V. TATLO KA NAGAPANGUNA NGA HILIKUTON

B. Armado nga Paghimakas

Isa ka pundamental nga katungdanan sang Partido Komunista sang Pilipinas ang maghatag sang proletaryo nga rebolusyonaryo nga pagpamuno sa sahi nga mamumugon. Ang demokratiko nga rebolusyon sang banwa nga ginalunsar sang aton Partido sa esensya isa ka inaway sang mangunguma. Ang paghimakas para sa duta sang malapad nga kadam-an sa aton pumuluyo ang nagapanguna nga kaundan sang demokratiko nga rebolusyon sang banwa nga ginatinguhaan naton nga matigayon sa aton malakolonyal kag malapyudal nga pungsod. Ang paghilway sa sahi nga mangunguma halin sa pyudal nga pagpanghimulos kag pagpahulag sini bilang nagapanguna nga pwersa sa demokratiko nga rebolusyon sang banwa may makahulusga nga importansya sa rebolusyonaryo nga kadalag-an sang proletaryado bilang nagapamuno nga sahi.

Bangud indi pa mauswagon ka tama ang industriya sa aton malakolonyal kag malapyudal nga pungsod, gamay ang kadamuon sang mga industriyal nga mamumugon. Kon amo, dapat pauswagon sang proletaryado paagi sa Partido sini ang pagpakig-alyansa sa sahi nga mangunguma kag dapat sini pamunuan ang sahi nga mangunguma bilang nagapanguna nga pwersa sang demokratiko nga rebolusyon sang banwa. Bangud ginahimuslan, ang sahi nga mangunguma ang pinakamasaligan nga kaalyado sang proletaryado. Ang daku nga pwersa sini ang makahatag sang makapadaug nga popular nga suporta sa proletaryo nga rebolusyonaryo nga partido. Sa paghatag sang suporta nga ini, ginaseguro sang sahi nga mangunguma ang kadalag-an sang makasahi nga proletaryo nga liderato. Bilang proletaryo nga rebolusyonaryo nga partido, ang Partido Komunista sang Pilipinas dapat panguna nga magsalig sa sahi nga mangunguma agud ilunsar ang armado nga paghimakas kag agawon ang gahum. Ang demokratiko nga rebolusyon sang banwa, sa sandigan, inaway sang mangunguma sa pagpamuno sang proletaryado kag sang partido sini nga ginaubayan sang Marxismo-Leninismo-Kaisipan Mao Zedong.

Sa pagpadulong sa kaumhan, dapat maghimo ang Partido sang husto nga pag-analisa sa sahi kag magsunod sa husto nga makasahi nga linya. Sa aton malakolonyal kag malapyudal nga pungsod, ang problema sang mangunguma ang nagapanguna nga problema sa pulitika kag ekonomiya. Gani, kinahanglan maghimo ang Partido Komunista sang Pilipinas sang maid-id nga pag-analisa sa sahi agud mahangpan sini ang mga problema sa kaumhan agud, sa pagpamuno sa banggianay sang mga sahi sa kaumhan, makilala sini ang matuod nga mga abyan kag mga kaaway sa sahi kag mapahulag ang mga husto nga makasahi nga pwersa nga magsentro sang ila pusil sa kaaway sa sahi.

Ang basehan sang pag-analisa sa sahi amo ang angtanay sang ginahimuslan kag nagahimulos kag ang pag-angkon sang kagamitan sa produksyon. Sa paghibalo sa mga relasyon sang pagpanghimulos maseguro naton ang tindog sa ekonomiya sang tagsa ka sahi ukon saray kag ang santo nga aktitud nila sa pulitika. Paagi sa ila pag-angkon sa mga kagamitan sa produksyon, napabilin sang mga sahi nga manughimulos ang isa ka mahimuslanon nga sistema. Sa kaumhan, ginapabilin nila ang pyudal kag malapyudal nga sistema sang pagpanghimulos. Sa paglunsar sang demokratiko nga rebolusyon sang banwa, ginatuyo sang Partido nga pukanon ang sistema nga ini sang pagpanghimulos paagi sa inaway sang mangunguma batok sa mga pyudal kag malapyudal nga manughimulos. Sa kaumhan, ang nagapanguna nga nagahimulos nga sahi amo ang agalon nga mayduta. Ang sahi nga ini ang panguna nga nagasalig sa pyudal nga pagpanghimulos. Ang agalon nga mayduta ang tag-iya sang mga kadutaan nga ginatrabaho sang imol nga mangunguma nga nagabayad sang arkila sa iya kag ginahimuslan pa sa nagkalain-lain nga pamaagi, pareho sang usura, pagpang-ulipon kag buhis.

