IV. MGA NAGAPANGUNA NGA KASAYPANAN KAG KAHUYANGAN

A. Mga Kahuyangan sa Ideolohiya

Ang nagapanguna nga kahuyangan sa ideolohiya sang tanan nga nauna nga liderato sang Partido Komunista sang Pilipinas amo ang suhetibismo sa porma nga dogmatismo kag empirisismo kag nagbunga sang mga tuo kag "Wala" nga oportunista nga linya. Ang Pilipinas, sa iya pagkamalakolonyal kag malapyudal, may madamo nga petiburgesya nga nagaserbi nga maragtason kag pangkatilingban nga basehan sang suhetibismo. Bangud nagaluntad ang Partido sa sini nga klase sang katilingban, mahimo ini magpakita sang suhetibista nga tendensya halin sa gwa kag halin sa sulod kon indi ini alerto kag mahinalungon sa Marxista-Leninista nga pagtukod sa ideolohiya.

Mahimo masudlan ang Partido sang madamu-damo nga katapu nga may petiburges nga oryentasyon (nahanunga nga mangunguma, intelektwal, manughimo-sa-kamot kag iban pa nga magagmay nga prodyuser) nga wala pa makabag-o sang ila panan-awan sa kalibutan kag pamaagi sang pagpamensar santo sa Marxismo-Leninismo kag wala pa nakaangot sang rebolusyonaryo nga praktika sa materyalismo diyalektiko kag materyalismo istoriko.

Bisan kadam-an sa mga nauna nga katapu sang Partido naghalin sa sahi nga mamumugon nga gintiglawas ni Kaupod Crisanto Evangelista, sayup nga nagsalig sang daku ang liderato sang Partido sa hayag, legal, parlamentaryo kag pangsyudad nga mga hulag-pangpulitika nga nagpalupog sa Partido Komunista sang Pilipinas sang gindumilian na ini sang imperyalismo nga Amerikano kag mga tinawo sini. Paagi sa rebolusyonaryo kag lubos nga proletaryo nga panan-awan sa kalibutan, nahibal-an tani sang Partido ang diyalektika sang bug-os nga kahimtangan sa Pilipinas kag nagamit tani sini ang mga husto nga pamaagi sang legal kag ilegal nga paghimakas.

Sadtong 1935, samtang gindumilian sang mga kaaway sa sahi ang Partido, madamu-damo nga katapu sang Partido nga naghalin sa petiburgesya ang nagsulod sa isa ka mahuyang nga likom nga Partido nga nadulaan sang pat-ud nga sentral nga liderato; diri nila ginpadayon ang hilikuton pangpulitika, dala-dala ang ila wala mabag-o nga petiburges kag burges nga kaisipan. Ang mga petiburges nga elemento nga ini sa sulod sang Partido ginpangunahan sang mga katapu nga may daku nga impluwensya sang agos sang empirisismo kag Tuo nga oportunismo nga ginpalapta ni Browder. Sang mga panahon nga ini, ang Partido Komunista sang Pilipinas, sa pagsakdag sang Internasyonal nga Komunista, ginbuligan sang Partido Komunista sang Estados Unidos sa pagseguro nga ang mga kadre pareho ni Vicente Lava, nga amo ang nangin nagapamuno nga tiglawas sini ang magapadayon sa hilikuton sang Partido.

Ang empirisista nga tipo sang suhetibismo ginpakita sang mga malahalon nga polisiya kag hitabo pangpulitika katulad sang nagapanguna nga tum-ok nga ginhatag sa hilikuton sa syudad sang Partido antes maglupok ang inaway nga Pasipiko; sa pag-isa sang Partido Sosyalista kag Partido Komunista, nga artipisyal nga nagpadamo sa katapuan sang Partido Komunista; sa tuo nga preyambulo sa konstitusyon sang pag-isa; sa kapitulasyon sa imperyalismo nga Amerikano kag pagdumalahan nga Komonwelt; sa pagkawala sang ano man nga plano nga halinon ang hedkwarter sang Partido halin sa syudad padulong sa kaumhan; sa pag-aprubar sang polisiya nga "mag-atras agud magpangapin" sadtong 1943 kag sa pagpati ni Vicente Lava nga indi mahimo mag-angkon sang proletaryo nga liderato sa kaumhan; sa linya nga puro kontra-Hapones sa panahon sang inaway kag sa pagsaylo sang mga sentral nga organo sang Partido pakadto sa syudad pagkatapos ang inaway nga kontra-Hapones kag sa mga hayagan nga Tuo nga oportunista nga polisiya nanday Vicente Lava, Pedro Castro kag Jorge Frianeza sadtong 1945 tubtub 1948.

