Labaw pang nikunhod ang panginabuhi sa katawhang Amerikano ug dugang nga nag-antos tungod sa nagkakusog nga paglabyog sa pasismo sa reaksyunaryong estado sa US nga girepresentahan ni Donald Trump. Sa samang higayon, nagkagrabe ang walay pugong nga pakiggubat ug interbensyon sa imperyalismong US sa nagkalain-laing bahin sa kalibutan.

Bisan sa gimanipula nga datos sa gubyerno sa US, natala kaniadtong Nobyembre 2025 ang pinakataas nga tantos sa disempleyo (4.5%) gikan 2021. Samtang naa sa 10.6%    ang tantos sa kakabus sa nasud niadtong 2024.

Ubos sa pagpangulo ni Trump, nabusog sa superganansya ang dagkong korporasyong Amerikano sa pinansya, lana, paghimo og sakyanan, mga armas, tambal, elektronikong kahimanan, ug uban pa. Samtang, walag tuo ang iyang pagpatuman sa mga palisiya ug lakang nga ultra-tuo, rasista, pasista, kontra-demokratiko, kontra-imigrasyon, kontra-kababayen-an, kontra-LGBT, ug ultra-nasyonalista.

Atubangan sa nagkagrabeng krisis sa ekonomiya ug pulitika, nagkahiusa ug naglihok ang katawhang Amerikano alang sa ilang katungod ug kaayohan. Usa sa mga pulitikanhong pwersa sa pagpanday sa hut-unganong pakigbisog sa katawhang Amerikano ang Freedom Road Socialist Organization (FRSO).

Ang FRSO usa ka nasudnong organisasyon sa mga rebolusyonaryong nagsulong sa sosyalismo sa US. Nakigbisog kini alang sa katilingbanong hustisya ilabina alang sa mga mamumuo, mga dinaugdaog nga katawhan ug nasyunalidad. Aktibo usab ang grupo sa mga pakigbisog alang sa mga katungod sa mga imigrante, kabatan-onang-estudyante, ug kampanya batok sa gubat. Nagpalig-on kini sa tinguha nga matukod ang usa ka partido komunista nga gigiyahan sa Marxismo-Leninismo.

Pagdapat sa pangmasang pakigbisog

Sa pakighinabi sa Ang Bayan, gipahayag sa FRSO nga    mahinungdanon sa materyalistang pagtasa sa kahimtang sa masa ang pag organisa sa hut-ong mamumuo ug dinaugdaog nga mga komunidad. Matud niini, kinahanglang masayran ang ilang kahimtang ug kung unsa ang ang-ang sa ilang kaandam sa pag-usab sa ilang kahimtang. “Kini ang pundasyon sa pagdapat sa linyang masa ug paglunsad og dagkong mga kalihukan,” sumala sa FRSO.

Matod niini, sa han-ay sa mga unyon, nga organisado nga mga seksyon sa hut-ong mamumuo, sentro sa pagpalihok niini ang suholan ug kahimtang sa pamuo. Basehanan usab sa pagpalihok ang nasinati nga diskriminasyon sa mga mamumuo sa nasyunalidad ug kinatawhan. “Amo usab gisusi ang gibati sa masa pinaagi sa katilingbanong pakisusi—sa pakighinabi namo kanila,” gipaambit sa grupo.

Gitun-an sa FRSO ang partikular nga mga kinaiya sa matag sektor sa matag erya sa pamuo. Pananglitan, mahinungdanong leksyon ang lain-laing mga balaod nga naglungtad sa 50 ka estado nga naglangkob sa mga unyon sa pampubliko nga sektor. “Kinahanglan namong masabtan kini aron mapangulohan ang unyon,” matod sa grupo.

Gipaambit usab sa FRSO ang lisud nga pagsumpay sa ubang mga unyon tungod kay dili sila andam nga mobarog batok sa mga pag-atake sa hut-ong mamumuo. “Kinahanglan namo makigbangi aron ibutang sa pwesto ang kalihukang mamumuo sa basehanan sa hut-unganong pakigbisog,” matod pa nila.

