IV. MGA NAGAPANGUNA NGA KASAYPANAN KAG KAHUYANGAN

B. Mga Kasaypanan sa Pulitika

May mga sayup sang Tuo nga oportunismo kag "wala"nga oportunismo sa kasaysayan sang Partido Komunista sang Pilipinas. Ang mga sayup nga ini sa pulitika naghalin sa suhetibista nga panan-awan sa kalibutan. Nagaupang ang mga ini sa pagtukod sang Marxista-Leninista nga partido nga mapag-on kag hugot nga naangot sa masa sa bug-os nga pungsod, may husto nga estilo sang pagtrabaho kag nagahimo sang pagsaway kag pagsaway sa kaugalingon, nagapatigayon sang programa sa rebolusyon agraryo kag nagagamit sang pungsudnon nga nagahiliugyon nga prente agud magpalapad sang impluwensya kag suporta sa paghimakas batok sa imperyalismo nga Amerikano, pyudalismo kag burukrata kapitalismo.

Ang pagkapangsyudad, pagkaparlamentaryo kag pagkahayag sang Partido Komunista sang Pilipinas sa mga una nga bulan sadtong 1930 kag 1931 ang nagapanguna nga kabangdanan sang kahalitan kag kabudlayan sa pulitika nga gilayon sini nga gin-atubang. Sa temprano pa nga panahon nga ini, ang liderato sang Partido naanad sa "Wala" nga lenggwahe sa publiko batok sa bug-os nga burgesya kag indi maayo nga natungdan ang ilegal nga hilikuton kadungan sang legal nga hilikuton.

Wala ginpukaw kag ginpahulag sang Partido ang sahi nga mangunguma bilang nagapanguna nga kusog sang rebolusyon. Sa kahimtangan nga natalana sa lain-lain nga probinsya ang mga nagapanguna nga kadre sang Partido kag sang mga pangmasa nga organisasyon sini, wala sila sang ihibalo sa importansya sang pagtanum sang binhi sang bag-o nga demokratiko nga rebolusyon sa kaumhan. Ang ideya sang pungsudnon nga nagahiliugyon nga prente wala man gilayon gin-atubang kag gintigayon. Bisan ang petiburgesya sa syudad wala ginhatagan sang maid-id nga atensyon bilang kaalyado sa sahi kag pwede makuhaan sang mga kadre.

Bisan pa, sa panahon nga gindeklarar nga ilegal ang Partido, nakasulod sa Partido ang mga kadre nga naghalin sa petiburgesya kag pag-abot sang 1935, nangin talalupangdon na sa sulod sini. Bangud nagpabilin sila sa petiburges nga pangkatilingban nga kahimtangan kag wala nagbag-o sang ila panan-awan, ginbalabagan sang mga kadre nga ini ang paghatag sang tum-ok sa hilikuton sang Partido sa kubay sang masa nga anakbalhas, labi na sa kaumhan. Sa mga unyon sang mamumugon, maisip lang sa tudlo ang mga kadre nga tago ang paghulag. Tubtub 1937, pila lang gihapon ka kadre ang nagahulag sa kubay sang mga mangunguma sa pila ka banwa sa Sentral Luzon. Ang Partido Sosyalista ni Pedro Abad Santos amo pa ang may daku pero buhaghag nga masa nga katapuan sa kaumhan. Pila ka aktibista sang repormista nga partido nga ini ang nakabasa matuod sang Marxista nga literatura pero wala naman nagaangkon sang disiplina sang komunista nga kadre.

Sa pag-isa sang Partido Komunista sang Pilipinas kag Partido Sosyalista sadtong 1938, nangin pormal ang burges nga reaksyonaryo nga linya sang rebisyonismo. Sa preyambulo sang konstitusyon sang Partido sang pag-isa may parapo nga nagahambal nga "ginapangapinan sini ang Konstitusyon (sang papet nga pagdumalahan nga Komonwelt sang Estados Unidos) kag ang mga kinamatarung nga ginahambal didto..." kag sa Seksyon 1 sang Artikulo III sini napasulod ang pahayag nga "mabaskog nga ginapamatukan ang ano man nga hubon, grupo, sirkulo, paksyon ukon partido nga nagapadihot ukon nagahulag agud waskon, gub-on, paluyahon ukon pukanon ang ano man ukon tanan nga institusyon sang demokrasya nga Pilipino nga kasangkapan agud maangkon sang kadam-an sang pumuluyo nga Pilipino ang gahum agud desisyunan sa ano man nga pamaagi ang ila kapalaran". Pagpaidalum kay Quirino sa Prente Popular ang ginsakuan sadto sang mga lider sang Partido.

