V. TATLO KA NAGAPANGUNA NGA HILIKUTON

K. Ang Pungsudnon nga Nagahiliugyon nga Prente

Ang pungsudnon nga nagahiliugyon nga prente amo ang indi mabulag nga bahin sang linya pangpulitika sang Partido Komunista sang Pilipinas. Ang rebolusyon nga Pilipino rebolusyon sang masa nga anakblahas batok sa imperyalismo nga Amerikano, pyudalismo kag burukrata kapitalismo. Ang pungsudnon nga nagahiliugyon nga prente dapat mag-alagad sa linya pangpulitika nga ini.

Pinakamataas nga katungdanan sang demokratiko nga rebolusyon sang banwa ang pag-agaw sang gahum sang estado paagi sa armado nga kusog kag pagtukod sang demokratiko nga gahum sang banwa bilang transisyonal nga halintang padulong sa sosyalismo. Ang pungsudnon nga nagahiliugyon nga prente dapat magserbi sa sentral nga katungdanan nga ini. Ang Partido Komunista sang Pilipinas nagatindog nga malig-on nga nagauyat kag nagagamit sang duha ka armas, ang armado nga paghimakas kag ang pungsudnon nga nagahiliugyon nga prente, batok sa kaaway. Paagi sa pungsudnon nga nagahiliugyon nga prente, magapalapad ang Partido sang impluwensya sini sa pulitika kag magaangkon sang pinakamalapad nga suporta sang masa kag iban pa nga progresibo nga sahi kag saray samtang magatukod sang nagakinaugalingon nga kusog sang nagapamuno nga sahi, ang proletaryado, paagi sa pungsudnon nga inaway ukon rebolusyon agraryo nga nagapangunga nga suportado sang sahi nga mangunguma.

Bangud nga indi maathag kag wala magamit sang husto ang pungsudnon nga nagahiliugyon nga prente bilang hinganiban sang demokratiko nga rebolusyon sang banwa, ang mga nauna nga liderato sang Partido may salabton sa madamo nga rebisyonista nga sala nga pagtan-aw bahin diri. May mga nagakabig nga ang pungsudnon nga naghiliugyon nga prente baliskad sang armado nga paghimakas. Samtang nagapamalabag sa Marxista-Leninista nga teorya sang estado kag rebolusyon, ginakabig man nila nga nagapanguna nga armas ang pormal nga organisasyon sang pungsudnon nga nagahiliugyon nga prente kag nagapanguna nga porma sang paghimakas ang parlamentaryo nga paghimakas. Nagapanguna nga may salabton ang mga Lava sa rebisyonismo nga ini, sa pagpanginwala sa Marxismo-Leninismo- Kaisipan Mao Zedong.

Antes maglupok ang kontra-Hapones nga gyera, ginkabig ang Prente Popular sang liderato sang Partido bilang lisensya lang agud panguna nga magpasakop sa parlamentaryo nga paghimakas; wala sang ginhimo nga pursigido nga paghanda para sa kontrapasista nga armado nga paghimakas. Sang maglupok ang inaway, makahalam-ot nga ginpabandera sang mga Tuo nga oportunista ang kontrapasista nga nagahiliugyon nga prente batok sa Hapon bilang puro-alyansa nga "pagpakighiliugyon nga prente" sa imperyalismo nga Amerikano kag pagdumalahan nga Komonwelt lang gani ginpalubog ang linya sang pagpakigbato sa pagbalik sang imperyalismo nga Amerikano kag sang papet nga pagdumalahan nga Komonwlet sini. Pagkatapos sang kontra-Hapones nga inaway, gintungdan sang Democratic Aliance, bilang pormal nga organisasyon sang nagahiliugyon nga prente, ang liderato sa tanan nga progresibo nga pwersa; kag gintungdan sang mga burges nga personahe nga malapit sa mag-ulutod nga Lava ang liderato kag inisyatiba didto. Ang Partido nadulaan sang kusog, inisyatiba kag independensya sang gindesisyunan sang liderato sini nga magbiya sang armas kag panguna nga magpasakop sa parlamentaryo nga paghimakas paagi sa Democratic Alliance.