Ang saray sang manggaranon nga mangunguma nagapanghimulos man; daku-daku nga bahin sang pangabuhian sini ang ginasalig sa pagpanghimulos, pero natuhay ang manggaranon nga mangunguma sa agalon nga mayduta bangud bisan tag-iya siya sang duta nga bastante para sa iya pamilya, nagatrabaho pa siya. Ang manggaranon nga mangunguma nagahimulos sa suhol sang mamumugon sa uma, pagpaarkila sang sobra nga duta, sobra nga hayup kag kagamitan, kag paagi sa usura kag iban pa nga porma sang pagpanghimulos. Ang nahanunga nga mangunguma may isa ka puna nga duta nga bastante para sa iya pamilya; pero ang kahimtangan niya halin sa bibi sang pagkaputo tubtub sa pagpanag-iya sang puna sang duta nga makasabat sa kinahanglanon sang iya pamilya kag sa pag-angkon sang iban pa nga makuhaan sang kita. Ang mga imol nga mangunguma kag mamumugon sa uma amo ang may kinahanglanon nga magtrabaho para sa mga agalon nga mayduta kag ginahimuslan sang mga ini. Sila ang pinakapigos nga saray sang sahi nga mangunguma kag amo ang pinakainteresado sa demokratiko nga rebolusyon sang banwa kag pinakamasaligan nga kaalyado sang proletaryado. Sila ang kadam-an sang populasyon sa kaumhan sang Pilipinas.

Ang husto nga linya sa kaumhan mapaluntad lamang paagi sa pagpukaw kag pagpahulag una sa tanan sang mga imol nga mangunguma kag mamumugon sa uma, kag paagi sa pagkumbinse kag pagpakig-isa sa mga nahanunga nga mangunguma labi na sa manubo nga nahanunga kag nahanunga nga nahanunga nga mangunguma sa kontrapyudal nga rebolusyonaryo nga nagahiliugyon nga prente. Ang mga manggaranon nga mangunguma, pati na ang mga naandan nga yara sa nagapamuno nga pusisyon sa mga baryo, mahimo nyutralisahon sa padayon nga pagbaskog sang imol nga mangunguma kag mamumugon sa uma. Dapat determinado ang Partido sa pagpukaw kag pagpahulag sa mga imol nga mangunguma kag mamumugon sa uma kag sa pagpataas sang ila prestihiyo agud matungdan nila ang hilikuton sa rebolusyon. Dapat seguruhon sang Partido nga ang isa ka kontrapyudal nga rebolusyonaryo nga komite sa baryo nga kontrulado sang mga imol nga mangunguma kag mamumugon sa uma dalayon na nga magabulos ukon magauyat sa mga "barrio council" nga kontrulado subong sang mga agalon nga mayduta, garuk nga upisyal sang gubyerno kag manggaranon nga mangunguma.

