Nagprotesta dagiti grupo ti mannalon ken mangmangged-talon iti sango ti Department of Agriculture idiay Quezon City kas pananglagip iti maika-7 tawen nga anibersaryo ti panagipasa ti linteg para iti liberalisasyon ti importasyon ti bagas idi Pebrero 13.

Manipud 2019 agingga 2026, dimmakkel ti importasyon ti bagas manipud 2.57 milyon a tonelada agturong ti nasurok 5 milyon a tonelada. Nagresulta daytoy ti panagsuwek ti presyo ti irik, manipud iti abereyds a ₱20 kada kilo idi 2018 agturong iti ₱14-₱16 kada kilo kadagiti sumaruno a tawen. Nangitunda daytoy ti pannakalugi dagiti mannalon, panagkissay wenno panagsardeng iti panagmula ken ad-adda pay a pannakailumlom iti utang gapu iti gastos iti produksyon ken kinaawan ti naan-anay a suporta manipud iti estado.

Idi Pebrero 10, nagprotesta idiay Quezon City dagiti kameng ti Anakpawis Partylist kas panangkundenar iti awan sarday a panagngato iti presyo ti langis ken pannakikunsabos ti rehimen US-Marcos iti kartel ti langis.

Idi Pebrero 17, ngimmato ti presyo ti gasolina ti ₱1.20/litro ken ₱0.60/litro iti diesel ken kerosin. Iti rugi ti tawen, ti presyo ti gasolina ket ngimmato iti neto a ₱4.20/litro, diesel iti ₱7/litro ken ti kerosin iti ₱5/litro.

Kabayatanna, nag-ulat ti Petron a dimmakkel ti pastrek daytoy iti 37% wenno ₱9.7 bilyon idi Nobyembre 2025. Bayat a kumakaud ti binilyon dagiti kumpanya ti langis, agtutuon met ti panangparigat da iti masa nga anakling-et.