Gipabuthan sa Bagong Hukbong Bayan (BHB)-Central Negros (Leonardo Panaligan Command) ang 7-katawong tim sa 62nd IB sa Sityo Balingos, Barangay Hinakpan, Guihulngan City, Negros Oriental niadtong Hulyo 1 sa hapon. Usa ka sundalo ang napatay, samtang tulo ang nasamdan. Lima ka metro ang gilay-on sa mga Pulang manggugubat sa pasistang pwersa sa dihang ila kining gipabuthan.

Ang tropa sa 62nd IB nga giigo sa BHB nagsilbing blocking force sa pipila pa ka tropa nga nagpahigayon og kampanyang pagliyok ug pagpuo sa yunit sa BHB. Nagamaniobra pagawas sa pag-ensirkulo ang yunit sa BHB sa dihang namatikdan nila ang gamay nga yunit sa militar.

“Aron tabunan sa militar sa ilang kaulawan, tuyo nilang gitago sa publiko ang ilang kaswalti sa nahitabong panagsangka,” matud ni JB Regalado, tigmababa sa yunit sa BHB. Sumala sa yunit, kusog nga laparus sa militar ang pag-atake sa BHB ilabi na nga lapad ang langkob sa focused and sustained military operations sa Central Negros.

Samtang, gipatuman sa Special Partisan Unit (SPARU) sa BHB-Northern Negros (Roselyn Jean Pelle Command) ang silot kamatayon batok sa ahenteng militar nga si Jerome Ceballos, 59 anyos, sa Sityo Singko, Barangay Gawahaon, Victorias City, Negros Occidental niadtong Hulyo 10. Nakumpiska gikan kaniya ang usa ka .45 nga pusil.

Ang aksyong silot subay sa kamandoan sa lokal nga rebolusyonaryong hukumang bayan human mapamatud-ang sad-an si Ceballos sa nagpatung-patong nga mga krimen batok sa rebolusyon ug sa masang Negrosanon. Sa imbestigasyon sa rebolusyonaryong hukmanan, napamatud-ang espiya siya sa Intelligence Service of the Armed Forces of the Philippines (ISAFP). Gitahasan siya sa militar nga makig-alayon sa rebolusyonaryong kalihukan, magpakaaron-ingnong alyado, ug magpaniid sa mga lihok sa BHB sa erya.

Apil sa iyang mga krimen ang nahitabong masaker sa Negros 19 niadtong Abril 19 sa Barangay Salamanca, Toboso. Gipatay sa 79th IB sa masaker ang 10 ka Pulang manggugubat sa BHB-Northern Negros ug siyam ka indibidwal nga dili armado. Responsable usab si Ceballos sa pagdagit, pagtortyur ug pagpatay sa militar ug pulis kang Nonoy Ponteras (Ka Jojo), upisyal sa National Democratic Front-Negros, ug istap nga si Marisa Pobresa (Ka Kim) niadtong Marso 2025.