IV. MGA NAGAPANGUNA NGA KASAYPANAN KAG KAHUYANGAN

D. Mga Kasaypanan sa Organisasyon

Sa patag sang organisasyon, nagapanguna nga kahuyangan sang Partido Komunista sang Pilipinas ang indi sini pagtukod sang isa ka organisasyon nga may malapad nga pangmasa nga kinaiya kag nagasakop sang bilog nga pungsod. Sa mga lugar nga natukod ang Partido, indi husto nga gingamit ang kawsa sang demokratiko sentralismo sa pang-organisasyon nga kabuhi sang Partido, nga nagbunga sang mga kasaypanan sang sektaryanismo kag liberalismo, kumandismo kag ikogismo, bangud sa suhetibismo kag oportunismo. Ang pagtukod sang isa ka partido nga may malapad nga pangmasa nga kinaiya nagakinahanglan sang pungsudnon nga sistema sang mga kadre sang partido nga may daku nga masa nga manugsakdag. Sa tama ka budlay nga kahimtangan nga nagaluntad sa Pilipinas, mangin-alamon nga polisiya ang mahinalungon nga pagtukod sang Partido. Ang pagrekrut kag paghanas sa mga kadre dapat magsanto permi sa mga talaksan sang isa ka proletaryo nga rebolusyonaryo nga partido.

Ang partido nga may malapad nga pangmasa nga kinaiya nagakahulugan nga ang mga kadre sang partido may malapad nga masa nga manugsakdag bangud sa paggamit sang husto nga ideolohiya, linya pangpulitika, kag mga prinsipyo kag pamaagi sang organisasyon. Ang Partido Komunista sang Pilipinas makaangkon lang sang malapad nga pangmasa nga kinaiya kon matuod nga mapamunuan sang mga kadre sini ang masa nga mamumugon kag mangunguma sa rebolusyonaryo nga paghimakas. Ginaubayan sang Partido ang rebolusyonaryo nga paghimakas sang masa kag ang paghimakas naman ang nagatuga sang pinakamaayo kag pinakaabanse nga hangaway sang rebolusyon nga nangin mga katapu sang Partido.

Sirado-pwertahan nga kaisipan ang nangin talalupangdon nga tendensya sang liderato nga Crisanto Evangelista. Konsentrado ang hilikuton sang Partido sa kahublagan nga unyon sang mamumugon.

Nagbaskog lang ang Partido sadtong kontra-Hapones nga inaway sang maglunsar ini sang rebolusyonaryo nga armado ng paghimakas kag magpamuno sa masa nga mangunguma. Sadtong 1948, nagbaskog liwat ang Partido sa sulod sang pila ka panahon tubtub nasabotahe sang mga kasaypanan nga adbenturista sang liderato nga Jose Lava ang pag-abanse sang rebolusyon. Ginpakita sang hitabo nga ini nga makaangkon ang Partido sang matuod nga pangmasa nga kusog kon makig-isa ini kag magpamuno sa masa nga mangunguma. Sa malakolonyal kag malapyudal nga pungsod pareho sang Pilipinas, makaangkon sang kusog ang Partido paagi lang sa pagpukaw kag pagpahulag sa masa nga mangunguma santo sa rebolusyon agraryo nga amo ang nagapanguna nga kaundan sang demokratiko nga paghimakas sang pumuluyo. Kon lantawon, ang proletaryo nga rebolusyonaryo nga partido sa Pilipinas makaangkon lang sang malapad nga pangmasa nga kinaiya kon makuha sini ang pagsakdag sang sahi nga mangunguma, labi na sang imol nga mangunguma kag mamumugon sa uma.

Tubtub subong, sobra pa gihapon ang konsentrasyon sang mga katapu sang Partido sa Sentral Luzon kag sa Manila-Rizal. Bisan sa mga nauna nga dalagan sang rebolusyonaryo nga kahublagan sa Pilipinas, wala nagmadinalag-on ang Partido nga palapnagon sang maayo sa bilog nga pungsod ang demokratiko nga rebolusyon sang banwa paagi sa sistematiko nga dispusisyon sang mga kadre.

Sa malawig nga pagkalider niya sang unyon sang mamumugon, nag-angkon si Crisanto Evangelista sang gamay nga pagpakig-angot sa iban pa nga lider sang unyon sa Bisayas. Pero siya mismo, bisan sadtong ulihi nga bahin sang mga tuig 1930, may ilusyon nga kon makontrol sang Partido ang Sentral Luzon, madali na lang masunod ang bug-os nga Luzon; kag kon makontrol sang Partido ang bug-os nga Luzon, madali na nga masunod ang bug-os nga kapuluan.

