Inbunannag ni Rep. Antonio Tinio ti ACT Teachers Partylist ti mano a detalye ti korapsyon a pakairamramanan ni Ferdinand Marcos Jr kanaig kadagiti maanomalya a proyekto iti flood control. Iti maysa a diskurso iti Kongreso idi Pebrero 10, kuna na a personal na a nakita dagiti sinnukat ti mensahe da Marcos ken Adrian Bersamin, dati a pangulo ti Presidential Legislative Liaison Office, nga immakto a “babaunen” ni Marcos kadagiti transaksyon. Ni Bersamin ket apo iti kaanakan ni dati nga executive secretary ni Marcos a ni Lucas Bersamin.

Napasamak ti sinnukat ti mensahe iti baet ti Disyembre 2024 agingga Hulyo 2025, iti panawen nga inmandar ni Marcos ti panangisingit kadagiti proyekto nga aggatad ti ₱100 bilyon iti badyet para iti 2025. Sentral iti sinnukat ti panangitulod ni Bersamin ti ₱8 bilyon a kikbak a naamwan nga inusar ni Marcos iti eleksyon 2025. Immunan nga inbunannag ti dati nga undersecretary ti Department of Public Works and Highways a ni Roberto Bernardo a nangitulod isuna ti ₱8 bilyon ken Bersamin ken ni Trygve Olivar nga idi ket undersecretary iti edukasyon. Kadagiti mensahe a naipakita ken Tinio, inpakaammo ni Bersamin ken Marcos a “kumpleton” ti panangitulod ti nasao a gatad idi Marso 2025.

Idi Hulyo 2025, mano nga aldaw sakbay ti state of the nation address (SONA) ni Marcos nu sadinno a kinastigar na dagiti konggresista kadagiti sarita a “mahiya naman kayo” kanaig kadagiti proyekto a flood control, immawat ni Marcos ti nayon a ₱2 bilyon a kikbak nga intulod ni Bersamin iti ginatang ni Marcos a balay idiay Forbes Park.

Daytoy nga impormasyon ket nagtaud ken Rep. Leandro Leviste nga immunan a nangibunannag nga adda iggem na a bidyo ken affidavit manipud kadagiti Bersamin a mangpaneknek kadagit pasamak. Inbingay na dagitoy nga ebidensya kadagiti mangibagi ti Makabayan, Liberal Party ken dadduma pay a grupo.

Gapu iti panagalangan ni Leviste nga isapubliko dagiti nasao a bidyo ken mensahe, saan a nairaman dagitoy kadagiti naipila nga impeachment complaint laban ken Marcos. Naibasuran ti nasao a reklamo idi Pebrero 10, nu sadinno nga inbunannag ni Tinio dagiti ebidensya a naurnong ni Leviste.