Linibo ka Pilipino ang nagpadulong sa kadalanan sadtong Hulyo 28 sa Metro Manila kag mga probinsya, bisan sa luwas sang pungsod, para ibuyagyag ang matuod nga kahimtangan sang pumuluyo sa idalom sang tatlo ka tuig nga paghari sang rehimen Marcos. Ang mga demonstrasyon, nga tuigan nga ginalunsar bilang pangtapat sa State of the Nation Address (SONA) sang nagapungko nga presidente, ginatawag ini subong nga tuig bilang SONA sang Pagpanukot.

Nagmartsa ang lain-lain nga sektor kag grupo sa Commonwealth Avenue, Quezon City padulong sa House of Representatives sa Batasan Hills sa pagpanguna sang Bagong Alyansang Makabayan (Bayan). Pareho sang nagligad, ginpunggan sang linibo ka mga pulis ang martsa amo nga natulod ang mga grupo nga maglunsar sang programa pila ka kilometro pa ang kalayuon sa Batasan.

Suno sa Bayan, ang SONA sang Pagpanukot amo ang lehitimo kag demokratiko nga sabat sang banwa sa pagpanghimulos kag pagpamigos nga ginapatuman sang rehimen US-Marcos.

Ginhatagan tum-ok sa demonstrasyon ang pagka-inutil sang rehimen nga sabton ang epekto sang sini lang nagasundanay nga mga bagyo kag hangin habagat nga nagtuga sang mabaskog nga ulan kag baha. Gintumod man nila ang nanari-sari nga upang nga ginapatuman sang mga institusyon sang estado, pareho sang Korte Suprema, nga nagdiskaril sa paghukom sang kaso nga impeachment batuk sa bise presidente nga si Sara Duterte.

Ginpakamalaot man sa hublag ang labi pa nga konsolidasyon sang gahum pampulitika sang rehimen Marcos sa nagligad nga mga tinuig paagi sa pagsunod-sunod sa dikta sang imperyalismong US sa ekonomiya, patakaran pangluwas kag pungsodnon nga seguridad. Ginbatikos man nila ang nagapadayon nga mga mapintas nga patakaran pareho sang Anti-Terrorism Law, ang National task Force-Elcac kag ang National Action Plan for Unity, Peace and Development, kag bisan ang “gyera sa droga” sang anay rehimen Duterte.

Nakig-ugyon man sa demonstrasyon ang mga pungsodnon-demokratiko nga grupo halin sa Southern Tagalog kag Central Luzon.

Bag-o ang mismo adlaw sang SONA, naglunsar ang mga organisasyon sang protesta sa nagkalain-lain nga ahensya sang rehimen Marcos para sukton kag pasabton sa ila kawad-on sang sabat kag inutil nga mga serbisyo.

Samtang, halos 1,000 ka tawo ang nagtambong sa hublag sa Iloilo City. Gintigayon man ang mga hublag sa Naga City sa Camarines Sur, Roxas City sa Capiz, Kalibo sa Aklan, Bacolod City, Cebu City, Tacloban City kag Davao City. Samtang, isa ka porum ang ginlunsar sa Baguio City sadtong Hulyo 27.

Sa luwas sang Pilipinas, ginlunsar ang mga demonstrasyon sa Hong Kong, South Korea, New Zealand, Australia, sa mga estado sa US, Canada, Netherlands, Germany kag United Kingdom. Kalabanan sa mga aktibidad ang ginlunsar sa atubang sang mga konsulado sang Pilipinas agud ipaabot sa gubyerno ang ila mga reklamo.

SONA nga wala unod

Pareho sang ginalauman, wala sang unod nga mapuslanon nga report kag patakaran nga makapauswag sa kahimtangan sang Pilipinas ang pamulong-pulong ni Marcos. Nagwakal lang si Marcos sang mga pagpaguwapo nga proyekto, nagpadayaw sa ₱20/kilo nga bugas nga ginabaligya sa pipila ka tindahan, kag iban pa.

Para sa pumuluyo, wala unod ang deklarasyon ni Marcos kontra sa korapsyon ilabi na nga padayon kag padayon nga nagaluntad ang binilyon ka piso niya nga confidential funds. Dugang man diri ang pagpugong niya sa pag-idog sang kaso nga impeachment batuk kay Duterte.

Peke nga ginbatikos ni Marcos ang mga upisyal sang gubyerno sa uyaya nga pagpatuman sa mga proyektong pangkontrol sa baha nga korapsyon ang kabangdanan. Sa kamatuoran, labaw sa puno sang korapsyon nga mga proyekto, si Marcos ang nagapanguna nga delubyo tungod gintugutan niya ang mapangwasak nga pagkwari, dredging, pagmina kag mga proyektong reklamasyon sang dalagko nga negosyo sang mga burukrata-kapitalista.

Wala unod ang mga ginsambit niya nga proyekto para sa ikaayong lawas, edukasyon, kag iban pa nga serbisyo pangkatilingban. Madamo sang malahalon nga isyu ang wala niya ginsambit lakip ang madugay na nga panawagan para sa dugang-sweldo sang mga mamumugon, duta sa mga mangunguma, kag iban pa.