Tubtub subong, ara pa ang sala nga pagtan-aw nga ginasakdag sang mga Tuo nga oportunista kag rebisyonista nga ang pungsudnon nga nagahiliugyon nga prente dapat permi may pat-ud nga porma pang-organisasyon pareho sang Democratic Alliance ukon sang Movement for the Advancement of Nationalism (Banwahanon nga Nagahugpong nga Handum) nga nagahiliusa nga para sa parlamentaryo nga paghimakas, dapat ipabilin sa tanan nga pamaagi kag labaw sangsa iban pa. Sa malapad nga inagihan sang mga madinalag-on nga rebolusyonaryo nga hublag, ang pungsudnon nga nagahiliugyon nga prente indi kinahanglan may pormal nga organisasyon. Indi man limitado sa parlamentaryo nga paghimakas ang katungdanan sini. Sa kamatuoran, ang pinakamaayo nga porma sang nagahiliugyon nga prente amo ang sa diin may pagkinaugalingon ang Partido kag may ginadumalahan nga mabaskog nga hangaway sang banwa. Kon nagapasakop ang Partido sa ano man nga pormal nga organisasyon sang naghiliugyon nga prente sa dalagan sang armado ukon legal nga paghimakas, dapt ini mangin permi handa paagi sa pag-angkon sang kaugalingon nga kusog kag inisyatiba agud atubangon ang ano man nga pagbaligya ukon kompromiso sa kaaway nga mahimo buhaton sang pungsudnon nga burgesya bagnud sa makasahi nga duha ka kinaiya sini.

Ang nagapanguna nga halambalan sa pungsudnon nga nagahiliugyon nga prente amo nga kon ang rebolusyonaryo nga makasahi nga proletaryo nga liderato ang nagapamuno sa tanan nga iban pa nga progresibo nga pwersa nga ululupod nga nagahimakas sa kaaway sa patag nga armado ukon legal. May ara man ukon wala sang pormal nga organisasyon sang nagahiliugyon nga prente, dapat ipabilin sang Partido Komunista sang Pilipinas ang rebolusyonaryo nga katungdanan sini, ang pagkinaugalingon kag inisyatiba sini.

Ang Partido Komunista sang Pilipinas dapat magpasakop sa pungsudnon nga nagahiliugyon nga prente agud magamit ang tanan nga positibo nga pwersa sa armado kag legal nga patag batok sa kaaway. Ang polisiya sang pungsudnon nga nagahiliugyon nga prente ginahimo agud palaparon ang impluwensya sang rebolusyonaryo nga armado nga kusog, ihamulag ang kaaway kag ang mga masupog nga elemento sini kag habigon ang malapad nga masa sang pumuluyo para sa demokratiko nga rebolusyon sang banwa.

Ang ispesyal nga katungdanan sang pungsudnon nga nagahiliugyon nga prente amo nga kumbinsihon sa aton bahin ang mga nahanunga nga pwersa kag elemento agud ihamulag ang mga masupog sa kubay sang kaaway. Agud matuman ini, dapat maghimo ang Partido sang maathag kag paliwat-liwat nga pag-analisa sa sahi nga magatuhay sa mga nnahanunga nga pwersa kag elemento sa mga masupog nga reaksyonaryo, sa mga nagapanguna nga kaaway sa mga nagapangaduha nga kaaway, sa mga kaaway subong sa mga kaaway bwas; kag sa kubay sang mga abyan, sa mga masaligan kag indi masaligan.

Ang polisiya sang pungsudnon nga nagahiliugyon nga prente sang partido isa ka proletaryo nga polisiya bahin sa mga sahi sa katilingban nga Pilipino. Sa pagpauswag sa pungsudnon nga nagahiliugyon nga prente, dapat naton makilala ang mga kaaway sa mga abyan kag bise bersa. Ginhambal ni Pangulo Mao:

Sanday sin-o ang aton kaaway? Sanday sin-o ang aton mga abayn? Ini ang pamangkot nga may nagapanguna nga importansya sa rebolusyon . . . . . Ang rebolusyonaryo nga partido ang ubay sang masa kag wala sang rebolusyon nga magamadinalag-on tubtub san-o man kon patalangon nila ang rebolusyonaryo nga partido. Agud mapat-ud nga mapadaug naton ang rebolusyon kag indi naton mapatalang ang masa, dapat naton hatagan sang atensyon ang pagpakig-isa sa mga matuod naton nga abyan agud salakayon ang mga matuod nga kaaway. Agud makilala ang mga matuod nga abyan sa mga matuod nga kaaway, dapat maghimo sang pangkabilugan nga pag-analisa sa mga tindog sa ekonomiya sang nagkalain-lain nga sahi sa katilingban nga Tsino kag sa ila mga aktitud sa rebolusyon.