Wala lubos nga nahakos sang mga lider sang Partido ang kakinahanglanon nga maghanda kag magpauswag sang mga base sa kaumhan sa atubang sang nagadaku nga katalagman sang pasismo; kag kon nabana-bana man ini, indi bastante ang paghanda nga ginhimo sa armado nga paghimakas. Ang kahimtangan pangkali- butan nga maathag nga nagpatimaan sa nagahilapit nga Ikaduha nga Inaway Kalibutanon wala lubos nga naangot sa kahimtangan sa Pilipinas. Halin 1938 tubtub 1942, ang una kag ikaduha nga linya sang liderato nagkasugot sa nagapanguna nga importansya sang hilikuton sa syudad sang Partido, labi nga naghatag tum-ok sa pagpangapin sa mga "sibil nga kinamatarung" samtang nagaayo sa importansya sang pagtukod sang Partido kag pagtukod sang hangaway sa kubay sang mga mangunguma. Ginakabig na lang nga sa pag-isa sang Partido Komunista kag Partido Sosyalista mahimo maghiliusa ang sahi nga mangunguma sa bahin sang Partido. Sa idalum sang bandera sang Prente Popular kag sa pagsakdag sang gubyerno nga Komonowelt, ang mga nagapamuno nga kadre sang Partido nagkandidato sa piniliay sang reaksyonaryo nga gubyerno labi na sa Manila kag sa pila ka probinsya kag wala nagpaninguha sa nagapanguna nga rebolusyonaryo nga hilikuton sa kaumhan.

Sang maglupok ang Ikaduha nga Inaway Kalibutanon, naghatag ang Partido sa presidente sang gubyerno nga Komonwelt nga si Manuel L. Quezon sang isa ka memorandum nga nagapangayo sang armas sa burges nga gubyerno, pero nagbalibad ang gubyerno kay nakaseguro sang iya makasahi nga interes bisan pa nga ara ang Prente Popular. Sa baylo nga hatagan sang nagapanguna nga tum-ok ang rebolusyonaryo nga hilikuton nga pukawon kag pahulagon ang masa nga mangunguma, ginpakamaayo sang liderato sang Partido nga hatagan sang nagapanguna nga tum-ok ang nagapangaduha, ang legal kag pangsyudad nga yara sa idalum sang bandera sang Prente Popular. Napatalang ini sang sala nga pagsalig sa bulig sang armas halin sa papet nga gubyerno nga kontrulado sang imperyalismo nga Amerikano.

Sang salakayon sang mga imperyalista nga Hapones ang Manila, nadakop sa syudad ang una nga linya sang liderato kag indi mahibal-an sang iban pa nga kadre sa syudad kon diin maatras. Diri naton makita nga nagtuhaw na sa sulod sang Partido ang kasaypanan sang Tuo nga oportunismo nga wala ginasaway kag pursigido nga ginatadlong.

Bangud nasentro ang hilikuton sang Partido sa parlamentaryo nga paghimakas, ang gin-isa nga Partido wala makahimo sang pinakaesensyal nga paghanda sa kontrapasista nga armado nga paghimakas. Ang mga kadre sa syudad nga nagpalalagyo sa kaumhan sang magsalakay ang mga Hapones wala makaatras sa organisado nga paagi, gani diri nabuyagyag ang kapaslawan sang liderato nga Crisanto Evangelista nga magtukod sang partido nga may madalum nga pundasyon sa masa nga mangunguma base sa ila paghimakas para sa duta nga amo ang nagapanguna nga kaundan sang demokratiko nga rebolusyon sang banwa. Wala sang nahanda nga base sa bukid nga pagalunsaran sang inaway banwa sa mga pasista nga Hapones. Sa leksyon nga dulot sang gilayon nga kahimtangan, ginhiwat sang liderato sang Partido ang Kumperensya sang Buro sang Sentral Luzon kag wala madugayi, gintukod sini ang Hukbo ng Bayan Laban sa Hapon (Hukbalahap) agud magpamuno sa pagpakig-away sang pumuluyo sa mga manugsalakay nga Hapones kag papet nga gubyerno. Upod ang Hukbalahap nga ginapamunuan sini, ginsuguran sang Partido ang pagtukod sang gahum pangpulitika sa kaumhan.

