Nakighiusa ang mga nasudnon-demokratikong grupo sa mga Pilipino sa welga sa mga mamumuo sa C&H Sugar Refinery sa Crockett, Contra Costa County, California.

Ang C&H (California & Hawaii) Sugar gipanag-iyahan sa American Sugar Refining Group nga maoy pinakadakong tigproseso ug tigbaligya sa asukal gikan sa tubo sa tibuok kalibutan, lakip na ang gikan sa Negros Island. Usa kini sa mga korporasyong adunay monopolyo sa asukal sa US. Miganansya ang kumpanya og halos $1.6 bilyon gikan sa pag-eksport og barato nga wala pa maproseso nga asukal.

Niadtong Hulyo 15, nagwelga ang kapin 100 ka mamumuo sa C&H Sugar isip pagkundena sa kontra-mamumuo nga plano sa kumpanya. Kabahin sila sa International Longshore & Warehouse Union Local 6.