Ang pungsudnon nga nagahiliugyon nga prente dapat ibase sa alyansa sang sahi nga mamumugon kag sahi nga mangunguma nga ginapamunuan sang sahi nga mamumugon kag Partido Komunista sang Pilipinas. Ang pungsudnon nga nagahiliugyon nga prente dapat patapuan sang iban pa nga progresibo nga sahi kag saray sa katilingban nga Pilipino nga nagapakig-isa sa masa base sa pangkabilugan nga programa pangpulitika. Ang programa pangpulitika nga ini nga ginabaton sang sahi nga mamumugon, sahi nga mangunguma, petiburgesya kag pungsudnon nga burgesya dapat magsanto sa pangkabilugan nga linya kag programa sang Partido Komunista sang Pilipinas. Ang programa pangpulitika nga ini dapat magserbi nga panghugpong sa pinakamalapad nga paghiliusa sang mga progresibo nga pwersa kag grupo agud mahamulag ang imperyalismo nga Amerikano kag mga masupog nga reaksyonaryo nga ginatapuan sang komprador burgesya, sahi nga agalon nga mayduta kag mga burukrata kapitalista.

Ang programa sang Partido kag sang pungsudnon nga nagahiliugyon nga prente dapat paundan una sa tanan sang pagdula sa pyudalismo kag sang libre nga pagpanagtag sang duta sa mangunguma kag sang nasyonalisasyon sang mga industriya kag empresa nga ginapanag-iyahan kag kontrulado sang mga dumuluong nga monopolyo kapitalista kag burgesya kumprador. Lubos nga maangkon ang programa nga ini kon maagaw lang sang pumuluyo nga ginapamunuan sang proletaryado ang gahum sang estado paagi sa armado nga kusog. Ang sektor sang estado sa subong nga ekonomiya kag ang "reporma sa duta" sa idalum sang reaksyonaryo nga estado indi dapat masal-an nga matuod nga nasyonalisasyon sang ekonomiya kag rebolusyon agraryo sa mga ginhilway nga duog ukon sa demokratiko nga estado sang banwa.

Sa pagsakdag sa pungsudnon nga nagahiliugyon nga prente, dapat ipabilin sang Partido Komunista sang Pilipinas ang pagkinaugalingon sini sa ideolohiya, pulitika kag organisasyon. Dapat ini makig-isa sa mga progresibo nga pwersa sa sulod sang pungsudnon nga nagahiliugyon nga prente pero indi sini dapat iampo sa burgesya ang mga pundamental nga makasahi nga interes sini kag ang sa porletaryado kag sahi ng mangunguma. Dapat tungdan sini ang kaugalingon sini nga hilikuton pangmasa, una sa tanan sa kubay sang mga mangunguma, agud bisan ano ang matabo, permi ini may masaligan nga kaugalingon nga kusog pangpulitika. Ang pungsudnon nga naghiliugyon nga prente sa esensya kasangkapan agud kumbinsihon ang mga nahanunga nga pwersa kag elemento agud mahamulag ang mga masupog sa kubay sang kaaway.

Ang relasyon sang Partido sa pungsudnon nga burgesya sa sulod sang pungsudnon nga nagahiliugyon nga prente nagakinahanglan sang ispesyal nga pagtan-aw. Ini ang mayor nga kabangdanan kon ngaa ang burgesya may duha ka makasahi nga kinaiya, isa ka aspeto ang progresibo kag reaksyonaryo ang isa pa. Sa pagpakigbagay sa pungsudnon nga burgesya, dapat naton likawan ang duha ka makatalagam nga tugalbong: ang "wala" nga oportunismo kag Tuo nga oportunismo. "Wala" nga oportunismo kag sektaryanismo ang indi paghatag importansya sa pungsudnon nga burgesya kag tawgon ini nga lubos nga reaksyonaryo; Tuo nga oportunismo kag kapitulasyunismo naman ang magkabig nga lubos nga rebolusyonaryo sa tanan nga kahigayunan ang pungsudnon nga burgesya. Sa pagpakig-upod sang Partido sa pungsudnon nga burgesya dapat sini permi gamiton ang rebolusyonaryo nga duha ka taktika nga nagakumbinar sang pagpakig-isa kag paghimakas. Kon malipatan sang Partido ang reaksyonaryo nga aspeto sang pungsudnon nga burgesya, madula ang kahandaan sini sa ano man nga pagtraidor sang sahi nga ini sa rebolusyon. Kinahanglanon ang rebolusyonaryo nga paghalong sa aton pagpakig-angot sa pungsudnon nga burgesya. Kon malipatan sang Partido ang progresibo nga kinaiya sang sahi nga ini kag indi ini pagkilalahon nga kaalyado sa pila ka panahon kag tubtub sa pila ka limitado nga lebel, indi sini mapanginpuslan ang mga matuod nga kontradiksyon sa tunga sang sahi nga ini sa isa ka bahin kag sang dumuluong nga monopolyo kapitalismo kag pyudalismo sa pihak nga bahin.

