Gibanabanang 3,000 lumad nga Aeta gikan sa lima ka barangay ang nagmartsa sa Capas, Tarlac niadtong Hulyo 14 aron kundenahon ang pagpangawkaw sa ilang yutang kabilin ug nasinating pagpamig-ot gikan sa Philippine Air Force (PAF). Kadungan niini, gimakmak nila ang pagpangilog sa ilang yutang kabilin para sa pagpalapad sa New Clark City ubos sa pagdumala sa Bases Conversion and Development Authority (BCDA).

Nagmartsa ang mga Aeta gikan sa Barangay O’Donnell padulong sa usa ka tsekpoynt pasulod sa Colonel Ernesto Ravina Air Base (CERAB), usa ka reserbasyong militar, sa Barangay Santa Juliana. Nagpahayag og suporta kanila ang mga nasudnon-demokratikong grupo sa Central Luzon.

Gidid-an sa PAF ang maong mga komunidad nga magtukod ug mag-ayo sa mga kabalayan. Gihugtan ang ilang suplay sa tubig ug kuryente, ug gipugngan ang pagsulod sa hinabang ug uban pang serbisyo. Kalambigit kini sa planong pagtukod sa erya sa Joint Training Complex sa mga tropang Pilipino ug Amerikano.

Sumala sa mga lumad, wala gikuha ang ilang free, prior and informed consent para niini. Papahawaon ang mga residente sa 18,000 ka hektaryang kayutaan sa military complex sa mga barangay sa Santa Juliana, O’Donnel (Patling), ug Santa Lucia.

Samtang, padayon ang BCDA sa pagguba ug paghimo og mga dalan nga midaot sa mga umahan, yutang kabilin, ug kinaiyahan para sa New Clark City. Gilauman sa mga Aeta nga mas mosamot pa kabangis ang pagpangpahawa tungod kay kabahin sa pagpalapad niini ang pagtukod sa US og usa ka economic security zone nga adunay “artificial intelligence hub,” mga data center ug uban pang imprastruktura sa gambalay sa inisyatibang Pax Silica.

Niadtong Hulyo 14, mismong ang US Embassy sa Pilipinas ang nag-anunsyo sa pagbisita ni US Ambassador Lee Lipton sa lugar nga pagatukoran sa maong mga proyekto sa economic security zone. Ang maong sona tapad lamang sa Joint Training Complex ug kabahin sa mga military ug economic hub sama sa Subic Ammunition Factory ug Agila Shipyard, Basa Airbase, Fort Magsaysay Military Reservation, ug APECO Defense Hub.