Gawas sa sektor sa pamuo, gipahibalo sa FRSO nga adunay gilunsad nga mga pakigbisog ug kampanya sa han-ay sa mga dinaugdaog nga nasyunalidad, kababayen-an, LGBT, ug uban pang sektor. Usa sa mga gipangulohan niining kampanya ang pagbatok sa Immigration and Customs Enforcement (ICE) ug dinaghang deportasyon.

“Dugay nang nakagamot ang FRSO sa kalihukan alang sa katungod sa mga imigrante sa US, nga naghatag kanamo og maayong bentahe para pangulohan ang mayor nga mga kalihukan batok sa ICE ug adyenda sa dinaghang deportasyon ni Trump,” ingon sa FRSO. Tungod niini, giingong daghan ang nakaamgo nga dili lamang kini rasista ug dili makatarunganon, kun dili monopolyo-kapitalistang pagdaugdaog nga nasinati sa isig ka mamumuong Amerikano ug imigrante.

Pakighiusa sa mga pwersang kontra-Trump

Dakong hagit sa pakigbisog sa katawhang Amerikano ang langkob ug kakusog sa mga pag-atake ni Trump. “Daghan ug kaylap kaayo, maong nahimong imposible ang pagpalambo sa mga kampanya o pakigbisog niining tanan,” sumala sa FRSO. Apan, matod sa grupo, labing maayong kahimtang alang sa rebolusyonaryong sama nila nga mosulong ug magpalig-on ang maong nagkagrabeng mga kontradiksyon sa US.

“Nagpalambo kami sa usa ka halapad nga prente batok sa adyenda ni Trump,” matud sa grupo. Nagpasabot kini nga angayang andam ang FRSO nga makigtinabangay sa lain-laing pwersa lakip na ang mga dili mauyonan niini sa pulitika ug ideolohiya. “Sa ingon, giablihan ang dalan nga maabot ang minilyon nga masa.”

Sa kagrabe sa mga palisiya ug lakang sa rehimeng Trump, minilyon nga mga Amerikano ang nagmartsa sa kadalanan sa miaging duha ka tuig aron batukan kini. Giingong tinguha sa FRSO nga pakusgon ang pakigbisog hangtod mahimong “ungovernable” o dili na madumala ni Trump ang US.

Pagpalig-on sa kontra-imperyalistang pakigbisog

Gituman usab sa FRSO ang katungdanan niini nga makighiusa sa katawhan sa tibuok kalibutan sa pagpakusog sa kontra-imperyalistang pakigbisog sa pusod sa imperyalismo. Nagtuo ang grupo nga gikan sa Palestine hangtud sa Pilipinas, ang tanang gidaugdaog nga katawhan sa kalibutan ug ang hut-ong mamumuong Amerikano adunay komon nga kaaway: ang imperyalismong US. “Maong seryoso namong gituman ang katungdanan nga makigbisog batok sa imperyalismong US,” matod nila.

Sa daghang mga syudad sa US, nangulo ug naglihok ang mga kadre sa FRSO sa mga organisasyong masang kontra gubat nga padayon nga nagkakusog. Aktibong nagpalihok ang FRSO batok sa pakiggubat ug interbensyon sa US sa Venezuela, Iran, ug Cuba. “Kinahanglang ig-on ang maong komon nga kaaway, ug kini ang praktikal nga pagdapat sa proletaryong internasyunalismo,” sumala sa FRSO.

Gipaambit sa grupo nga dako og natampo ang pagpangulo niini sa mga kontra-imperyalistang pakigbisog sa paningkamot niini sa pagtukod sa partido. Daghang bag-ong kadre ang narekrut gikan sa pinakaabanteng lider sa kalihukang masa niini, ingon sa grupo.

“Adunay daghang mga pagsulay, apan daghan usab ang mga posibilidad,” matud sa FRSO.