Moretiro sa Hulyo 21 si General Romeo Brawner Jr, hepe sa Armed Forces of the Philippines (AFP), human ang kapin upat ka dekada isip suluguong pasista sa reaksyunaryong estado. Sa iyang pagbiya, mahinumduman siya isip kriminal sa gubat, burukratang kapitalista sa militar, ug matinud-anong itoy nga pasista sa imperyalismong US.

Taas ang listahan sa krimen ni Brawner sa katawhang Pilipino. Hangtud sa kahangturan siyang singlon sa mga gikautangan niya og dugo, ug gukdon sa katarungan sa katawhan.

Mersenaryo sa US

Tibuok kinabuhi nga madasigong sumusunod si Brawner sa mga dikta sa US. Isip hepe sa AFP, gitibuok niya ang Comprehensive Archipelagic Defense Concept aron magsilbi kunohay sa “malinawong” eksplorasyon sa exclusive economic zone sa Pilipinas. Sa tinuod, pinasubay kini sa “Archipelagic Defense Strategy” sa militar sa US nga nakapunting sa pagbabag sa China sa Western Pacific, ilabina sa gitawag nga “first island chain.”

Walay kaulaw siyang nangayog limos nga armas ug ayudang militar para sa “pagpalambo” sa nasudnong depensa. Nanguna siya sa pagpalit og armas alang sa “modernisasyon” sa AFP, lakip ang ATMOS 2000 howitzers, Sabrah light tank, Typhon missile system, ug nagkalain-laing drone, ug uban pang kahimanang iggugubat nga katawhan ang moabaga sa gasto.

Isip masinugtanong itoy sa US, samot niyang gipainit ang tensyon tali sa Pilipinas ug China pinaagi sa mga pamahayag nga anti-China. Niadtong 2025, giawhag niya ang AFP nga “mangandam” sa posibilidad sa pagsulong sa China sa Taiwan, ug isipon nga “anaa na sa gubat” ang nasud. Rason niya nga kinahanglang “luwason” ang 250,000 ka Pilipinong nagtrabaho sa Taiwan kung mahitabo kini.

Taliwala sa panagbangi nilang Ferdinand Marcos Jr ug kampong Duterte, gipahimuslan ni Brawner ang sitwasyon aron iduso ang pagpadako sa badyet sa AFP. Gipamugos niya nga “kulang” ang sweldo sa mga sundalo. Tungod niini, gipasaka ang alawans sa pagkaon gikan ₱150 ngadtong ₱350, ug gidugangan pa og 15% ang batakang suholan sa mga sundalo ug uban pang unipormadong mga tawo alang sa 2026-2028.

Duguong kamot

Nahumol sa dugo ang rekord ni Brawner. Liboan ka mag-uuma, lumad, ug Moro ang gipatay, nawad-an sa pangabuhian, ug napalayas sa ilang yutang kabilin gumikan sa mga operasyong militar nga iyang gipanguluhan sa Visayas ug Mindanao sa ngalan sa mga kumpanya sa mina, burgesyang kumprador, ug langyawng mga korporasyon.

Usa ka kriminal sa gubat si Brawner tungod sa iyang tulubagon sa pagpatay kang Jorge Madlos (Ka Oris), kanhi tigpamaba sa BHB. Nadakpan nga buhi si Madlos niadtong Oktubre 30, 2021 sa Impasug-ong, Bukidnon, ug tinuyong gipatay, sa mando ni Brawner isip hepe kaniadto sa 4th ID. Aron itago ang ebidensya sa tortyur, iyang gimando ang dinalian nga pag-cremate sa patayng lawas ni Madlos ug sa iyang kauban.

Sa sunod nga tuig, gidakop nga buhi, gitortyur, tinuyuang gipatay ug gipagawas nga namatay sa kombate, silang Pedro Codaste (Ka Gonyong) ug Ka Sandro niadtong Enero 2022, ug silang Vincent Isagani Madlos (Ka Yuno) ug Glorivic Belandres (Ka Layka) niadtong Setyembre 2022. Si Ka Yuno anak ni Ka Oris.

Siya usab ang nagmando sa sunod-sunod nga mga aerial bombing sa Bukidnon, Misamis Oriental, ug mga probinsya sa Surigao ug Agusan nga nagdala og kalisang sa mga mag-uuma ug minoryang katawhan.

Kasaysayan sa pasismo

Naggikan si Brawner sa pamilya sa mga sundalo ug kawani sa gubyerno sa Baguio City. Nagtapos siya sa Philippine Military Academy isip kabahin sa “Makatao” Class of 1989 ug ikaduha sa klase. Usa usab siya ka alumni sa US Army War College, institusyong gidumalaan sa US Department of Defense aron bansayon ang tag-as nga upisyal militar.

Sa Philippine Army, nakuha niya ang nagkalain-laing posisyon gikan sa pagpangulo sa platun hangtod sa dibisyon sa Nueva Ecija, Samar, Leyte, Bohol, Cebu, Agusan del Norte, Agusan del Sur, Surigao del Sur, ug Davao.

Niadtong 2017, nahimo siyang deputy commander sa Task Force Ranao ug sa ulahi tigpamaba sa Task Force Marawi. Niadtong 2018, nahimo siyang kumander sa 103rd IB ug nagdumala sa “rehabilitasyon” sa Marawi. Niadtong 2021, gituboy siyang kumander sa 4th ID, ug niadtong 2023 nahimong Chief of Staff sa AFP.