Ang pagpaluntad sa makasahi nga linya sa kaumhan masandig sa pasensyuso nga pagbag-o sang aktitud sang mga kadre sang Partido sa imol nga mangunguma, manubo nga nahanunga nga mangunguma kag mamumugon sa uma. Dapat hanason sang Partido ang mga kadre sini paagi sa rebolusyonaryo nga praktika agud mahangpan nila nga sa tion nga mapukaw kag mapahulag ang mga imol nga mangunguma, manubo nga nahanunga nga mangunguma kag mamumugon sa uma, sila ang pinakamabakod nga manugsakdag sang rebolusyon. Indi kita panguna nga makasalig sa nahanunga nga mangunguma. Ang pangkatilingban nga basehan sang rebolusyon sa kaumhan amo ang imol nga mangunguma, manubo nga nahanunga nga mangunguma kag mamumugon sa uma. Mabaton sang nahanunga nga mangunguma ang liderato sang Partido kon nagasanto ini sa ila interes pero kon magsanto man sa ila interes ang makasahi nga interes sang burgesya, amo man sina ang himuon nila. Sa panahon nga mangin mapintas ang reaksyon, mahimo magduha ang isip sang nahanunga nga mangunguma, kag mahimo pa magtraidor sa hublag. Importante nga itanum sa pensar ang bagay nga ini sa aton hilikuton pangmasa sa kaumhan sa kubay sang sahi nga mangunguma. Indi lamang sa pungsudnon nga demokratiko nga rebolusyon kita dapat panguna nga magsalig sa imol nga mangunguma, manubo nga nahanunga nga mangunguma kag mamumugon sa uma; pagkatapos nga maagaw sang proletaryado ang gahum sa estado kag sa panahon sang transisyon sa komunismo, ang mga saray nga ini ang padayon nga mangin pangkatilingban nga basehan sa konsolidasyon sang diktadurya sang proletaryado.

Dapat magsalig ang Partido Komunista sang Pilipinas sa mga rebolusyonaryo nga base sang mangunguma agud lutuson ang reaksyonaryo nga gahum sang estado sa kaumhan antes agawon ang mga syudad. Masangkad nga ginpakita ni Kaupod Mao Zedong sa iya teorya kag praktika kon paano malikupan ang mga syudad halin sa kaumhan paagi sa armado nga paghimakas sa malakolonyal kag malapyudal nga pungsod. Napamatud-an nga wala sang pagkalutos ang unibersal nga kamatuoran sang paggamit sang kaumhan agud palibutan ang syudad. Pero ara pa ang tumandok nga rebisyonista nga nagasikway sa unibersal nga kamatuoran sang rebolusyonaryo nga teorya nga ini kag labi nga nagahatag tum-ok sa kamaturoan nga ang Pilipians isa ka kapuluan, indi pareho sang Tsina nga may malapad nga duta nga nagaipingay kag daku ang populasyon, sa katuyuan nga palubugon kag taguon ang sandigan nga pag-analisa sa sahi kag diyalektika nga napasulod sa teorya sang paggamit sang kaumhan agud likupan ang syudad.

Unibersal ang teorya sang inaway banwa kag mahimo magamit sa kahimtangan sang Pilipinas. Bangud sa bangian nga pag-uswag sa pulitika kag ekonomiya sa panahon sang imperyalismo, ang mga mahuyang nga angot sang burges nga gahum sang estado masalapuan sa kaumhan. Ang kontrarebolusyonaryo nga hangaway manipis nga nalapta sa bug-os nga pungsod agud ipabilin ang kontrol sa mga nagapanguna nga linya sang komunikasyon kag transportasyon. Ang disposisyon sang pwersa sang kontrarebolusyon magabilin sang pinakamalapad nga lugar sa kaumhan para sa pag-uswag sang inaway sang mangunguma sa pagpamuno sang proletaryado. Sa kaumhan, dapat madalum nga nakaugat ang Partido sa kubay sang masa nga mangunguma agud pauswagon ang nagapanguna nga pwersa sang demokratiko nga rebolusyon sang banwa. Ang mga demokratiko nga pwersa sang pungsod dapat magpauswag kag magtipon sang armado nga kusog sa indi mauswagon nga lugar sa kaumhan kag magtuga didto sang mga pinakaabanse nga teritoryo sa pulitika, ekonomiya, militar kag kultura sa diin malunsar sang hangaway sang banwa ang madugayan nga paghimakas agud maagum ang kabilugan nga kadalag-an sa kontra-rebolusyonaryo nga tropa. Matabo nga mas malapad sang pila ka pilo ang lugar nga mahimo maniobrahan sa kaumhan sang sa kasyudaran. Sa Pilipinas, ang lugar nga maniobrahan sa syudad tama ka kitid para sa armado nga paghimakas. Ang mga syudad sa kamatuoran amo ang teritoryo sang burges nga gahum sang estado antes mapauswag sang demokratiko nga pwersa sang banwa ang ikasarang nga agawon ang mga ini. Ang kontra-rebolusyonaryo nga tropa dapat anay lutuson sa kaumhan. Ang magapaluya man sa burges nga gahum sang estado sa kaumhan amo ang permi nga pagtuhaw sang mga kontradiksyon sa sulod sang kontra-rebolusyonaryo nga kubay. Santo sa kaugalingon sini nga layi sa paghulag, ang ano man nga grupo sa kubay sang kontra-rebolusyon nga nagapangibabaw magapaluntad sang daku nga armado nga kusog sa syudad agud ipabilin ang nabase sa syudad nga gahum pangpulitika sini.

