Samtang gisakmit sa mga itoy nga tigmababa sa rehimeng US-Marcos ang bikil sa South China Sea, napuliki usab ang mga upisyal niini sa pag-abli sa “economic security zone” sa gambalay sa Pax Silica nga gidalidali na sa US. Niining Hulyo, gipahibalo sa rehimen ang pagsulod sa Foxconn isip “anchor investor” o susing mamumuhunan sa itukod nga engklabo. Giila ang Foxconn (nailhan usab nga Hon Hai Precision Industry Co., Ltd.) isip pinakadakong kumpanya nga naghimo og mga produktong elektroniko nga nag-asembol og mga produkto para sa Apple, Amazon, Microsoft, ug Sony.

Adunay taas nga rekord sa grabeng pagpang-abuso, sobra-sobrang pagpatrabaho sa mga mamumuo ug dili-makatawong kahimtang sa pamuo ang Foxconn sa China ug India. Kasagaran ang 80-100 ka oras nga obertaym matag bulan. Bawal ang mag-estorya o mogamit sa CR gawas sa gitakdong oras. Nag-empleyo usab kini og mga estudyante isip “interns” nga gisweldohan og mas ubos pa sa minimum, ug ginapatrabaho sa mga buluhaton nga walay kalambigitan sa ilang gitun-an.

Sa India, gipugngan sa kumpanya ang pagtukod og mga independyenteng unyon. Sweldong-ulipon ang ginahatag sa kumpanya sa mga mamumuo ug wala kini nagahatag og maayong puy-anan.

Sa pikas bahin, makatagamtam ang Foxconn og espesyal nga mga insentiba, tax break ug uban pang pabor. Subay sa nakab-ot nga kauyonan tali sa US ug Pilipinas, dili kini magbayad og abang sa unang duha ka tuig sa ilang operasyon dinhi.

Mahimuslan usab niini ang giapas karong pagkalot sa dili mominus sa 20 ka atabay sa tulo ka baryo sa Tarlac nga mosuyop sa rekursong tubig sa lumad nga katawhan ug mag-uuma sa lugar. Mapahimuslan usab niini ang gipatindog nga grid para sa 5-gigawatt nga panginahanglanong kuryente sa engklabo.