Sa duso sang mga organisasyong Pilipino, nalunsar ang hamulag nga imbestigasyon sa kahimtangan sang mga migranteng Pilipino sa The Netherlands kag South Korea.

Sadtong Agosto 1, naglunsar sang imbestigasyon ang Ministry of Employment and Labor sang South Korea kaangot sa reklamo nga wala pagpasweldo sa 91 ka Pilipino nga mamumugon sa ulumhan sang Yanggu, Gangwon Province. Nagsulod ang mga migrante sa Korea paagi sa “seasonal worker program,” isa ka inisyatiba sang gubyerno nga nagatugot sa mga dumuluong nga mamumugon nga magtrabaho sa pungsod sa limitado nga panahon agud pun-an ang lapnagon nga kakulang sang mga mamumugon kada panahon sang pagpananom ukon tig-alani kag pagpangisda.

Sa The Netherlands, naduso sang mga organisasyon ang imbestigasyon sa indi makatawo nga kundisyon sa pamugon kon sa diin imbolbado ang 11 ka migranteng Pilipino. Nagatrabaho sila bilang mga tiglimpyo sa isa ka sikat nga sanga sang mga gym para sa mga manggaranon kag mga artista nga Saints and stars Gym sa Amsterdam. Suno sa ginpasaka nga reklamo, ginapa-trabaho sila, upod sang mga migranteng mamumugon nga Indonesian, sang bilog nga semana nga lapaw sa 12 ka oras kada adlaw. Ginkuha sang superbisor ang ila nga pasaporte kag kon kaisa wala sila ginasweldohan. Nagaginutok sila nga 11 sa sa apat ka gagmay nga kwarto. Ang ila nga kahimtangan ang lapas sa Minimum Wage and Minimum Allowance Act kag Working Hours Act sang pungsod. Wala sang permit para magtrabaho ang mga migrante nga mamumugon.

Gin-imbestigaran sang Labour Inspectorate ang kaso nga nagresulta sa pag-aresto sang Public Prosecution Service sa akawntant sang kumpanya sa posible nga kaso sang pagdoktor sang mga dokumento kag rekord sang kumpanya.

Naglunsar sang kampanya ang Migrante Korea kag Bayan Europe agud ipanawagan ang hustisya para sa mga migranteng Pilipino. Magluwas diri, nanawagan man sila sang pagpanabat halin sa rehimen US-Marcos nga nagapadayon sang labor export program.