III. MALIP-OT NGA PAGTUON LIWAT SA KASAYSAYAN
A. Pagtukod sang Partido kag Ilegalisasyon Sini
Ang pungsudnon-demokratiko nga kahublagan sa Pilipinas nagsulod sa bag-o nga halintang sang tukuron ang Partido Komunista sang Pilipinas sadtong Nobyembre 7, 1930. Ang pagtukod sang Partido nangin patimaan nga ang sahi nga mamumugon nga Pilipino nag-abanse na sa ideolohiya, pulitika kag organisasyon kag nagsugod na sa paghatag sang makasahi nga pagpamuno sa rebolusyon nga Pilipino. Sa sini, nag-abot ang panahon sang bag-o nga demokratiko nga kahublagan kadungan sang pagtuhaw sang partido sang sahi nga mamumugon nga komitido sa pag-isa sang Marxista-Leninista nga teorya sa praktika sang Pilipinas.
Bilang bag-o natukod nga partido sang sahi nga mamumugon, ang Partido Komunista sang Pilipinas ginbase gilayon sa syudad sa kubay sang pinakaabanse nga mga mamumugon nga gintiglawas ni Crisanto Evangelista. Hayag nga ginlunsar ang Partido sa ika- trese nga anibersaryo sang Rebolusyon nga Oktubre nga wala sang nagakaigo nga pagkonsiderar kag paghalong sa mapiguson kag malupigon nga kinaiya sang rehimen sang imperyalista nga Amerikano kag sang mga tumandok nga nagahari nga sahi. Wala madugayi, sadtong Mayo 1, 1931 kag pagkatapos sini, naghulag ang mga reaksyonaryo nga otoridad agud tapnaon ang Partido. Gindakop kag ginbilanggo ang mga kadre kag katapu sang Partido. Gindumilian ang mga pangmasa nga organisasyon nga ginpamunuan sang Partido. Sadtong 1932, pormal nga gindeklarar nga ilegal sang reaksyonaryo nga Korte Suprema ang Partido kag ang mga pangmasa nga organisasyon sini kag ginsentensyahan nga mabilanggo ang mga nagapamuno nga katapuan sang mga ini.
Sang malupog ang una nga linya sang liderato sang Partido, wala pa sang masaligan nga nahanas nga pangaduha nga linya sang pamunuan nga magpadayon sa hilikuton sang Partido. Bisan pa, sadtong 1935 may pila ka elemento na nga nagtukod sang grupo sa pagtuon sang Marxismo sa kubay sang petiburgesya sa Manila. Ang pila sa mga elemento nga ini nagbaton sang ila edukasyon pangpulitika sa Tuo nga oportunista nga liderato nga Browder sang Partido Komunista sang Estados Unidos.
Sa panahon nga ginhimo nga ilegal ang Partido Komunista sang Pilipinas, ang Partido Sosyalista nga ginpamunuan ni Pedro Abad Santos nagapabaskog base sa isa ka halog nga pangmasa nga organisasyon sang mga mangunguma kag mamumugon sa uma sa Sentral Luzon.
Party Constitution Bottom
I II III IV V
Back to top
|