Apang ginpadayon ang Tuo nga oportunista nga linya sa pulitika kag sang maagyan sang Partido kag hangaway ang una nga kapaslawan sa kontra-Hapones nga paghimakas sadtong March Raid, ginpadayon sang liderato nga Vicente Lava ang Tuo nga oportunismo sa pag-aprubar sang polisiya nga "mag-atras agud magpangapin". Ini amo ang polisiya nga naglapas sa Marxista-Leninista nga prinsipyo nga ang Pula nga gahum pangpulitika matukod paagi lamang sa armado nga paghimakas. Ang polisiya nga ini wala na sang liwan kundi isa lang ka porma sang "pagpanago" sang USAFFE nga naglikaw sa armado nga paghimakas sa mga manugsalakay nga Hapones. Ginbalabagan sang Tuo nga oportunista nga linya nga ini ang pagtuhaw sang demokratiko nga gahum sang banwa indi lang sa malip-ot nga panahon kundi sa madugay nga panahon pagkatapos ipahayag nga isa ini ka sala nga polisiya.

Ang boluntaryo nga pagpamatok sang masa nagbuyagyag sa pagkagaruk sang polisiya nga "mag-atras agud magpangapin" kag gindeklarar nga sala sang Kumperensya sang Bagumbali ang polisiya nga ini. Bisan naglab-ot ang Kumperensya nga ini sa pagpanubo sa katungdanan sang pila ka Tuo nga oportunista kag sa liwat nga pagtukod sang mga "iskwadron" sang Hukbalahap para sa labi pa nga paghimakas, wala lubos nga natadlong ang Tuo nga oportunista nga kasaypanan kag nagpabilin pa gihapon ang daku nga impluwensya sang mga Tuo nga oportunista sa Komite Sentral. Luwas sini, ang mga "sosyalista" nga awtomatiko nga nangin "komunista" sandig sa pag-isa sadtong 1938 wala ginhatagan sang liderato sang Partido sang husto nga Marxista-Leninista nga edukasyon kag nagpabilin nga madali sila mauyatan sang Tuo nga oportunismo. Ang palaampo kag traidor nga si Luis Taruc ang nagapabilin nga pangkabilugan nga tiglawas sang kadam-an sa ila nga wala nag-abanse sa lebel sang mga Marxista-Leninista.

Ang pagtalikod sa polisiya nga "mag-atras agud magpangapin" nagdulot sang pila ka limitado nga kadalag-an sa Partido kag hangaway. Sa sulod sang pila ka bulan, nagdaku ang lugar kag populasyon nga sakop sang mga ini asta sa ang daku nga bahin sang Sentral Luzon nagpaidalom sa epektibo nga liderato sang Partido kag hangaway sang banwa nakadeploy sang dau-daku nga yunit agud nga magtukod ukon pagpalig-on sang mga armado nga base sa Nabagatnang Katagalugan.