Santo sa Marxismo-Leninismo-Kaisipan Mao Zedong, dapat mag-inisyatiba ang Partido Komunista sang Pilipinas nga ihalin ang sentro de grabidad sini sa kaumhan. Ang tanan nga nauna nga liderato sang Partido sa Pilipinas nag-agi na sang mga kapaslawan nga isa lang ang kinaiya - ang pagsentro sang hilikuton pangpulitika sa syudad sang Manila. Ang pagsaylo halin sa syudad padulong sa kaumhan nagakahulugan nga ang hedkwarter sang demokratiko nga rebolusyon sang banwa dapat isaylo halin sa syudad pakadto sa kaumhan sa diin masalapuan ang nagapanguna nga pwersa sang rebolsuyon. Ang pagsaylo nga ini wala nagakahulugan sang pagpabaya sa paghimakas sa syudad kundi ang pagkilala kon diin ang nagapanguna kag diin ang nagapangaduha. Ang nagapanguna nga porma sang paghimakas ginalunsar sa kaumhan, ang nagapangaduha ginalunsar sa syudad. Sa kaumhan mahimo makalunsar sang opensiba ang armado nga kusog sang banwa batok sa kaaway, samtang sa syudad, dapat magpabilin sa depensiba ang mga rebolusyonaryo nga pwersa tubtub malab-ot ang panahon nga mahimo na agawon ang armado nga kusog sang banwa sa syudad.

Ang pagpauswag sang inaway banwa sa kaumhan nagakinahanglan sang tatlo ka indi mahamulag nga bahin: armado nga paghimakas, rebolusyon agraryo kag base sa kaumhan. Sa paglunsar sang armado nga paghimakas kag pagdaug sa mas madamo nga inaway matuga ang mga kahimtangan sa pagpalapad sang base. Ang mga base ginagamit sang mga armado nga pwersa sang banwa agud bihagon ang pwersa sang kaaway, bisan sa porma sang "special forces", daku nga operasyon ukon ano man nga mahimo nga ilunsar sang kaaway. Kon mas madamo ang base, mas madamo ang lugar nga malunsaran sang rebolusyon agraryo. Sa paglunsar sang rebolusyon agraryo, labi nga mapabakod ang mga base bangud madula ang mga pwersa nga pyudal kag ang gahum pangpulitika sini. Ang rebolusyonaryo nga pwersa nagauswag samtang nagapagsik ang mga mangunguma kag nagaupod sila sa nagasulong nga Pula nga hangaway. Nagabuligay ang armado nga paghimakas, rebolusyon agraryo kag mga base sa kaumhan. Samtang nagabakod ang mga base sa kaumhan sa pulitika kag ekonomiya, ginatuga ang isa ka estado sa sulod sang isa ka estado. Isa ka armado nga nagakinaugalingon nga rehimen, isa ka gubyerno nga base sang mga pumuluyo, ang ginatuga sa kaumhan.

