Balik-trabaho para sa 800 ka mamumuo sa San Miguel Corp, giawhag. Naglunsad og lihok-protesta ang mga mamumuo sa San Miguel Integrated Logistics Services Inc. sa San Miguel Corporation niadtong Hulyo 4 aron iduso ang hinanaling pagbalik sa kapin kun kulang 800 ka mamumuo sa kumpanya nga kalit nga gipangtangtang sa trabaho. Gibutang sa “floating status” ang mga mamumuo nga walay suhol ug benepisyo human giingong napildi ang kumpanya sa bidding alang sa mga operasyon niini sa bodega, transportasyon, ug bundling.

CBA sa mga superbisor sa PLDT, madinaugon. Madinaugon nga gihuman sa Gabay ng Unyon sa Telekomunikasyon sa mga Superbisor ang ilang negosasyon sa maneydsment sa PLDT Inc. alang sa bag-ong collective bargaining agreement human maglunsad og serye sa mga lihok-protesta sa tibuok nasud. Nakab-ot sa unyon ang mahinungdanong umento sa suholan ug dugang mga benepisyo bisan pa sa “tinagaw nga paglangay” sa maneydsment sa negosasyon.

Pakigbisog alang sa puy-anan sa UP Diliman. Nagbarikada ang mga residente, mag-uuma ug uban pang sektor sa pagpanguna sa SAMANA Diliman niadtong Hulyo 8 aron pugngan ang pagsulod sa mga tawo-tawo sa unibersidad nga naghulga og demolisyon. Gipanawagan nila ang pagbasura sa UP Sustainable Development Goals (SDG) Park ug negosyo sa pabalay. Samtang, walay nakab-ot sa dayalogo sa grupo sa mga opisyal sa UP niadtong Hulyo 14. Kakunsabo sa unibersidad ug estado ang Megawide Corporation sa maong kontra-kabus nga proyekto.

Hustisya alang sa Talaingod 13. Miadto sa Department of Justice niadtong Hulyo 15 ang mga progresibong grupo, magtutudlo, ug mga tigpanalipod sa tawhanong katungod aron ipanawagan ang pagbawi sa dili makatarunganong hukom batok sa “Talaingod 13.” Sa samang higayon, gideklarar ang maong adlaw nga “Global Day of Action to Defend Talaingod 13” nga gisalmotan sa nagkalain-laing organisasyon sa sulod ug gawas sa nasud.

Pagbasura sa permit sa eksplorasyon sa NLMRC. Nagprotesta ang kapin 80 ka mga lumad sa Kasibu, Nueva Vizcaya sa pagpanguna sa Inter-Tribal Response towards Ecological Development sa mga opisina sa Mines and Geosciences Bureau ug Department of Environment and Natural Resources sa Quezon City niadtong Hulyo 14. Gipanawagan nila ang pagbasura sa permit sa eksplorasyon sa North Luzon Mineral Resources Corporation.

Anibersaryo sa pugos nga pagkawala nilang Fr. Romano ug Ybañez. Nagtapok ang nagkalain-laing progresibong grupo niadtong Hulyo 11 sa Katipunan Street sa Barangay Tisa, Cebu City, sa paghandum sa ika-41 nga anibersaryo sa pugos nga pagkawala nilang Fr. Rudy Romano ug Levi Ybañez. Si Fr. Romano usa ka Redemptorist nga pari ug iladong lider sa mga kabus, samtang si Ybañez usa ka aktibistang mag-uuma ug estudyante.

Alyansa batok sa pagpamig-ot sa kabatan-unang-aktibista sa Mindanao. Gitukod niadtong Hulyo 9 sa Davao City ang alyansang Hands Off Mindanao Youth Activists Network sa mga organisasyon sa kabatan-unan, estudyante, ug mga tigpanalipod sa tawhanong katungod aron batukan ang nagkakusog nga pulitikanhong pagpanggukod, red-tagging, ug pagpamig-ot sa sektor. Giporma ang alyansa human magpagawas niadtong Mayo og “wanted poster” sa mga lider-katan-onan sa Facebook ang Cateel Municipal Police Station.

Grupong Marikeño batok sa militarisasyon. Gitukod niadtong Hulyo 15 ang alyansang Marikeños for Peace and Good Governance isip pagbatok sa nagpadayong militarisasyon sa Marikina City, labina sa mga kabus nga komunidad. Kasamtangang nag-operasyon ug naglunsad og balik-balik nga “community outreach” ang 12th Civil Military Operations Battalion sa Agora Compound, dungan sa Red-tagging, pagpaniid ug pagpamugos sa mga residente nga magtukod og bag-ong organisasyon.