Bisan pa man, sa ulihi nga bahin sang paghimakas nga anti-Hapones, sang maglunsar ang imperyalismong Amerikano agud liwat nga sakupon ang Pilipinas, ang Natuo nga opurtunista nga linya masyado na kitaon nga naglutaw liwat bilang nagapanguna nga linya. Nagsulpot ang ilusyon nga natak-an na ang mga pumuluyo sa inaway kag natuman na sang Partido ang mga handum sini sa idalom sang "demokratiko nga kalinungan" nga ginhatag na sang imperyalismong Amerikano kag mga agalon nga mayduta. Baliskad sa mga ilusyon nga ini ang ginhimo nga mga kapitas sang pulis militar, gwardya nga sibilyan kag tanan nga klase sang ahente nga Amerikano batuk sa pumuluyo kag ang mga di-rasonable nga pagdakup kag pagbilanggo sa mga prinsipal nga pinuno kag hangaway sang Hukbalahap. Gani ginpalig-on ang estratehimo nga dobleng linya nga may kuno linya nga "propaganda" kag nagasaad nga hayagan nga gusto sang Partido ang "demokratiko nga kalinungan", ang pag-entra sa pulitika nga burges sa pamaagi sang Democratic Alliance; kag ang "tunay" nga linya am ang nagasaad nga kaput pa gihapon sini ang armado nga gahum sa porma sang mga nakatindog nga istak sang mga armas. Ginmandu sang liderato sang Partido nga dugmukon ang kadam-an sa mga "iskwadron" sang Hukbalahap kag ginhimo ang pakuno-kuno nga pag-ampo sang mga armas. Ginbalik sini sa syudad ang sentro sang paghulag nga pangpulitika sa idalom sang hayahay sang parlamentarismo burges.

Sa pagpalig-on sang nasambit nga doblehan nga linyang estratehiko, ang pagpaniplang wala sang rason nga ginkabig nga importante nga bahin sang linya nga estratehiko. Apang samtang wala natiplang ang kaaway sa pakuno-kuno nga pag-surender sang armas sang Hukbalahap nagsab-og naman ini sang kagamo sa kubay sang mga kadre kag masa. Ang liderato sang Partido indi makahatag sang husto nga linyang masa san ginpalig-on sini ang doblehan nga linya nga estratehiko kag nawad-an ini sang kaput nga armas.

Padayon nga ginaangkon sang konstitusyon sang Partido sang 1946 ang burges nga reaksyunaryo nga linya nga rebiyunismo sa pagsambit sa Artikulo VIII, Seksyon 2 nga "Ang pagpatapu ukon pag-entra sa mga aktibidad sang ano man nga grupo, sahi, paksyon ukon partido nga nagatuyo ukon nagahulag agud waskon, paluyahon ukon ibagsak ang demokratiko nga Konstitusyon sang pagasilutan sang gilayon nga pagpahalin sa Partido."

Tubtub Mayo 1948, sang magsaka sa sentral nga pamunuan ang liderato nga Jose Lava, naagyan sang Partido ang hayagan nga pagpangibabaw sang Natuo nga opurtunismo ukon rebisyunismo. Sadtong pagkatapos lang sang gyera nagdaog ang Natuo nga opurtunista nga impluwensya nila ni Vicente Lava, Pedro Castro kag Jorge Frianeza. Gintuligsa kag gin-islan ang liderato nga Pedro Castro bangud sa Natuo nga opurtunismo kag ikogismo sini ka sa pagtib-ong sini nga pauswagon ang isa ka pangmasa kag hayag nga partido nga kuno magaentra lang sa burges nga eleksyon. Apang ang mga kasaypanan sang liderato nga ini indi tubtub san-o man padayon nga natadlong sa ideolohiya kag pulitika sa bug-os nga Partido bisan pa nga ginahimo ang makahas nga tikang sa organisasyon batuk sa mga nagabuylog sa kay Castro sang wala sang madamo nga pagpaathag sa masa sang katapu sang Partido. Nagbulos sa iya si Jorge Frianeza nga wala nagdugay ginpahalin sa pagka-pangkabilugan nga sekretaryo kag ginpahalin bangud sa Tuo nga pagsakdag sini sa tikang nga makighiliugyon nga prente sa papet nga gubyerno nga Roxas; subong man, wala man sang ginlunsar nga pursigido nga kahublagan sa pagtadlong agud dulaon ang ugat sang mga kasaypanan.

Ginhimuslan lang sang liderato nga Jose Lava ang madalum nga demanda sang Partido kag sang pumuluyo nga kinahanglan ang armado nga paghimakas sa atubang sang pasista nga pagsalakay sa ila kag sa pila ka napilian nga tiglawas sa konggreso nga nagapamalabag sa Layi Bell sa Negosyuhanay kag Ligwat-Parity, nga wala sang pagpaathag sa mga basehan sa ideolohiya, pulitika kag organisasyon para sa madugayan nga inaway banwa. Basta na lang ginsalig sang liderato nga ini ang kadalag-an sang rebolusyon sa mga panggwa nga kahimtangan.

