Bag-ong ang-ang sa nasudnong pagpanglupig ang ginasinati sa katawhang Pilipino ubos sa rehimeng US-Marcos. Kakunsabo ang itoy nga presidente nga si Ferdinand Marcos Jr, misamot kahugot ang pagtuok sa imperyalismong US sa Pilipinas. Misamot kagrabe ang paggamit sa imperyalismong US sa Pilipinas sa pagpangandam ug pagpanghulhog og gyera batok sa kaaway niining China, ang pagpangawkaw niini sa kinaiyahan sa Pilipinas ug pagduso sa pasistang pagpamig-ot sa katawhan. Kinahanglang hugot nga magkahiusa ang katawhang Pilipino aron suklan ang imperyalistang gubat ug pagpangawkaw, ug iluwas ang nasud sa seguradong katalagman ug dugang nga pag-antos.

Magpamulong si Marcos sa iyang ikalimang state of the nation address (SONA) taliwala sa nagkagrabeng krisis sa ekonomiya ug pasismo. Moatubang siya sa mga sama kaniyang korap, hakog ug busog nga dinastiyang nagrepresenta sa mga nagharing hut-ong. Pagalunuron sa ilang mga kusog nga pakpak ang mga mulo sa masang anak-sa-buhat sa kabanikanhan ug kasyudaran, nga nag-ilaid sa kalisod taliwala sa pagsaka sa presyo sa lana, pagkaon ug uban pang palitonon. Nikunhod ang ang-ang sa ilang pamuyo bisan pa daw kabaw silang tibuok adlaw nga nagtrabaho, samtang busog sa bahandi ang dagkong burgesya kumprador, agalong yutaan ug burukrata kapitalista.

Usa na si Marcos sa pinakamasinugtanon sa mga itoy sa imperyalismong US sa malakolonyal nga kasaysayan sa nasud. Iyang giabri ang nasud sa paghari sa pwersang militar sa US. Gitugutan niya ang mga base militar niini, ang pagpahimutang sa libu-libong tropang Amerikano, pag-istak sa ilang mga misayl, drone ug uban pang kahimanang iggugubat, ug walay katapusang paggamit alang sa pag-ensayo sa gubat.

Ginapasigarbo ni Marcos ang soberanong katungod sa nasud sa West Philippine Sea, apan wala niya tagda ang nakadunggo nga dagkong aircraft carrier ug barkong nabal sa US, uban ang pwersang militar sa Japan, sa kadagatan sa nasud. Wala siya miprotesta sa dihang gibutang sa peligro sa US ang kinabuhi sa minilyong Pilipino nga giagian sa gipalupad nga Tomahawk misayl gikan Leyte hangtud Nueva Ecija. Kapin 500 ka operasyon ang ginapahigayon sa US sa Pilipinas, nga magpalapad sa paggamit sa mga sibilyang pasilidad alang sa tinguhang militar, lakip ang mga dungguanan sa Cagayan de Oro ug Cebu, dipo sa lana sa Davao, ug tugpahanan sa Sangley Point sa Cavite. Pang-ilad ang ginasulti nga alang sa “humanitarian and disaster response” kini, kay pipila na ka kalamidad ang miagi nga wala silay gihatod nga tabang sa mga biktima. Hinuon, perwisyo ang ilang hatod sa masa bisan asa ug matag higayon nga mag-ehersisyong militar.

Sama sa iyang agalon, buta nga nagpaggamit si Defense Sec. Gilbert Teodoro ug mga upisyal sa Armed Forces of the Philippines (AFP) sa militarismo sa US sa Asia, sumala sa estratehiyang “palibutan” ug “pugngan ang paglambo” sa China. Sa duso sa US, tinuoray karong ginapugos ni Teodoro nga maggahin og upat ka porsyento sa GDP (katumbas ang ₱1.17 trilyon) alang sa galastuhong militar, human gipataasan og 12% ang badyet sa AFP karong 2026. Ang militaristang badyet ni Marcos dili alang sa pagpanalipod sa nasud, kundili alang sa pagpangandam sa gyera sa imperyalismong US.

