Iti duron dagiti organisasyon a Pilipino, naisayangkat ti agsina nga imbestigasyon iti kasasaad dagiti migrante a Pilipino idiay The Netherlands ken South Korea.

Idi Agosto 1, nagisayangkat ti imbestigasyon ti Ministry of Employment and Labor ti South Korea kanaig iti reklamo a saan a panagpasweldo iti 91 a Pilipino a mangmangged iti pagtatalonan ti Yanggu, Gangwon Province. Simrek dagiti migrante idiay Korea babaen ti “seasonal worker program,” maysa nga inisyatiba ti gubyerno a mangipalpalubos kadagiti gangannaet a mangmangged nga agtrabaho iti pagilyan iti limitado a panawen tapno mapunwan ti nasaknap a kinakurang dagiti mangmangged tunggal panawen ti panagmula wenno panagaani ken panagkalap

Idiay The Netherlands, naiduron dagiti organisasyon ti imbestigasyon iti saan a makatao a kundisyon iti panagtrabaho nu sadinno a karaman ti 11 a migrante a Pilipino. Agtrabtrabaho da kas para linis iti maysa a popular a sangay dagiti gym para iti nababaknang ken dagiti artista a Saints and Stars Gym idiay Amsterdam. Segun iti naipila a reklamo, kadwa da dagiti migrante a mangmangged nga Indonesian, a sibubukel a lawas a labes iti 12 oras tunggal aldaw nga agtrabaho. Innala ti superbisor ti pasaporte da ken nu dadduma ket saan da a masuswelduan. Ti 11 kadakwada ket agseseksek iti uppat a babassit a kwarto. Ti kasasaad da ket labsing iti Minimum Wage and Minimum Allowance Act ken Working Hours Act ti pagilyan. Awan ti permit tapno agtrabaho dagiti migrante a mangmangged.

Inimbestigaran ti Labour Inspectorate ti kaso a nagresulta iti panag-aresto ti Public Prosecution Service iti akawntant ti kumpanya iti posible a kaso ti panagdoktor kadagiti dokumento ken rekord ti kumpanya.

Nagisayangkat ti kampanya ti Migrante a Korea ken Ili ti Europe tapno iyawag ti hustisya para kadagiti migrante a Pilipino. Malaksid ditoy ket nagpanawagan da met ti sungsungbatan ti rehimen US-Marcos a mangitultuloy ti labor export program.