Walay hunong ang mga paglapas sa tawhanong katungod sa Armed Forces of the Philippines (AFP) taliwala sa kaylap nga militarisasyon sa mga yunit niini sa kabanikanhan. Samtang adunay mga operasyong kombat ug militar nga pag-okupar niini, natala ang mga kaso sa pagpatay, pagkampo sa mga sentrong syudad, pagpangharas ug pagpamig-ot sa mga residente sa mga barangay sa Occidental Mindoro, Northern Samar, ug Sultan Kudarat.

Sa Occidental Mindoro, gipatay sa 203rd IBde ang manggugubat sa Bagong Hukbong Bayan (BHB)-Mindoro (Lucio de Guzman Command) nga si Anhing Ingayan Da-it (Ka Oca) niadtong Hulyo 9 sa Sityo Santo Cristo, Barangay Lourdes, Magsaysay. Buhi nga nadakpan sa mga sundalo ang samdan nga si Da-it human ang usa ka engkwentro. Imbes nga arestuhon ug tambalan isip pagtahod sa iyang mga katungod, walay pagpanagana nga gipatay siya sa mga pasistang berdugo. Human niini, gipugngan sa militar ang lihok ug mga aktibidad sa mga residente sa komunidad.

Sa Northern Samar, gipailalom sa interogasyon sa 19th UB ug 43rd IB ang duha ka mag-uuma sa lubi sa Barangay Cuenco ug Caputoan sa Las Navas niadtong Hulyo 8. Sa dihang walay nakuhang impormasyon, gipangkulata sila ug gipalisod-lisuran pinaagi sa pagpatuyok hangtod nalipong. Wala dayon sila gibuhian tungod kay wala nakumprima sa mga sundalo ang ilang pagkatawo. Niadtong Hulyo 9, pugos nga gipaadto ang pipila ka mga residente sa Barangay Caputoan sa hedkwarters sa 19th IB sa Barangay Opong, Catubig.

Sa Sultan Kudarat, nagkampo ang mga sundalo sa 37th IB, 57th IB, ug 40th IB sa mga barangay sa Hinalaan, Datu Wasay, ug Sangay sa Kalamansig. Human ipahigayon ang operasyong kombat nga gidak-ong brigada niadtong Mayo, giokupar nila ang mga komunidad sa pasumangil nga community support program operation.

Samtang nagkampo, gidid-an sa mga sundalo ang mga residente sa pag-adto sa lasang aron tan-awon ang ilang mga lit-ag (alang sa baboy ihalas ug usa) nga ilang alternatibong panginabuhian. Nagtakda usab sila og oras sa pag-adto sa mga mag-uuma sa umahan. Nagpatawag usab ang mga sundalo og “pulong-pulong” aron hulgaong kasuhan ang mga residente nga motabang sa BHB. Gipatawag usab sa mga sundalo ang pamilya sa gidudahang mga pultaym nga Pulang manggugubat ug gihulgang prisuhon sulod sa duha ka tuig.

.