Ginadali karon ang mga lakang aron sugdan ang operasyon sa 1,620-ektaryang Pax Silica “economic security zone” (ESZ) sa US sa New Clark City sa Tarlac ug Pampanga. Dili makahulat si Marcos sa pag-abot sa Nobyembre ni Donald Trump, buang nga presidente sa US, aron abrihan ang ESZ. Plano nga dinhi ibalhin ang mga “data center” sa mga kumpanyang Amerikano nga daghan ang gipasirad-an na sa US tungod kay hakog sa tubig ug kuryente, nga mokaon sa limitadong rekurso sa mga komunidad sa palibot. Plano usab nga itukod ang mga pabrika sa armas, kaabin ang mga kumpanyang Israeli, nga nagpaluyo sa henosidyo batok sa katawhang Palestino sa Gaza, ug mga gyera sa US sa Middle East.

Mobisita sa nasud karong semana si US State Sec. Marco Rubio. Kabahin kini sa duso sa US nga hugtan ang kontrol sa nasud ug ipahamtang ang pagbuot niini sa nagkalain-laing bahin sa kalibutan. Himoon kini human gisugdan pag-usab sa US ang pagpamomba sa Iran sa tinguha nga paluhuron kini sa mga dikta sa US nga kontrolon ang bahanding lana sa nasud. Di pa lang dugay, gianunsyo ni Rubio ang planong pagduso sa US sa pagbungkag sa International Criminal Court, aron hikawan kini og gahum nga mosang-at og kaso, modakop ug motaral sa mga upisyal sa US ug Israel nga nalambigit sa mga krimen sa gubat ug krimen sa katawhan.

Sa pagduut sa mga magtatambag militar sa US, padayong ginapasamot sa rehimeng Marcos ang pasistang atake ug pagpanglingla sa katawhan. Ang bisan kinsa nga mobarog aron ipakigbisog ang nasudnong kagawasan batok sa imperyalismong US ginabansagang “terorista” aron hatagag-katarungan ang armadong pagpangatake ug pagsabwag og terorismo sa estado. Walag tuo ang pagpanghambog nga “napildi na” ang Bagong Hukbong Bayan (BHB) sa nagkalain-laing probinsya. Tuyo niini nga hadlokon ang katawhan ug aghaton ang pagpangawkaw sa mga langyawng kumpanya sa pagmina, plantasyon ug “renewable energy.” Samtang nagdeklarang “insurgency-free,” walay hunong ang mga operasyong militar sa AFP sa mga natarang gerilya sa BHB sa tibuok nasud, sa tinguha nga pugngan ang padayong pagpalapad ug pagpalawom sa gamot niini sa halapad nga masa sa kabanikanhan.

Labing gikinahanglan karon ang maghiusa ang katawhang Pilipino batok sa imperyalistang gyera ug pagpangawkaw, ug batok sa hingpit nga pagsurender sa rehimeng Marcos sa kaugalingnan sa nasud. Kaluwasan ug kaugmaon sa tibuok nasud ang nakataya niining mga pagsukol. Dili angay tugutan nga magmalampuson ang imperyalismong US sa dautang laraw niini nga pabuthon ang gyera, guyoron ang Pilipinas, ug ilogon ang yuta ug bahandi sa nasud alang sa iyang Pax Silica.

Ang pagsukol sa imperyalistang gyera ug pagpangawkaw kabahin sa nasudnon-demokratikong pakigbisog. Kinahanglang dugang palapdon ug pakusgon ang organisadong kusog sa katawhan batok sa imperyalismo, pyudalismo ug burukratang kapitalismo. Sa pagpangulo sa Partido, seguradong moasdang ang armadong pagsukol ug tanang porma sa pakigbisog aron iduso ang nasudnon ug demokratikong tinguha sa katawhan. Taas man ug malisod, ang dalan sa gubat sa katawhan ang bugtong dalan paingon sa paglingkawas sa nasud.