Kabaliskaran sa ginsambit ni Ferdinand Marcos Jr sa iya ika-4 nga SONA nga “malinong” kag “matawhay” na ang Pilipinas kag nga “wala na sang grupong gerilya” sa pungsod, wala untat ang mga pagpamomba, pagpamatay kag pagpang-ipit sang mga pwersa sang militar kag pulis sa mga sibilyan nga komunidad kag nagapakigbato nga pumuluyo sa tabon sang kampanya nga kontra-insurhensya.

Papamomba. Kahadlok, troma kag kahangawa ang dala sang pagpamomba kag pagpang-istraping halin sa kahawaan sang AFP sa mga sibilyan nga komunidad sa Northern Samar kag Quezon.

Pila ka sulit nga naghulog sang bomba halin sa kahawaan ang 8th ID sa Barangay San Isidro, Las Navas, Northern Samar sadtong Hulyo 31, alas-2:30 sang kaagahon. Ginhambal sang militar nga gintarget sang pag-atake nga ini ang isa ka yunit sang hukbong bayan sa lugar, apang grabe nga naka-apekto ini sa sibilyan nga populasyon. Pagkatapos sini, ginpaidalom sa hamlet sang 8th ID ang Barangay San Isidro kag ang mga barangay nga nakapalibot diri upod ang Barangay Imelda.

Sa Quezon, biktima sang pag-istraping, pagpanganyon kag pagpamomba sang 16th IB ang Barangay Maguibuay, Tagkawayan sadtong Agosto 2. Duha ka helikopter ang gingamit sa pagpang-istraping para kuno lagson ang naka-engkwentro nga yunit sang hukbong bayan sadtong aga sa amo man nga adlaw.

Pagpatay kag tuyo nga pagpatay. Gintiro kag napatay sanday Rudolfo Dela Cruz Espe kag Rico Gonzaga Malubay, mga tigpangapin sang kapalibutan kag kinamatarung sang mga tumandok, sa Banaybanay, Davao Oriental sadtong Hulyo 27. Pareho sila nga aktibo nga nagapakigbato sa mapangwasak nga mina sa probinsya tungod sa kahalitan nga gintuga sini sa palibot kag palangabuhian sang pumuluyo. Nagserbe man sila nga mga paralegal sang mga abogado sang Ateneo de Davao University sang nagligad.

Sa Occidental Mindoro, gindakop kag hungod nga ginpatay sang mga soldado sang 4th IB ang sibilyan nga si Juan Sumuling sa Sityo Salidang, Barangay Naibuan, San Jose sadtong Agosto 1. Ang biktima ang ginpagwa sang mga suldado nga myembro sang hukbong bayan nga napatay sa isa ka engkwentro. Ginpakamalaot ini sang National Democratic Front-Mindoro.

Sa General Santos City, malubha nga napilasan si Warren Cahayag, tigpangapin sang tawhanon nga kinamatarung, matapos pila ka beses nga luthangon sa Purok Bliss, Barangay Calumpang sadtong Hulyo 28. Si Cahayag ang isa ka paralegal nga kabahin sa nagtukod sang Union of Peoples’ Lawyers in Mindanao sadtong 2005.

Pagpang-ipit. Sadtong Hulyo 28, isa ka soldado sang 17th IB ang nagpamangkot bahin kay Jacqueline Ratin, lider-pesante kag kababaenhan sa Cagayan Valley, sa upisina sang barangay sang Gabut, Amulong, Cagayan. Liwat siya nga gintarget sang pagpang-ipit pagkatapos magbulig sa pagpatigayon sang disaster relief operation sa probinsya.

Sa Central Negros, ginsaka kag gintuktok sang mga soldado ang balay sang mga sibilyan nga residente sa Sityo Tagbak, Barangay Trinidad, Guihulngan City nga wala sang bisan ano nga ligal nga dokumento sadtong Agosto 1. Antes sini, iligal nga nagkampo ang mga soldado sa balay sang isa ka sibilyan sa Sityo Sampungan, Barangay Macagahay, Moises Padilla, Negros Occidental sadtong Hulyo 26.