Nailista iti nadumaduma a paset ti pagilyan dagiti kaso ti panagdukot, Red-tagging, panaglipit ken panagipila ti pinarbo a kaso laban kadagiti mannalon, mangmangged ken salaknib ti karbengan-tao.

Panagdukot. Dinukot dagiti elemento ti 47th IB ni Lolly Alperto, 60-anyos, mannalon, bayat nga agpurpuros ti kape asideg iti balay na idiay Sityo Agpapataw, Barangay Binobohan, Guihulngan, Negros Oriental idi Enero 31. Naiyulat a ni Alperto a pinatudwan ti bala dagiti soldado ket mapatta-patta a nasugatan sakbay da a dinukot isuna. Agingga iti agdama ket saan pay laeng a natunton ti pamilya na.

Panagkemmeg ken panagipila ti kaso. Kinemmeg dagiti gwardya ken ti PNP-Cabuyao ti 21 a mannalon nga agisaysayangkat ti kampuhan idiay Sityo Veinte-Veinte Cuatro, Barangay Casile, Cabuyao, Laguna idi Pebrero 7. Supsupyaten dagiti mannalon ti panangagaw ti daga da ti Laguna Estates Development Corporation a sanikwa ti pamilya Yulo. Naidarum isuda ti “trespassing” ngem dagus met laeng nga inbasura ti piskalya. Tagtagikwaen ti kumpanya ti 24-ektarya a daga iti barangay.

Idiay Bulacan, inaresto dagiti elemento ti PNP-San Jose Del Monte (SJDM) ni Engineer Even Calajate idi Pebrero 11, maysa kadagiti testigo laban iti kumpanya a Primewater. Maak-akusaran isuna ti perjury, (panagulbod iti maysa a nasapataan a salaysay) ti lima a suporter ni Rida Robes, meyor ti SJDM. Ti kaso ket kanaig iti nagbalin a testimonya iti Senado idi Nobyembre 2025 idi nagisayangkat daytoy ti pangpubliko nga imbestigasyon kanaig iti palpak a serbisyo ti Primewater.

Panaglipit. Dua a lalaki a nakasibilyan a nakiam-ammo a soldado ti napan iti balay ni Eduardo Capuyan, retirado nga organisador dagiti mangmangged iti Southern Mindanao Region idi Pebrero 10. Ininteroga isuna kanaig iti sumagmamano nga indibidwal a birbiroken ti militar.

Idiay Caloocan City, pwersado a naserrek ken natakawan ti upisina ti Gabriela-Caloocan idi Pebrero 17. Intaray dagiti agtatakaw ti projector, dagiti polyeto ken maaramat iti anibersaryo ti EDSA iti Pebrero 25. Rinansak dagiti kriminal ti upisina nga umuna a sinerrek ken inpasidong ti sarbeylans dagiti nagpakaammo a pulis idi Oktubre 28, 2025.

Red-tagging. Idiay Albay, manipud Pebrero 8 ket napaliiw ti agkaiwara a poster ti NTF-Elcac nu sadinno a na-Red-tag dagiti progresibo a lider ken grupo a Bicolano iti aglikmot ken uneg ti unibersidad ken eskwelaan. Kabilang iti biktima ni Julius Espadero, bise presidente ti ACT Bicol Union.