Ha duso han mga organisasyon nga Pilipino, nahilansar an magkabulag nga imbestigasyon ha kamutangan han mga migrante nga Pilipino ha The Netherlands ngan South Korea.

Hadton Agosto 1, naglansar han imbestigasyon an Ministry of Employment and Labor han South Korea kasumpay ha reklamo nga diri pagpapasuhol ha 91 nga Pilipino nga trabahador ha umhanan han Yanggu, Gangwon Province. Sumakob an mga migrante ha Korea pinaagi han “seasonal worker program,” usa nga inisyatiba han gubyerno nga nagtutugot ha mga langyaw nga trabahador nga magtrabaho ha nasud ha limitado nga panahon agud pun-an an hiluagan nga kakulang han mga trabahador kada panahon han pananum ngan pangisda.

Ha The Netherlands, naiduso han mga organisasyon an imbestigasyon ha diri makatawo nga kundisyon ha pagtrabaho diin dabi an 11 nga migrante nga Pilipino. Nagtatrabaho hira komo mga tagalimpyo ha usa nga sikat nga sanga han mga gym para ha rikuhanon ngan mga artista nga Saints and Stars Gym ha Amsterdam. Sigon ha iginsalawad nga reklamo, ginpapatrabaho hira, kaupod han mga migrante nga trabahador nga Indonesian, hin bug-os nga semana hin lahos ha 12 kaoras kada araw. Ginkuha han superbisor an ira pasaporte ngan danay diri hira ginsusuhulan. Nagsusuruot an 11 ha ira ha upat nga gudti nga kwarto. An ira kamutangan talapas ha Minimum Wage and Minimum Allowance Act ngan Working Hours Act han nasud. Waray permit agud magtrabaho an mga migrante nga trabahador.

Gin-imbestigahan han Labour Inspectorate an kaso nga nagresulta ha pag-aresto han Public Prosecution Service ha akawntant han kompaniya ha posible nga kaso han pagdudoktor han mga dokumento ngan rekord han kompaniya.

Naglansar han kampanya an Migrante Korea ngan Bayan Europe agud ipanawagan an hustisya para ha mga migrante nga Pilipino. Labot dinhi, nanawagan liwat hira han baratunon tikang ha rehimen US-Marcos nga nagpapadayon han labor export program.