Sa pagsugod sang kontra-Hapones nga inaway, gintinguhaan nga magpadala sang isa ka grupo sang mga kadre sa Bisayas pero wala ini madayon. Sadtong panahon sang inaway, ang Sentral Luzon ang nangapanguna nga ginpatindugan sang Partido kag Hukbalahap. Bisan sa mahimo malab-ot nga rehiyon pareho sang Nabagatnan nga Katagalugan, wala makuha sang Partido ang liderato kag inisyatiba sa kontra-Hapones nga inaway halin sa kamot sang mga yunit sang gerilya nga maki-Amerikano. Bisan natapos na ang inaway, wala gilayon kag pursigido nga ginkonsiderar ang halambalan sa pagpadala sang mga kadre sa iban pa nga isla.

Sa pagbuylo lang sang armado nga paghimakas sa idalum sang liderato nga Jose Lava napadala ang mga kadre sang Partido sa Cagayan Valley, Bikol, Panay, Ilokos kag Mindanao agud tukuron ang Partido kag hangaway. Pero maathag nga wala natukod sang mga kaupod nga nagsugod nga ini ang Partido kag hangaway sa mapag-on nga pundasyon sa kubay sang masa. Wala sila makaangkon sang nagakaigo nga panahon agud himuon ini bangud wala makaplastar ang liderato sang Partido sang husto nga linya pangpulitika. Ang nagapanguna nga polisiya sang madalian nga kadalag-an sa militar wala makahatag sa mga kadre sang bastante nga panahon nga tukuron ang Partido, ang hangaway kag ang nagahiliugyon nga prente sa mas daku kag pungsudnon nga sakop kag pauswagon ang tanan nga rekisito para sa demokratiko nga gahum sang banwa.

Sa bug-os nga panahon sang liderato nga Jose Lava, nagpabilin nga wala matukod ang isa ka pangmasa nga organisasyon. Gindumalahan kag ginpadali lang sang liderato nga ini ang pagkaguba sang mga daan nga yunit sa gwa sang Sentral Luzon. Bisan sa ulihi nga bahin sang 1950, sang matukod na ang mga legal nga pangmasa nga organisasyon sa pagpamuno sang Partido, indi man ini pursigido nga nagpaninguha nga magtukod sang mga legal nga pangmasa nga organisasyon bilang pamaagi sa pagpalapad sang Partido. Pagkaligad sang 1960, sa nagapanguna nga inisyatiba sang mga bag-o kag liwat naghulag nga dumaan nga katapu sang Partido, amo pa lang kag magpangahas ang Partido nga isulong liwat ang nagapanghamot nga rebolusyonaryo nga pangmasa nga kahublagan. Sa subong, nagasugod na mag-angkon ang Partido sang gamay nga kadalag-an sa pagtukod sang Partido nga may malapad nga pangmasa nga kinaiya kag may pungsudnon nga sakop.

Paagi sa pungsudnon nga nagahiliugyon nga prente, ang proletaryo nga rebolusyonaryo nga partido nga nagatigayon sang rebolusyon agraryo, nga may lubos nga pagsakdag sang ginahimuslan nga sahi nga mangunguma, makapalapad pa gihapon sang suporta paagi sa pagpakig-alyansa sa mga dugang nga rebolusyonaryo nga pwersa pareho sang petiburgesya sa syudad kag pungsudnon nga burgesya.

Sa Pilipinas, una nga naagyan sang Partido ang polisiya sang nagahiliugyon nga prente sang sumpungon sini ang pasismo sa panahon sang Prente Popular. Pero sa panahon nga ini, nagsugod na ang pagkamudmod sang rebolusyonaryo nga balatyagon sa tuso nga pamaagi sa mabaskog nga impluwensya sang petiburgesya kag burgesya sa sulod sang Partido.

Pagkatapos sang inaway, pormal nga gintukod ang Democratic Alliance kag gintukod ang pormal nga organisasyon sang nagahiliugyon nga prente. Pero ang alyansa nga ini nagserbi lang nga suporta sa Tuo nga oportunismo kag naghatag sang kahigayunan sa burges nga personahe nga makasaka sa pamunuan. Ginpas-an sang Partido ang trono para sa ila sa sulod sang pila ka panahon tubtub nagdali-dali palagyo sang magsingki ang armado nga paghimakas.

Sa panahon sang liderato nga Jesus Lava, wala sang natukod nga matuod nga nagahiliugyon nga prente bangud wala sang natukod nga mabaskog nga hangaway sang banwa kag mga legal nga pangmsa nga organisasyon sa pagpamuno sang Partido. Sa panahon nga ginpukaw ni Claro Mayo Recto ang petiburgesya sa syudad kag pungsudnon nga burgesya agud magpakigbahin sa kahublagan nga kontra-imperyalista, wala lubos nga nahimuslan sang Partido ang kahimtangan bangud sa likidasyunista nga polisiya nga labi nga nakaupang kag nagbutang sa katalagman sa pang-organisasyon nga kabuhi sang Partido.