Nagtubo ang empirisismo sa istatiko nga pagtantya nga tama ka huyang ang demokratiko nga pwersa kag sa istatiko nga pagtantya nga tama ka baskog sang kaaway. Ang hilikuton sang Partido ginadikta sang hulag sang kaaway sa baylo sang diyalektiko nga paghangup sa kahimtangan kag sa pagtimbang sang kusog. Nagakadula ang rebolusyonaryo nga inisyatiba bunga sang istatiko, isa-ka-bahin, utod-utod kag makitid nga panan-awan bahin sa mga kinahanglanon sang kontra-imperyalista, kontrapyudal kag kontrapasista nga paghimakas.

Sa sini, sobra ang pagtum-ok sa hilikuton pangpulitika sa syudad bangud sa suhetibista kag oportunista nga pagpaninguha nga magpakig-indis ukon makigkunsabo sa mga partido kag grupo nga burges kag magpakitluoy para sa "demokratiko nga katawhayan" halin sa mga imperyalista nga Amerikano kag tumandok nga reaksyonaryo sa kaugalingon nila nga balwarte sa syudad. Bangud labi nga ginpakanubo ang kamalahalon sang kaumhan, napabay-an ang rebolusyonaryo nga inisyatiba, ang indi basta mapahigad nga suporta sang masa nga mangunguma kag ang isa ka malapad nga lugar nga mahulagan. Ara man ang personal nga kagustuhan sang petiburges nga mag-angkon sang kasulhayan kag prestihiyo sang pagpangabuhi sa syudad.

Bisan pa, may kapihak nga guya ang bagol sang suhetibismo. Sa tunga sang 1948 kag 1955, nagpangibabaw ang dogmatista nga tipo sang suhetibismo sa una nga duha ka tuig sang liderato nga Jose Lava kag sa una nga lima ka tuig sang liderato nga Jesus Lava. Ang dogmatismo nga ini ang nangin kabangdanan sa pagtantya nga tama ka baskog sang demokratiko nga pwersa sang banwa kag sa pagtantya nga tama ka huyang sang kaaway, nga wala lubos makonsiderar ang mabudlay nga pamaagi sang madugayan nga inaway banwa. Sa idalum sang liderato nga Jose Lava, ginsunod ang istratehiko nga linya nga sa malip-ot nga panahon sang duha ka tuig segurado nga maagaw sang Partido ang gahum sa bug-os nga pungsod. Wala lubos nga ginkonsiderar sang liderato nga Jose Lava nga kinahanglan ang kongkreto kag madugay nga pagtukod sang Partido, pagtukod sang hangaway sang banwa kag pagtukod sang rebolusyonaryo nga pungsudnon nga nagahiliugyon nga prente.

Nalingaw ang liderato nga Jose Lava sa mga "Wala" nga islogan nga wala sang angot sa bug-os nga basehan nga kahimtangan; pagpakita ini sang dogmatista nga tipo sang suhetibismo. Nakaugalian na sang liderato nga ini ang pagkibot sa mga kaupod paagi sa kinaalam halin sa libro kag gamay nga kuno ispesyal nga kinaalam bahin sa kahimtangan sang kalibutan kag sa pinakasulod nga sirkulo sang kaaway. Base sa sini nga kinaalam, naghimo ang liderato nga ini sang mga desisyon nga nagsobra sa ikasarang kag paghangup sang Partido sa masa. Wala sini ginhatagan sang pagtamud ang pasensyuso nga paghulag sa kubay sang masa sa pagpauswag sang madugayan nga inaway banwa.

Sa pihak nga bahin, ang empirisista nga tipo sang suhetibismo nga ginpakita sang liderato nga Vicente Lava kag liderato nga Jesus Lava amo ang matalaw nga reaksyon sa militar nga superyoridad sang kaaway. Nalipatan nila ang posible nga pag-uswag sang mga rebolusyonaryo nga prinsipyo kag polisiya nga husto nga ginagamit kag ginadapat base sa mga pangsulod nga layi sang pag-uswag sang kasaysayan kag katilingban nga Pilipino. Nagpaanod na lang sila sa agos sang pagkalutos nga wala nagpanginguha para agawon ang rebolusyonaryo nga inisyatiba.

Ang empirisismo kag dogmatismo duha ka guya sang isa ka petiburges nga bagol. Isa ka libot sa bagol sang suhetibismo kag gilayon nga makita ang amo ini kag amo yadto nga guya. Ang nagapanguna nga suhetibista nga kasaypanan sang liderato nga Vicente Lava amo ang empirisismo kag ang nagapanguna nga kasaypanan sang liderato nga Jose Lava amo ang dogmatismo. Ang mga kasaypanan nga ini naghalin sa isa lang ka petiburges nga balatian sang suhetibismo nga ginpangabudlayan sang Partido kag nagdulot sang kalutusan sa rebolusyonaryo nga kahublagan.