Bangud sa pagkawala sang pursigido nga kahublagan sa pagtadlong batok sa nauna nga Tuo nga liderato luwas sa mga pang-organisasyon kag administratibo nga tikang, nagpabilin pa gihapon ang Tuo nga oportunismo bilang isa ka mabaskog nga paidalum nga agos ukon ikaduha nga aspeto sang oportunismo bisan sa idalum sang "Wala" nga oportunista nga liderato nga Jose Lava. Pagkatapos gid nga nagtungod kag nag-aprubar sang linya sang armado nga paghimakas, ginpahanugutan ini ni Luis Taruc nga magpakighisugot sa pagdumalahan nga Quirino bahin sa mga kundisyon sang pag-ampo kag amnestiya para sa armado nga kusog sang banwa. Isa pa ini ka halimbawa sang oportunista nga linya nga labi nga nakapaluya sa rebolusyonaryo nga handum sang masa sangsa nakatiplang sa kaaway. Wala sang matuod nga Marxista-Leninista nga liderato sang Partido ang tubtub san-o magpamensar nga mag-ampo ukon magpangayo sang amnestiya sa kaaway. Ini pagtraidor sa masa nga nagahimakas, pagsakdag sa kapitulasyunismo kag pag-alagad sa kaaway.

Ang nagapanguna nga kasaypanan sang liderato nga Jose Lava amo ang "Wala" nga oportunismo sa dogmatiko nga pagtan-aw nga ang mga kaaway sa sahi sang proletaryado nagluya kag lubos na nga natunga kag ang Partido makasarang na makaagaw sang gahum sa tama ka lip-ot nga panahon. Wala nila mahangpan nga sa pungsod nga malakolonyal kag malapyudal dapat ilunsar ang madugayan nga inaway banwa nga may nagakaigo nga pagkonsiderar sa kusog sang kaaway.

Sa kontra-Hapones nga paghimakas, nagsalig lang ang Partido sa mga pumuluyo sa mga lugar nga sakop sang Hukbalahap kag Barrio United Defense Corps. Bangud sa nagligad nga kapaslawan nga magtalana sang mga kadre sa mga importante nga bahin sang kapuluan luwas sa Sentral Luzon, Manila-Rizal kag Nabagatnan nga Katagalugan kag bangud sa Tuo nga oportunismo sang mga ginsundan nga tuig, wala makapalapad ang Partido kag hangaway sang banwa sa pungsudnon nga sakop kag bangud sini, wala sang ikasarang nga makig-isa sa mga pumuluyo sa pungsudnon nga sakop. Kinahanglanon sang Partido ang madugay nga panahon agud mahimo nga rebolusyonaryo nga bentaha ang panugod nga disbentaha sang pagpakig-away para sa demokratiko nga gahum sang banwa sa kapuluan pareho sang Pilipinas.

Indi malapad nga nahangpan sang "Wala" nga oportunista nga liderato nga Jose Lava ang mga kinahanglanon sang demokratiko nga rebolusyon sang banwa. Wala sini makita ang importansya sang mapag-on nga pagtukod sang Partido, sang pagpauswag sang mga armado nga base sa kaumhan base sa rebolusyon agraryo, kag sang pungsudnon nga nagahiliugyon nga prente. Kon nakilala sini ang kinahanglanon nga kumbinasyon kag husto nga paggamit sang mga armas nga ini, madali tani sini nakita nga ang inaway banwa madugayan kag kumplikado.