Sa madamo nga kahigayunan, wala maangot sang Partido ang legal kag ilegal nga paghimakas sa hilikuton sini sa organisasyon. Sang una nga gindeklarar nga ilegal ang Partido matapos ini matukod, wala sang likom nga ikaduha nga linya sang liderato nga makapadayon sa legal kag ilegal nga hilikuton sang Partido. Sa pagsugod sang inaway, ginbuslan sang ikaduha nga linya sang liderato ang nalupog nga linya pero ang ikaduha nga linya sa kabilugan daan na nga nahamulag sa hilikuton pangmasa bangud sa limitado lang nga hilikuton pangpulitika sini sa kubay sang mga elemento nga petiburges sa syudad.

Bunga sang mga sala nga linya sa pulitika nag-angkon sang malubha nga kasaypanan sa organisasyon. Wala mapatingkad ang demokratiko sentralismo agud makahimo sang mga husto nga desisyon.

Ang pag-uswag sang burges nga reaksyonaryo nga linya sang mga Lava baraghal nga paglapas sa demokratiko sentalismo. Ang makakilibot nga pagsundanay sang mga liderato nga Lava bunga sang mga burges nga maniobra nga masami kabangdanan sang pagpangluya kag demoralisasyon sa kubay sang mga kadre sang Partido sa sulod sang masobra katluan ka tuig. Ang liberalismo sa pinakabulgar nga porma pareho sang nepotismo kag paboritismo ginpaluntad sa pagtalana kag sa pagpili ukon pagboto sa mga nagapamuno nga pusisyon.

Liberalismo ang nangin tanda sang pag-isa sang Partido Komunista sang Pilipinas kag Partido Sosyalista. Ang mga katapu sang Partido Sosyalista direkta nga ginbaton sa Partido Komunista sang Pilipinas nga wala sang pagkonsiderar sa kakinahanglanon nga mangin Marxista-Leninista sa ideolohiya. Ang una kag ikaduha nga linya sang liderato nag-angkon sang liberal nga aktitud sa organisasyon sang Partido sang magtum-ok sila sa pangsyudad kag legal nga hilikuton pangpulitika antes maglupok ang kontra-Hapones nga inaway.

Ang daku nga bugso sang liberalismo kag legalismo nga gintiglawas sanday Vicente Lava, Jorge Frianeza kag Pedro Castro pagkatapos sang kontra-Hapones nga inaway may diyalektika nga angot sa indi husto nga tendensya sang Tuo nga oportunismo bisan antes pa ang inaway. Ginsakdag ni Jorge Frianeza ang lubos nga pagbungkag sa hangaway sang banwa kag ang "pagpakighiliugyon nga prente" sa reaksyonaryo nga pagdumalahan nga Roxas; ginsakdag naman ni Pedro Castro ang pagtukod sang "pangmasa nga partido" para sa parlamentaryo nga paghimakas kag ang pagdula sa ilegal nga hilikuton sang Partido. Sa sulod sang Democratic Alliance, nagluntad ang liberal nga polisiya nga nagtugot sa pagpangibabaw sang mga personahe nga burges. Isa ka hulag mismo sang liberalismo ang pagpahanugot sa Democratic Alliance nga magtungod sang sentral nga katungdanan sa pangpulitika nga paghimakas sang masa.

Sektaryanismo ang nangin nagapanguna nga kasaypanan sa organisasyon sang liderato nga Jose Lava samtang liberalismo ang nagapangaduha nga kasaypanan sini. Bangud nahamulag sa mga kongkreto nga kahimtangan sa kaumhan, nangin kumandista ang liderato nga ini sa pagpapanaog sang mandu. Sa kubay sang mga nagahimakas nga pwersa sa kaumhan, nagluntad ang mga sektaryo nga pagpang-abuso sa likod sang islogan nga "Bolsebisasyon". Ang mga kontradiksyon sa kubay sang pumuluyo kag ang magagmay nga kasaypanan sa sulod sang Partido ginkabig nga kontradiksyon sa tunga sang pumuluyo kag kaaway. Samtang kinahanglan ang polisiya sang pagkumbinse kag paghatag ligwa sa madamo nga kahigayunan, ang mga nakasala nga katapu sang Partido kag Pula nga hangaway ginpapanaugan sang mga pinakapintas nga silot. Ginpaluntad man ang sektaryanismo sa syudad kaangot sa pungsudnon nga nagahiliugyon nga prente. Bunga sang kapaslawan sang Democratic Alliance, ginbalewala gilayon sang liderato nga Jose Lava ang isa ka malig-on nga polisiya sang nagahiliiugyon nga prente sa mga nahanunga nga pwersa.