Ang mga pagbaliskad halin sa empirisismo pakadto sa dogmatismo kag halin sa dogmatismo pakadto sa empirisismo kinaandan sa mga nagaangkon pa sang petiburges nga panan-awan sa kalibutan. Bisan pa, kon ang isa ang nagapanguna nga guya sang isa ka suhetibista nga panindugan, pat-ud nga ang isa naman ang pangaduha nga guya kag ang pangaduha nga guya mangin nagapanguna nga guya sa iban nga kahigayunan. Ini ang diyalektiko nga relasyon sang empirisismo kag dogmatismo. Indi dapat katingalahan sang mga kaupod kon ngaa sa idalum sang isa ka dogmatista nga liderato, may mga kaso sang empirisismo; magkatulad nga dogmatismo kag empirisismo ang paggamit sang makitid kag limitado nga inagihan bilang basehan sang kabilugan nga suhetibista nga pagdesisyon. Indi man dapat katingalahan sang mga kaupod kon ngaa ang isa ka liderato nga may petiburges nga panan-awan padayon nga magsaylo-saylo sa empirisismo kag dogmatismo. Indi mahakos sang tanan nga suhetibista ang mga layi sang diyalektiko nga pag-uswag gani nangin mahuyang kag padali-dali sila.

Sadtong 1951, ginpadayon sang liderato nga Jesus Lava ang dogmatista nga linya sang liderato nga Jose Lava. Pero pagkalipas sang pila ka tuig, nagsugod nga magpangibabaw ang empirisista nga tipo sang suhetibismo bunga sang mga kapaslawan sa militar. Ginsuguran nga tantyahon sang liderato nga Jesus Lava nga tama ka baskog sang kaaway kag ginsakdag sini ang parlamentaryo nga paghimakas bilang nagapanguna nga porma sang paghimakas. Gintalikdan ang kaumhan kag pagkatapos gingamit ang polisiya nga "isa ka pila" base sa makitid sini nga indibidwal nga eksperyensya.

Sa pagsuma sa sunod-sunod nga suhetibista nga liderato, mahambal naton nga sanday Vicente Lava, Jose Lava kag Jesus Lava responsable sa petiburges nga masakit nga madugay na nga nagpabudlay sa Partido Komunista sang Pilipinas. Padayon nga ginsulong sang burges nga reaksyonaryo nga linya sang mga Lava ang rebisyonismo sa Pilipinas. Sa esensya, ini ang indi paghangup sa rebolusyonaryo nga proletaryo nga ideolohiya kag indi paggamit sini sa partikular nga kahimtangan sang katilingban nga PIlipino. Ang pag-angkon sang mga Lava sa liderato sang Partido sa nagligad nga masobra sa katluan ka tuig kabangdanan kon ngaa mahuyang pa ang Partido Komunista sang Pilipinas. Bisan naplastar ang mga kasaypanan sa pulitika sang tagsa ka liderato nga Lava bangud sa dalagku nga kahalitan, wala man sang ginhimo nga pursigido nga kahublagan sa pagpanadlong agud ipahayag kag tadlungon ang mga sandigan nga kasaypanan sa ideolohiya.

Sa pihak sang kamatuoran nga daku nga halit sa Partido ang gindulot sang suhetibismo ni Vicente Lava nga ginpakita sa iya polisiya nga "mag-atras agud magpangapin", wala sang ginlunsar nga kahublagan sa pagpanadlong nga tani nakapugong sa mga Tuo nga oportunista nga kasaypanan sa mga nagsunod nga tuig matapos ang Ikaduha nga Inaway Kalibutanon. Subong man, sa pihak sang mga malubha nga kasaypanan nga ginhimo sang liderato nga Jose Lava, ang nagsunod nga liderato wala sang ginhimo nga kon ano man nga pursigido nga pagpanadlong. Tubtub subong, sa pihak sang mga malubha nga kasaypanan sang liderato nga Jesus Lava kag sang iban pa nga nauna nga liderato, may mabaskog na nga pagpamalabag sa pagpanadlong sa ideolohiya, pulitika kag organisasyon. Ang Partido magalab-ot sa sunod-sunod nga mga kasaypanan kon wala sang sistematiko kag obhetibo nga pag-analisa sang tagsa ka sayup sa ideolohiya, pulitika kag organisasyon. Ang pasahay sang liderato sang Partido halin sa isa ka utod pakadto sa isa pa ka utod, isa gid lang ka hitabo sa bug-os nga kalibutanon nga komunista nga kahublagan, kag tama ka athag nga sintoma sang pagpangibabaw sang suhetibismo sa sulod sang Partido.

