Bunga ti awan sarday a pannakilaban ti umili ti Dupax del Norte, Nueva Vizcaya laban iti panagserrek ti Woggle Corporation iti komunidad da, napilitan ti Mines and Geosciences Bureau nga imandar idi Pebrero 5 ti temporaryo a suspensyon ti permit iti eksplorasyon ti kumpanya. Nadakamat a rason ditoy ket ti “force majeure” wenno pasamak nga awan ti kontrol ti makin-iggem ti permit. Karaman kadagiti pasamak ditoy ti panagitakder ti barikada, nainget a panagsupyat ken agraraira a tensyon iti baet dagiti residente ken kumpanya.

Iti laksid ti mandato, itultuloy latta ti kumpanya ti eksplorasyon. Idi Pebrero 17, iti tulong ti PNP, inruar ti kumpanya dagiti makina daytoy ken intulod da iti DENR dagiti mineral sample a naala manipud iti baryo.

Idi Pebrero 12, nagprotesta ti ginasut a residente, grupo a pangkalikasan, tao’t simbaan ken dagiti sumupsuporta iti laban dagiti taga-Dupax. Naiyaramid ti tignay iti kapitolyo ti Nueva Vizcaya tapno iyawag ti madagdagus a kanselasyon iti permit iti eksplorasyon ti kumpanya.

Ti tignay ket naisayangkat kagiddan ti panagdengngeg iti pito a salaknib ti kalikasan nga inaresto ti pulis kalpasan ti nadamsak a panangduprak iti barikada da idi Enero 13. Iti panagdengngeg, bilang makatao a konsiderasyon, binawi ti RTC branch 30 ti mandar daytoy a pagpalpalawagen ti pito a residente ti Dupax del Norte nu apay a saan da a rumbeng a mapilaan ti kaso nga indirect contempt (panaglabsing iti mandar ti korte).

Idi Pebrero 16 nabuangay idiay UP Diliman ti Defend Nueva Vizcaya Movement. Dimmar-ay ditoy dagiti lider iti komunidad ti Dupax del Norte, grupo a pangkalikasan, dagiti katutubo, tao’t simbaan, akademiko nga institusyon ken dagiti indibidwal tapno salakniban ti kalikasan, natural a kinabaknang ken karbengan ti umili iti Nueva Vizcaya.