Sa nasambit nga panahon, naglapnag ang pagtan-aw nga ang pagtukod sang mga base sa kaumhan ideya nga kahalam-utan kag utopiko "bangud gamay nga pungsod kag pulo-pulo ang Pilipinas nga wala sang alatrasan nga malapit kag kasugpon sang isa ka daku nga abyan nga pungsod". Ang ideya sang base sa kaumhan lubos ka hambog nga ginbale-wala sang sadto pangkabilugan nga sekretaryo nga si Jose Lava kag gintawag nga "ambisyoso nga ideya". Wala gid makita sadto nga ang mabakod nga base sa kaumhan amo ang mangin sentro ukon daku nga alatrasan sang mga sona panggerilya. Ang kampo sang Politburo-Out sa bahin sang Laguna kag Sierra Madre nagsalig lang sa tago nga pisikal nga base sa baylo nga sa isa ka mabakod nga base sa kaumhan nga may mabaskog nga suporta sang pumuluyo bangud sa armado nga paghimakas kag rebolusyon agraryo.

Dapat tani ginlunsar ang madugayan nga rebolusyonaryo nga armado nga pghimakas kadungan sang rebolusyon agraryo kag pagpauswag sang mga base sa kaumhan. Dapat tani nag-abanse sang pabalod ang hangaway sang banwa halin sa mga mapag-on nga base. Pero ang petiburges nga liderato nga ini labi nga nagasako, sobra ang handum nga makaagaw sa malip-ot nga panahon sang gahum sang burges nga estado nga nasentro sa Manila. Wala makita tubtub san-o man sang petiburges nga liderato nga ini nga mapakigbatuan sang Partido ang burges nga estado paagi sa demokratiko nga gahum sang banwa nga ginatukod sa kaumhan. Sa paglala sang adbenturista nga kabuangan nga ini, ang mga lider sang Partido hayag nga nagpahayag nga "See you in Malacanang!". Ginpakita sang binata-bata nga pahayag nga ini ang adbenturista nga handum sang liderato nga Jose Lava nga italana ang hangaway sang banwa sa ganhaan sang Manila sa sulod sang malip-ot nga panahon nga wala anay ginpauswag ang armado nga gahum sang masa kag pagkatapos mag-abanse sang pabalod halin sa mapag-on nga base sa kaumhan.

Ang plenum sang Komite Sentral nga ginhiwat sang Politburo- Out sang liderato nga Jesus Lava sadtong Pebrero-Marso 1951 matapos madakop ang Politburo-In wala makaathag sa paggamit sang tatlo ka armas sang rebolusyon nga Pilipino: ang pagtukod sang Partido, armado nga paghimakas kag pungsudnon nga nagahiliugyon nga prente. Ginpalubog sini ang mga sandigan nga kasaypanan sang liderato nga Jose Lava paagi sa manabaw nga rason pareho sang "pagpabaya" sang mga nadakop nga lider sang partido kag kasaypanan sa taktika sang mga naidalum nga kadre kag kumander kag sang mga kinaandan nga katapu. Nabuyagyag tani sang isa ka kahublagan sa pagpanadlong ang basehan sa ideolohiya kag pulitika sang mga kapaslawan sang liderato nga Jose Lava kag sa sini, nadula ang katalagman nga magpadayon ang oportunismo sa Tuo ukon "wala" nga porma.

Ang pagsaka ni Jesus Lava sa liderato sang Partido wala nagakahulugan sang gilayon nga pagtalikod sa "Wala" nga oportunista nga linya pangpulitika ni Jose Lava. Natabo ang pagsaylo sa Tuo nga oportunista nga linya sang madulaan ang liderato nga Jose Lava sang epektibo nga sentral nga pagpamuno sa tanan nga yunit sang hangaway sang banwa kag sang labi ini nga gin-ipit sang sunod-sunod nga kabudlayan militar nga tuga sang kaaway kag sang kapitulasyunismo kag paksyonalismo ni Luis Taruc kag mga maki-Tito nga sumulunod niya. Nangin lutaw ang Tuo nga oportunismo sini sa pormal nga pag-aprubar sa parlamentaryo nga paghimakas bilang nagapanguna nga porma sang paghimakas sadtong 1956 kag sa pagbungkag sa mga armado nga yunit nga ginadumalahan sini. Padayon nga napamatud-an ang tuo nga oportunimso nga ini sa mga masunod nga indibidwal nga pagpalagyo sang mga nagapanguna nga lider sang Partido halin sa kaumhan padulong sa syudad. Ang indibidwal nga pagpalagyo nga ini naglab-ot sa pinakamalain nga polisiya sang liderato nga Jose Lava, ang polisiya nga "isa ka pila", nga nagdula sang kolektibo nga pagpangabuhi sang Partido kag nagguba sang halos tanan nga yunit sang Partido kag armado nga yunit, gani napaslawan man bisan ang Tuo nga oportunista nga katuyuan nga panguna nga magpasakop sa parlamentaryo nga paghimakas. Ang liwat nga militante nga pagsulong sang Partido Komunista sang Pilipinas natabo bangud sa pagtuhaw sang mga bag-o nga kadre sang Partido kag liwat nga paghulag sang mga dumaan nga kadre sang Partido nga subong ginaubayan sang Marxismo-Leninismo-Kaisipan Mao Zedong.

