Kaniwas iti dinakamat ni Ferdinand Marcos Jr iti mai-4 a SONA a “naulimek” ken “natalinaayen” ti Pilipinas ken “awanen ti grupo a gerilya” iti pagilyan, awan sarday ti panagbomba, pammapatay ken panaglipit dagiti pwersa ti militar ken pulis kadagiti sibilyan a komunidad ken lumablaban nga umili iti linged ti kampanya nga insurhensya.

Panagbomba. Buteng, troma ken danag ti ituntunda ti panagbomba ken panagistraping manipud iti tangatang ti AFP kadagiti sibilyan a komunidad idiay Northern Samar ken Quezon.

Mano a daras a nagibulos ti bomba manipud iti tangatang ti 8th ID idiay Barangay San Isidro, Las Navas, Northern Samar idi Hulyo 31, alas-2:30 ti parbangon. Ibagbaga ti militar a tinarget daytoy a panagatake ti maysa a yunit ti hukbo ti umili iti lugar. Nupay kasta, palalo a nakaapektar daytoy iti sibilyan a populasyon. Kalpasan daytoy, in-hamlet ti 8th ID ti Barangay San Isidro ken dagiti barangay a nakapalikmot ditoy kabilang ti Barangay Imelda.

Idiay Quezon, biktima ti istraping, panagkanyon ken panagbomba ti 16th IB ti Barangay Maguibuay, Tagkawayan idi Agosto 2. Dua a helikopter ti nagistraping tapno kano kamaten ti nakaengkwentro da a yunit ti hukbo ti umili iti didiay nga aldaw.

Pammapatay ken gandat a pammapatay. Napaltogan ken napatay da Rudolph Dela Cruz ken Rico Gonzaga Malubay a salaknib ti kalikasan ken karbengan ti katutubo, idiay Banaybanay, Davao Oriental idi Hulyo 27. Agpada da nga aktibo a lumablaban iti managdadael a minas iti prubinsya gapu iti perdisyon nga ituntunda daytoy iti aglawlaw ken pagbiagan ti umili. Nagserbi da met a paralegal dagiti abugado ti Ateneo de Davao University iti napalabas.

Idiay Occidental Mindoro, tiniliw ken inggagara a pinatay dagiti soldado ti 4th IB ti sibilyan a ni Juan Sumiling iti Sityo Salidang, Barangay Naibuan, San Jose idi Agosto 1. Ti biktima ket parparwaren dagiti soldado a kameng ti hukbo ti umili a napatay iti maysa nga engkwentro. Pinaglibakan daytoy ti National Democratic Front-Mindoro.

Idiay General Santos City, nakaro a nasugatan ni Warren Cahayag, salaknib ti karbengan-tao, kalpasan a mano a daras a paltogan da idiay Purok Bliss, Barangay Calumpang idi Hulyo 28. Ni Cahayag ket maysa a paralegal a kabilang iti nagitakder ti Union of People’s Lawyers in Mindanao idi 2005.

Panaglipit. Idi Hulyo 28, maysa a soldado ti 17th IB ti nagsaludsod panggep ken Jacqueline Ratin, lider-pesante ken kababaihan idiay Cagayan Valley, iti upisina ti barangay Gabut, Amulong, Cagayan. Balbaliw a tinarget da kalpasan a timmulong isuna iti panangisimpa ti disaster relief operation iti prubinsya.

Idiay Central Negros, idi Agosto 1, inuli ken tinuktok dagiti soldado ti babbalay dagiti sibilyan a residente idiay Sityo Tagbak, Barangay Trinidad, Guihulngan City nga awanan uray anya a ligal a dokumento. Sakbay daytoy, iligal a nagkampo dagiti soldado iti balay ti maysa a sibilyan idiay Sityo Sampungan, Barangay Macagahay, Negros Occidental idi Hulyo 26.