Ang rebolusyon agraryo nga dapat tinguhaan sang Partido sa paglunsar sang inaway banwa dapat ginaundan sang pagkumpiska sang mga duta sang mga agalon nga mayduta kag libre nga pagpanagtag sang mga duta nga ini sa mga mangunguma. Ang pyudal nga pagpanag-iya sang duta pagadulaon sa sulod sang mga base. Santo sa husto nga makasahi nga linya sa kaumhan, ang Partido kag hangaway sang banwa dapat magsalig sa mga imol nga mangunguma kag mamumugon sa uma, makig-isa sa mga nahanunga nga mangunguma, magnyutralisa sa mga manggaranon nga mangunguma kag magdula sang pagkaagalon sang mga mayduta kag magpauswag sa produksyon.

Sa paglunsar sang rebolusyon agraryo, dapat mahibal-an sang Partido kag sang armado nga kusog sang banwa ang duha ka sandigan nga halintang sang pag-uswag. Sa halintang nga indi pa mabakod ang isa ka lugar, dapat sila maghimo sang padayon nga paghanda agud himuon ini nga base paagi sa armado nga gahum sa pagdula sa mga tumandok nga manuglupig, detatsment kag espiya sang kaaway, mga tulisan kag makawat sang hayup kag sa pagpanubo sang arkila sa duta kag interes sa pautang agud mapaluya ang kaaway kag mapahulag ang masa. Samtang lubos nga ginapahulag ang masa sa organisasyon, pulitika kag ideolohiya kag nagatuhaw ang mabakod nga base halin sa paghimakas sang masa mismo, matigayon ang kumpiskasyon sang duta sang mga agalon nga mayduta kag ang alalangay nga pagpanagtag sang mga duta nga ini sa mga mangunguma.

Ang Partido kag mga armado nga kusog sang banwa dapat magsalig kag magsandig sa masa sa pagpataas sa ila kamuklatan sa pulitika. Dapat nila pabayaan ang masa nga tudluan ang ila kaugalingon. Sa panugod, dapat nila kilalahon ang ugat sang pag-antus sang masa; pagkatapos, paagi sa mga pulong sang paghimakas, mahimo ibubo sang mga mangunguma ang reklamo nila batok sa mga sahi nga nagahimulos agud matudluan nila ang kaugalingon. Samtang ginaubayan sang Partido kag armado nga kusog sang banwa ang inaway sang mangunguma batok sa tatlo ka haligi sang pyudal nga gahum - ang dalagku nga agalon nga mayduta, ang mga despotiko nga agalon nga mayduta kag ang mga agalon nga mayduta nga ara sa gahum - makaangkon ang mga mangunguma sang eksperyensya sa makasahi nga diktadurya batok sa mga nagahimulos nga sahi. Paagi sa mga pulong sang paghimakas kag paagi sa mga hukmanan sang banwa kag pagpapanaug sang silot nga santo sa mga krimen sang mga nagahimulos nga sahi nga pyudal kag iban pa nga kriminal, labi nga mapalapit ang balatyagon sang masa nga mangunguma sa demokratiko nga rebolusyon sang banwa kag mainit nila nga ginapatapu ang ila pinakamaayo nga anak sa Partido Komunista sang Pilipinas kag hangaway sang banwa. Ginhambal ni Kaupod Mao Zedong:

Ang pag-agaw sang gahum paagi sa armado nga kusog, ang paglubad sang palaligban paagi sa inaway, amo ang sentral nga katungdanan kag pinakamataas nga porma sang rebolusyon. Ang Marxista-Leninista nga prinsipyo nga ini sang rebolusyon may unibersal nga importansya para sa Tsina kag para sa tanan nga pungsod. Pero bangud isa lang ang prinsipyo, ang paggamit diri sang Partido sang proletaryado makaangkon sang porma sa lain- lain nga pamaagi santo sa lain-lain nga kahimtangan.

