II. PAGSUMA SANG ATON INAGIHAN KAG PAGKUHA SANG MGA REBOLUSYONARYO NGA LEKSYON
Gilayon nga katungdanan naton subong ang mag-analisa kag magsuma sang aton inagihan bilang isa ka Partido. Ang solo nga katuyuan sang pag-analisa kag pagsuma nga ini amo ang pagkuha sang mga rebolusyonaryo nga leksyon, magkilala sang mga kasaypanan kag kahuyangan agud matadlong naton ang mga ini, mapabakod ang kaugalingon kag matukod liwat ang isa ka proletaryo nga rebolusyonaryo nga partido nga ginaubayan sang Marxismo-Leninismo-Kaisipan Mao Zedong.
Sa pagsuma naton sa mga kasaypanan kag kahuyangan, ginatuyo naton nga "magtuon sa mga nagligad nga kasaypanan agud malikawan ang mga ini sa bwasdamlag" kag "bulngon ang ginabatyag agud masagup ang masakiton". Sa syentipiko nga diwa sang Marxismo- Leninismo, nagahimo kita sang pagsaway agud liwat nga tukuron ang Partido sa mas mapag-on nga pundasyon kag tukuron ang rebolusyonaryo nga gahum. Bilang nukleyo sang proletaryo nga diktadurya, dapat magpalig-on ang Partido Komunista sang Pilipinas paagi sa pagpanadlong.
Katluan kag walo ka tuig na subong ang aton Partido pero wala pa sini maangkon ang rebolusyonaryo nga gahum. Ang mga kapaslawan sini dapat maathag nga analisahon base sa Marxismo- Leninismo-Kaisipan Mao Zedong agud makahulag sang nagakaigo ang mga proletaryo nga rebolusyonaryo subong.
Ang pangkabilugan nga balayon lamang sang kasaysayan sang Partido ang maplastar diri agud ipakita ang diyalektiko nga pag-uswag sini. Indi pwede nga sakupon sang pagsuma nga ini ang tanan nga detalye nga mahimo makuha. Masanyog nga talakayan na sang mga kadre sang Partido ang magatigayon sini. Bisan pa, ang ginasaligan naton nga mga dumaaan kag bag-o nga kaupod maid-id na nga nagdiskusyon sining nagligad nga tatlo ka tuig bahin sa mga problema sang Partido.
Sa panugod pa lang dapat na masambit nga sa aton pagsuma may mayor nga konsiderasyon ang pagkapot sa tatlo ka nagapanguna nga armas sang rebolusyon nga Pilipino. Ang mga ini amo ang pagtukod sang partido nga Marxista-Leninista, ang armado nga paghimakas kag ang pungsudnon nga nagahiliugyon nga prente. Sa pagsuma man naton nga ini, pagasakupon naton ang mga patag sang ideolohiya, pulitika, militar kag organisasyon. Sa pagkamatuod, ang daku nga bahin sang pagplastar nga ini matunga sa apat ka aspeto nga ginsambit. Pero, antes kita magkadto sa apat ka bahin nga ini, maghimo kita sang malip-ot nga pagrebyu sa kasaysayan sang Partido Komunista sang Pilipinas.
Party Constitution Bottom
I II III IV V
Back to top
|