Bisan sektaryanismo ang nangin nagapanguna nga kasaypanan sa organisasyon sang liderato nga Jose Lava, ginpabilin sini ang liberalismo sa pagpili sa matag-as nga pusisyon kag sa pagpatapu sa Partido sang mga paryente, personal nga abyan kag kasimanwa sang pamilya nga Lava nga wala man ginpaagi sa pagtilaw sa rebolusyonaryo nga pangmasa nga paghimakas. Ang natabo, sa esensya kaangot sang liberalismo ang polisiya sang madasigan nga rekrutment sa syudad sang Manila, polisiya nga nagtalana sang pagrekrut sang isa ka gatos ka libo ka katapu sa sulod sang duha ka tuig kag naghatag alagyan sa pagsulod sa Partido sang mga ahente sang kaaway. Ang ginbasehan sang polsiiya nga ini amo ang personal nga pagsalig. Isa ka makahalam-ot nga halimbawa sang liberalismo ang pagpili kay Taciano Rizal sa tama ka importante nga pusisyon base sa makitid nga konsiderasyon nga angkon niya ang apelyido sang burges nga pungsudnon nga baganihan nga si Jose Rizal.

Sa kabilugan, gin-angkon sang liderato nga Jesus Lava sa pila ka panahon ang sektaryanismo sang liderato nga Jose Lava. Sa sulod sang pila ka tuig, ang liderato sang Partido nga gintiglawas ni Jesus Lava naggamit sang mga sektaryo nga pamaagi sang pagpamahog agud pasundon ang mga katapu sang Partido kag madamo ang mga hitabo nga may mga kadre nga ginpatay sa manabaw nga kabangdanan.

Sang magpangibabaw ang Tuo nga oportunismo, ginpaluntad sang liderato nga Jesus Lava ang liberalismo sa pagbatiti sang mga katapu sang Partido nga ginsaway sini nga nagpakigbahin sa rebolusyonaryo nga pangmasa nga paghimakas. Ang nagapanguna nga linya sang parlamentaryo nga paghimakas nadayunan na nga nagpakalulong sa likidasyunismo. Bangud sa pagpalagyo sang mga lider sang Partido halin sa kaumhan padulong sa syudad, napabay-an ang mga organisasyon sang Partido sa kaumhan kag nagtuhaw ang makatalagam nga likidasyunista nga polisiya nga "isa ka pila" nga amo ang nagguba sa kolektibo nga pang-organisasyon nga pagpangabuhi sang Partido, nag-utod sa mga linya sang responsibilidad sa tunga sang mataas nga organo kag manubo nga organo kag pagkahamulag sang Partido sa pumuluyo.

Wala sang nabilin sa liderato nga Jesus Lava luwas sa pangkabilugan nga sekretaryo; nagaisahanon ini nga naghimo sang mga desisyon, nagpagwa sang mga "political transmission" halin sa isa ka likom nga kwarto kag nagpili sang mga ibutang sa matag-as nga pusisyon sa Partido base sa mga pinamilya kag personal nga relasyon. Sa ulihi nga bahin sang mga tuig 1950, ang mga kahigayunan sa liwat nga pagtukod sang mga yunit sang Partido kag hangaway sa kaumhan lubos nga ginpalampas kag bisan ang parlamentaryo nga paghimakas indi mahipid nga natigayon. Sa una nga bahin sang mga tuig 1960 lang natigayon sang mga katapu sang Partido nga hilway sa nahamulag nga liderato sang Partido ang liwat nga pagtukod sang Partido kag pagpabakod sang mga pangmasa nga organisasyon.

Sa kabilugan, ang burges nga reaksyonaryo nga linya sang mga Lava sa patag sang organisasyon amo ang balatian nga liberalismo, likidasyunismo kag dalayon nga paglapas sa demokratiko sentralismo. Dapat ilunsar ang kahublagan sa pagpanadlong agud dulaon ang mga ugat sang reaksyonaryo nga burges nga linya sang mga Lava sa ideolohiya, pulitika kag organisasyon agud liwat nga matukod ang Partido santo sa Marxismo-Leninismo-Kaisipan Mao Zedong. Ang reaksyonaryo nga burges nga linya sang mga Lava mahimo pa magpadayon kon wala sang hugot sa buot nga pagpaninguha nga sikwayon sa patag sang organisasyon ang mga ahente sini sa ideolohiya kag pulitika sa sulod sang Partido.

I II III IV V
Back to top