Ang burges nga reaksyonaryo nga linya sang mga Lava daku nga karerismo sa sulod sang partido. Gintuga ang isa ka makatalagam nga sistema sang pagpanagtag sang katungdanan sa Partido sa mga paryente base sa personal nga pagsalig sa baylo nga sa pang-ideolohiya kag matuod nga pagsalig sang Partido. Sa sini nga pamaagi, permi may magaabot nga mekanikal, utok-ulipon kag artipisyal nga mayorya agud sunod-sunod nga pilion ang mag-ulutod nga Lava bilang mga pangkabilugan nga sekretaryo sang Partido.

Nagaluntad pa ang kalainan sang suhetibismo sa sulod sang Partido kag dapat ini sumpungon. Makita pa ini sa porma sang sentimentalismo sang mga mas may edad nga kadre nga nagbaton sang pang-ideolohiya nga kahanasan sa mga nauna nga liderato. May pagkasentimental nga ginakilala nila ang mga personal nga sakripisyo sang mag-utod nga Lava apang wala man nila makita kon ano kadamo nga kabuhi sang pumuluyo kag kadre ang ginhalad sa altar sang suhetibista nga kasaypanan kag kapaslawan kag wala man nila makita ang ginatawag nga personal nga sakripisyo sang mag-utod nga Lava bilang bunga mismo sang ila mga suhetibista nga kasaypanan kag kapaslawan.

Ang sentimentalismo nga ini nangin upang sa pagtadlong sang mga kasaypanan sa ideolohiya, pulitika kag organisasyon. Ginaupdan ini sang suhetibista nga paghangad sa matag-as nga burges nga akademiko nga titulo sang pila ka kadre. Nagatuhaw man ini sa porma sang personal nga pagsalig sa mga tawo nga ginahanas sa ideolohiya kag ginabendisyunan sang sunod-sunod nga liderato nga Lava.

Ang burges nga reaksyonaryo nga linya sang mga Lava nga nagluntad base sa suhetibismo amo subong ang nagapatubo sa moderno nga rebisyonismo sa Pilipinas. Bangud mapag-on ang aton pagdesisyon nga liwat tukuron ang Partido, ang burges nga reaksyonaryo nga linya sang mga Lava kag tanan nga kasaypanan sang suhetibismo dapat malig-on nga sumpunogn kag dulaon paagi sa pursigido nga kahublagan sa pagpanadlong. Sa paglunsar sang kahublagan nga ini, indi mga personahe sang "dinastiya" nga Lava ang tuyo naton; ang tuyo naton amo ang pagtadlong sang mga suhetibista nga kasaypanan. Kon wala sang kahublagan sa pagpanadlong, kon wala sang pang-ideolohiya nga pagpabakod sang Partido, magadabong ang moderno nga rebisyonismo agud dis-armahan kag paluyahon ang demokratiko nga rebolusyon sang banwa.

Pila na ka dekada nga nagpabilin sa sulod sang Partido ang rebisyonismo nga Lava bangud wala san-o man sang kahublagan sa pagpanadlong pareho sang ginpakita ni Kaupod Mao Zedong sa sulod sang Partido Komunista sang Tsina nga gindesisyunan naton nga himuon subong. Ang kahublagan sa pagpanadlong sa sulod sang Partido Komunista sang Pilipinas, ang ubod sang proletaryo nga diktadurya, dapat himuon sa Marxista-Leninista nga pamaagi sa diin ginalunsar ang pangkultura nga rebolusyon sa proletaryo nga estado agud sumpungon ang Tuo nga oportunismo kag moderno nga rebisyonismo.

Empirisismo ang nagpangibabaw nga porma sang suhetibismo nga nangin kinaiya sang liderato nga Lava. Ang dogmatista nga liderato ni Jose Lava kag kabahin sang kay Jesus Lava nga mas o menos pito ka tuig sang "wala" nga panahon napasulod sa masobra katluan ka tuig nga empirisismo nga mayormente ginhimo sang mga liderato nga Vicente Lava kag Jesus Lava. Ang empirisismo kag Tuo nga oportunismo amo naman ang basehan sang moderno nga rebisyonismo nga dedikado nga ginbaligya sang traidor nga grupo nga neoburges kag rebisyonista sa Mosku. Sa subong, ang moderno nga rebisyonismo desperado nga nagapaninguha nga magpalapad. Dapat pursigido kag hugot nga sumpungon ini sang Partido Komunista sang Pilipinas labi na subong nga liwat nga ginatukod ang Partido.

I II III IV V
Back to top