Nagiyebkas ti panagsupyat dagiti residente ti MacArthur, Leyte laban iti panagminas ti blacksand ti Mac-Arthur Ironsand Project Corporation (MIPC) iti ili da daytoy Pebrero. Adda iti likod ti operasyon ti dinastiya a Romualdez a makinkontrol met laeng iti dadduma pay a managdadael a panagminas iti Eastern Visayas.

Ti MIPC ket kontraktor ti Strong Built Mining Development Corporation (SBMDC). Idi 2007, sinagutan ti Mines and Geosciences Bureau-Region 8 ti SBMDC ti 25-tawen a Mineral Production Sharing Agreement (MPSA) a sumaksakop ti 7,411 ektarya a daga kadagiti ili ti Dulag, Mayorga, MacArthur, Javier ken Abuyog. Ti SBMDC ket ginatang idi 2024 ti Bright Kindle Resources & Investments Inc, kumpanya a sanikwa ni Martin Romualdez, kasinsin ni Ferdinand Marcos Jr, dati nga Speaker ken konggresista ti umuna a distrito ti Leyte.

Supsupyaten dagiti residente ti operasyon a panagminas gapu ta dadaelen daytoy dagiti daga a taltalon ken dagiti sistema ti padanum a kritikal iti produksyon ti taraon. Adda metten dagiti ulat a maparparitan ti sumagmamano a mannalon a makastrek iti bukod da a daga. Idi 2022, duron ti panagkaykaysa dagiti residente ket temporaryo a napasardeng ti operasyon ti MIPC-SBMDC.

Sakbay pay a simrek ti MIPC-SBMDC idiayMacArthur, nagminasen ti blacksand ti Nicua Mining Corporation iti ili. Sinabidong ti panagminas ti Lake Bito gapu ta naurnong iti dan-aw ti langis ken dadduma pay a kemikal manipud iti minasan. Mano a daras met a natay ti tone-tonelada nga ikan ken dadduma pay a gameng ti kadanuman iti dan-aw. Idi 2012, nagbarikada dagiti taga-Barangay Villa Imelda ken Barangay Liwayway laban iti operasyon.