Kasado na ang protesta batok sa ikalimang SONA o state of the nation address ni Ferdinand Marcos Jr sa Hulyo 27. Sa maong adlaw, 20,000 ka pulis ang giandam sa estado aron pugngan ang mga raliyista nga makaduol sa Kongreso diin sigurado nga ipasigarbo ni Marcos ang kunohay mga “kadaugan” sa iyang rehimen.

Sa naglabay nga mga adlaw, gipahigayon sa nagkalain-laing grupo ang pagbutyag sa tinuod nga kahimtang sa katawhan taliwala sa grabeng krisis sa pangabuhian. Giduso sa mga pambansa-demokratikong organisasyon nga kabahin sa Bagong Alyansang Makabayan (Bayan) nga ubos sa paghari ni Marcos, dili lang naglisod ang mga Pilipino, gibutang pa niini ang katawhan sa peligro tungod sa pagpaka-itoy niya sa imperyalismong US ug pagyukbo niya sa presidente niini nga si Donald Trump. Matud sa Bayan, samot nga gihikot ni Marcos ang nasud sa mga palisiya sa US ug giguyod ang katawhan sa imperyalistang panagbangi taliwala niini ug China.

Gimakmak niini ang rehimen sa paghilom sa pag-atake sa US sa Iran, nga nagdala og grabeng kagubot sa suplay sa lana ug nagpasaka sa presyo sa hapit tanang palitonon sa tibuok kalibutan. Grabe ang epekto niini sa katawhang Pilipino nga daan nang naglisod tungod sa kamahal sa presyo sa mga palitonon ug balayronon sa serbisyo, ug nakalansang nga mga suholan ug sweldo. Gibalewala nila ang tubag nga ayuda ni Marcos nga hilabihan kagamay ug limitado. Kini samtang gihatagan niya og kagawasan ang mga kumpanya sa lana ug mga pribadong kumpanya sa yutilidad nga patas-an pa ang singil sa mga batakang serbisyo.

Samtang, nagsugod na ang pagtaral alang sa impeachment ni Sara Duterte sa Senado. Tataw gikan sa unang adlaw hangtud sa katapusan ang panagbangi sa mga senador. Dala sa mas dakong pundok ang adyenda sa grupong Marcos nga babagan si Duterte nga makadagan sa 2028, samtang ang mas gamay nga grupo gihimo ang tanan aron langanon, idiskaril ug sa ulahi hukmang walay sala si Duterte sa iyang mga krimen. Nakalantaw kanila sa ilang panagbangi ang katawhan nga ang tinguha mao ang makita ug madungog ang mga ebidensya sa kasal-anan ni Duterte ug masilotan siya sa mga kasong korapsyon ug pagluib sa pagsalig sa publiko.

Dungan niini, padayon nilang gisingil si Marcos isip anaa sa kinatumyan sa korapsyon sa palpak ug ghost nga mga proyektong flood control, nga kunohay gibutyag niya sa iyang naglabay nga SONA.