Sentral nga katungdanan sang Partido Komunista sang Pilipinas ang pag-agaw sang gahum pangpulitika. Sa paglunsar sang armado nga paghimakas agud maagum ang demokratiko nga rebolusyon sang banwa, dapat mahakos sang Partido ang teorya ni Kaupod Mao Zedong bahin sa paggamit sang kaumhan agud likupan kag agawon ang mga syudad, subong man ang iya pag-analisa sa sahi sa malakolonyal kag malapyudal nga pungsod. Subong man, sa Pilipinas may ispesyal nga kundisyon sang pagkakapuluan nga dapat hatagan sang partikular nga pagtamud. Samtang kinahanglan tukuron ang nagapanguna nga pwersa militar sang banwa sa nagapanguna nga pulo sang Luzon agud pukanon ang burges nga gahum sang estado nga nasentro sa syudad sang Manila, mahimo naman nga bentaha sang iban naman nga pulo sang Kabisay-an kag Mindanao ang madugay na nga disbentaha paagi sa pagtukod sang armado nga patag kag base sa kaumhan nga magapalapta kag magapaluya sa kontra-rebolusyonaryo nga armado nga kusog nga subong natipon sa Luzon, ilabi na sa Sentral Luzon kag Manila. Sa ano man nga pamaagi, ang pagkonsiderar sang tanan nga ispesyal nga kahimtangan, ang teorya ni Kaupod Mao Zedong bahin sa paggamit sang kaumhan agud likupan ang syudad kag ang iya pag-analisa sa sahi, may unibersal nga importansya para sa Pilipinas kag sa tagsa ka importante nga pulo sang Pilipinas. Sa halintang sang istratehiko nga depensiba, ang pagpauswag sang inaway banwa sa pungsudnon nga sakop segurado nga magaubos sa kusog sang kaaway kag magahatag sang ligwa sa lubos nga pagkadula sini.

Ang imperyalismo nga Amerikano, ang nagapanguna nga kaaway sang pumuluyo sang kalibutan kag prinsipal nga haligi sang kalibutanon nga reaksyon tama na ka inat sa bilog nga kalibutan. Ang mga pumuluyo nga pigos, katulad sang pumuluyo nga Pilipino, madamo sang lugar nga maniobrahan kag makahatag sang mabaskog nga bunal sa tagsa ka mahuyang nga angot sang tama ka inat nga higot sang imperyalista. Indi masarangan ipabilin sang imperyalismo nga Amerikano ang alalangay kag epektibo nga kusog sa bug-os nga kalibutan samtang kinahanglan sini dululungan nga ipapanaug ang kaugalingon nga interes batok sa mga hublag sa pungsudnon nga kahilwayan, sosyalista nga estado, pumuluyo nga Apro-Amerikano, sahi nga mamumugon nga Amerikano kag bisan sa kaugalingon sini nga mga karibal nga kapitalista sa tama ka damo nga bahin sang kalibutan. Samtang limitado ang kusog sa tinawo kag kagamitan sang imperyalismo nga Amerikano, ang pinakaesensyal amo nga ginakaugtan sang tanan nga pumuluyo sang kalibutan kag ginapakigbatuan sang mga matarung kag progresibo nga rebolusyonaryo nga inaway banwa ang agresibo nga makasahi nga kinaiya sini. Sa Byetnam na lang, indi magmadinalag-on ang imperyalismo nga Amerikano kag ang mga kaalyado nga tropa sini batok sa baganihan kag banwahanon nga pumuluyo nga Byetnames. Sa madamo pa nga lugar, padayon ini nga dugmukon sang rebolusyonaryo nga armado nga paghimakas. Angkon ang armas sang indi malutos nga Marxismo-Leninismo-Kaisipan Mao Zedong, ang pumuluyo sang kalibutan magalunsar sang rebolusyonaryo nga paghimakas kag sa amo, magapamatuod sa maragtason nga kamatuoran nga ang imperyalismo nagatinga na kag ang sosyalismo mapagros nga nagauswag.

I II III IV V
Back to top