Agud mapauswag ang pagpakigbulig sa pungsudnon nga burgesya, dapat mag-angkon ang Partido sang kaugalingon sini nga kusog; kon indi, ang sahi nga ini kag ang mga tiglawas sini magpang-alang-alang nga magbulig. Dapat tahuron sang Partido ang mga lehitimo nga interes sang tanan nga nahanunga nga pwersa, kadungan sang aktwal nga paghatag sa ila sang konsesyon nga wala ginahalitan ang mga interes sang pumuluyo kag ang pagpamuno sang proletaryado. Sa tanan nga panahon, dapat ilunsar ang malig-on nga paghimakas sa mga kaaway sang pungsudnon nga nagahiliugyon nga prente agud magdaku ang pagsalig sang pumuluyo kag nahanunga nga pwersa sa Partido.

Sa pagpakig-angot sini sa tanan nga rebolusyonaryo nga pwersa sa bilog nga kalibutan, ginasunod sang Partido ang polisiya sang kalibutanon nga nagahiliugyon nga prente. Dapat hugpungon ang tanan nga rebolusyonaryo kag progresibo nga pwersa nga mahimo maisa batok sa nagapanguna nga kaaway sang pumuluyo, ang imperyalismo nga Amerikano. Ang moderno nga rebisyonismo kag ang islogan sini nga "nagahiliusa nga aksyon" dapat sikwayon bilang ideolohiya sang mga kalibutanon nga eskirol nga nagaserbi kag nagatigayon sang wala sa prinsipyo nga pagpakig-areglo kag pagpakig-isa sa imperyalismo nga Amerikano. Sa internasyonal nga kahublagan komunista, pinakadaku nga katalagman subong ang moderno nga rebisyonismo. Sa Pilipinas man, nagapanguna nga katalagman ang moderno nga rebisyonismo nga amo ang linya sang mga traidor nga rebisyonista nga Lava kag tanan sang iban pa nga porma sang Tuo nga oportunismo. Ang kolaborasyon sang imperyalismo nga Amerikano, moderno nga rebisyonismo kag tanan nga reaksyon dapat padayon nga ihayag kag pamatukan sang kalibutanon nga nagahiliugyon nga prente kag pungsudnon nga nagahiliuugyon nga prente.

Ang imperyalismo nga Amerikano kag tanan sang iban pa nga reaksyonaryo mga tigre nga papel. Indi makapakulba sa aton ang tanan nga nukleyar nga armas kag tanan nga militar nga teknolohiya sang imperyalsimo nga Amerikano. Bisan ang aton utod nga pumuluyo nga Tsino may bomba atomika para sa pagpangapin sa mga rebolusyonaryo nga pumuluyo, ang labi nga importante sa tanan nga paghimakas sang pumuluyo amo ang tawo, ang nagaabanse nga pwersa sang masa nga ginahatagan kapagsik sang Marxismo-Leninismo-Kaisipan Mao Zedong kag ginapamunuan sang proletaryado kag Partido Komunista. Marxismo-Leninismo-Kaisipan Mao Zedong ang ila ispiritwal nga bomba atomika. Ginahugpong sila sang diwa sang proletaryo nga internasyonalismo sa kalibutanon nga proletaryo nga rebolusyon kag sa kalibutanon nga nagahiliugyon nga prente batok sa imperyalismo nga Amerikano, moderno nga rebisyonismo kag tanan nga reaksyon.

Bisan ginabaton sang aton Partido kag mga pumuluyo ang pangpulitika kag materyal nga suporta halin sa mga utod nga partido kag pumuluyo sa diwa sang proletaryo nga internasyonalismo kag sa sulod sang balayon sang kalibutanon nga nagahiliugyon nga prente, dapat kita una sa tanan magsalig sa aton kaugalingon kag maglunsar sang demokratiko nga rebolusyon sang banwa bilang kabahin sang kalibutanon nga proletaryo nga rebolusyon.

Angkon ang armas sang indi malutos nga diwa sang Marxismo- Leninismo-Kaisipan Mao Zedong, ang Partido Komunista sang Pilipinas pat-ud nga magamadinalag-on kag ang pumuluyo nga Pilipino nga ginapamunuan sang rebolusyonaryo nga proletaryado pat-ud nga magaagum una sang demokrasya sang banwa kag sang sosyalismo pagkatapos sini.

GIN-APRUBAHAN SANG KONGGRESO SANG LIWAT NGA PAGTUKOD SANG PARTIDO KOMUNISTA SANG PILIPINAS

Disyembre 26, 1968