Pero sa subong, ang burges nga reaksyonaryo nga linya sang mga Lava nagapabilin pa gihapon bilang isa ka makahalalit nga impluwensya sa sulod sang Partido. Ang burges nga reaksyonaryo nga linya nga tama ka lawig nga gin-antus sang Partido nga indi pursigido nga ginsaway antes mag-abot ang panahon nga ini sang pag-uswag sang Partido, indi mapangibabawan sa sulod lang sang pila ka semana, bulan ukon tuig. Kon indi naton pagsumpungon ang ugat sang ila mga kasaypanan sa ideolohiya kag pulitika, indi ini madula sa Partido, mapukan man ang mga direkta nga tiglawas sini halin sa ila mga katungdanan sa Partido. Kon ikonsiderar ang kahimtangan subong, ang katalagman sang Tuo kag "Wala" nga oportunismso permi magaatubang sa aton. Pero ang mga mabakod nga nagapanindugan sa Marxismo-Leninismo-Kaisipan Mao Zedong kag sa husto nga linya pangmasa sang Partido magapabilin kag magasulong permi sang ila rebolusyonaryo nga kusog kag kabaganihan agud magpangibabaw.

Pero dapat tandaan nga nagapanguna nga Tuo nga oportunismo kag pangaduha "Wala" nga oportunismo ang burges nga reaksyonaryo nga linya sang mga Lava. Sa subong, labi ang paghatag sang importansya sang pila ka katapu sang Partido sa legal nga "banwahanon" nga pangmasa nga organisasyon nga nabase sa syudad pareho sang Movement for the Advancement of Nationalism kag sa mga tikang sang gubyerno katulad sang Magna Carta sang Pamugon, Kodigo sang Reporma sa Agrikultural nga Duta kag iban pa. Sa pihak nga bahin, may gamay nga paidalum nga agos sang bataon nga "Wala" nga oportunismo nga labi ang pag-ayo sa importansya sang mga legal nga pangmasa nga organisasyon kag nagpakabuang sa "Wala" nga mga diskusyon nga wala man nagapasakop sa pursigido nga hilikuton kag pangmasa nga paghimakas batok sa mga nagapanghimulos sa pumuluyo.

Ang moderno nga rebisyonismo nag-angkon sang gamay nga tungtungan sa katilingban nga Pilipino paagi sa mga traidor nga rebisyonista nga Lava kag iban pa nga Tuo nga oportunista. Kinahanglan sumpungon ang moderno nga rebisyonismo paagi sa rebolusyonaryo nga teorya kag praktika sang Marxismo-Leninismo- Kaisipan Mao Zedong. Kon indi, ang Partido Komunista sang Pilipinas padayon nga indi mag-uswag kag mapaslawan sa paghimakas para sa demokratiko nga gahum sang banwa.

Ang makabagong rebisyonismo ay nagkakaroon ng maliit na tuntungan sa lipunang Pilipino sa pamamagitan ng mga taksil na rebisyonistang Lava at iba pang Kanang oportunista. Kailangang bakahin ang makabagong rebisyonismo sa pamamagitan ng rebolusyonaryong teorya at praktika ng Marxismo-Leninismo-Kaisipang Mao Tsetung. Kung hindi, ang Partido Komunista ng Pilipinas ay patuloy na hindi uunlad at mabibigo sa pakikibaka para sa demokratikong kapangyarihan ng bayan.Back to top I II III IV V
Back to top