Sukwahi ha ginluwas ni Ferdinand Marcos Jr ha iya ika-4 nga SONA nga “mamingaw” ngan “mamurayaw” na an Pilipinas ngan nga “waray na gerilya nga grupo” ha nasud, waray hunong an mga panmomba, panmatay ngan pan-gigipit han mga pwersa nga militar ngan pulis ha mga sibilyan nga komunidad ngan naato nga katawhan ha tahub han kampanya nga kontra-insurhensiya.

Panmomba. Kahadlok, troma ngan kabaraka an dara han panmomba ngan pangistraping tikang ha kahanginan han AFP ha mga sibilyan nga komunidad ha Northern Samar ngan Quezon.

Pira kabeses nga nagbuhi han bomba tikang ha kahanginan an 8th ID ha Barangay San Isidro, Las Navas, Northern Samar hadton Hulyo 31, alas-2:30 han kaagahon. Ginsesering han militar nga gintarget hini nga pag-atake an usa nga yunit han hukbo han katawhan ha lugar, sugadpaman, grabe ini nga nakaapekto ha sibilyan nga populasyon. Kahuman hini, iginpailarum ha hamlet han 8th ID an Barangay San Isidro ngan an mga barangay nga nakapalibot dinhi kalakip an Barangay Imelda.

Ha Quezon, biktima han pangistraping, panganganyon ngan panmomba han 16th IB an Barangay Maguibuay, Tagkawayan hadton Agosto 2. Duha nga helikopter an gin-gamit ha istraping para kuno lanaton an nakaengkwentro nga yunit han hukbo han katawhan hadton aga hiton nga adlaw.

Pagpatay ngan gin-atentar nga pagpatay. Ginpusil ngan napatay hira Rudolph Dela Cruz Espe ngan Rico Gonzaga Malubay, mga tagadepensa han kalibungan ngan katungod han nasyunal nga minoriya, ha Banaybanay, Davao Oriental hadton Hulyo 27. Ngaduha hira aktibo nga naato ha mapanhibang nga mina ha prubinsya tungod ha destroso nga igindudurot hini ha kalibungan ngan pakabuhi han katawhan. Nagserbe liwat hira nga mga paralegal han mga abugado han Ateneo de Davao University ha nakalabay.

Ha Occidental Mindoro, gindakop ngan tuyo nga ginpatay han mga sundalo han 4th IB an sibilyan nga hi Juan Sumiling ha Sityo Salidang, Barangay Naibuan, San Jose hadton Agosto 1. Ginpagawas han mga sundalo nga an biktima membro han hukbo han katawhan nga napatay ha usa nga engkwentro. Ginpahimuwaan ini han National Democratic Front-Mindoro.

Ha General Santos City, grabe nga nasamaran hi Warren Cahayag, tagadepensa han tawhanon nga katungod, kahuman pira kabeses nga pusilon ha Purok Bliss, Barangay Calumpang hadton Hulyo 28. Hi Cahayag usa nga paralegal nga kaupod ha nagtukod han Union of Peoples’ Lawyers in Mindanao hadton 2005.

Pan-gigipit. Hadton Hulyo 28, usa nga sundalo han 17th IB an nagpakiana hiunong kan Jacqueline Ratin, lider-pesante ngan kababayin-an ha Cagayan Valley, ha upisina han barangay han Gabut, Amulong, Cagayan. Utro hiya nga gintarget han pan-gigipit kahuman bumulig ha pangayad han disaster relief operation ha prubinsya.

Ha Central Negros, sinaka ngan ginkatok han mga sundalo an balay han mga sibilyan nga residente ha Sityo Tagbak, Barangay Trinidad, Guihulngan City hin waray bisan ano nga ligal nga dokumento hadton Agosto 1. Antes hini, iligal nga nagkampo an mga sundalo ha balay han usa nga sibilyan ha Sityo Sampungan, Barangay Macagahay, Negros Occidental hadton Hulyo 26.