ha paniniyupi ngan pananalumpigos nga iginpapatuman han rehimen US-Marcos.

Ginpalandaw ha demonstrasyon an kawaray pulos han rehimen nga batunon an epekto han nakalabay pala nga susrunod nga bagyo ngan habagat nga nagdurot han grabe nga pag-uran ngan pagbaha. Ginsukna liwat nira an dirudilain nga ulang nga igin-iimponer han mga institusyon han estado, sugad han Korte Suprema, nga nagdiskaril ha pagbista ha kaso nga impeachment kontra ha bise presidente nga hi Sara Duterte.

Ginkundenar liwat ha paggios an labaw pa nga konsolidasyon han pampulitika nga poder han rehimen Marcos ha naglabay nga mga tuig pinaagi han pag-inalagad ha dikta han imperyalismo nga US ha ekonomiya, pan-gawas nga palisiya ngan nasyunal nga seguridad. Ginsukna liwat nira an nagpapadayon nga mga mapanmuypoy nga palisiya sugad han Anti-Terrorism Law, an National Task Force-Elcac ngan an National Action Plan for Unity, Peace and Development, ngan bisan an “gerra ha druga” han hadto anay rehimen Duterte.

Nakig-usa liwat ha demonstrasyon an mga nasyunal-demokratiko nga grupo tikang ha Southern Tagalog ngan Central Luzon.

Antes an adlaw mismo han SONA, naglansar an mga organisasyon han protesta ha magkalain-lain nga ahensya han rehimen Marcos agud sukton ngan papagbatunon ha ira kawaray baton ngan dunot nga mga serbisyo.

Samtang, haros 1,000 katawo an pinartisipar ha paggios ha Iloilo City. Iginlansar liwat an mga paggios ha Naga City ha Camarines Sur, Roxas City ha Capiz, Kalibo ha Aklan, Bacolod City, Cebu City, Tacloban City ngan Davao City. Samtang, usa nga porum an ginlansar ha Baguio City hadton Hulyo 27.

Ha gawas han Pilipinas, iginlansar an mga demonstrasyon ha Hong Kong, South Korea, New Zealand, Australia, ha mga estado ha US, Canada, Netherlands, Germany ngan United Kingdom. Kadam-an han mga aktibidad iginhimo ha atubangan han mga konsulado han Pilipinas agud ipadangat ha gubyerno an ira mga araba.

SONA nga waray unod

Sugad han ginlalauman, waray unod nga mahinungdanon nga report ngan palisiya nga makakapauswag ha kamutangan han Pilipinas an pamulong ni Marcos. Nagyinawyaw la hi Marcos han mga parayaw nga proyekto, naghinambog ha ₱20/kilo nga bugas nga ginbabaligya ha pipira nga tindahan, ngan iba pa.

Para ha katawhan, buaw an deklarasyon ni Marcos kontra ha korapsyon labina nga padayon nga naeksister an bilyun-bilyon kapiso niya nga confidential funds. Dugang liwat dinhi an pagpugong niya ha pag-unhan han kaso nga impeachment kontra kan Duterte.

Buwa nga ginsukna ni Marcos an mga upisyal han gubyerno ha malangan nga pagpapatuman ha mga proyekto nga pankontrol ha baha nga korapsyon an hinungdan. Ha kamatuoran, lahos ha putos han korapsyon nga mga proyekto, hi Marcos an prinsipal nga delubyo tungod kay gintutugutan niya an makahiribang nga pagkukwari, dredging, pagmimina ngan mga proyekto nga reklamasyon han dagko nga negosyo han mga burukrata-kapitalista.

Buaw an mga ginsering niya nga proyekto para ha kalibsugan, edukasyon, ngan iba pa nga serbisyo nga pankatilingban. Damo nga mga importante nga isyu an waray niya malakbitan kalakip an maiha na nga panawagan para ha umento ha suhol han mga trabahador, tuna ha mga parag-uma, ngan iba pa.