V. TATLO KA NAGAPANGUNA NGA HILIKUTON

A. Pagtukod sang Partido

Kon wala sang rebolusyonaryo nga teorya, indi makaangkon sang rebolusyonaryo nga kahublagan. Sa panahon nga ini, wala sang rebolusyonaryo nga kahublagan kon wala sang ubay sang Marxismo-Leninismo-Kaisipan Mao Zedong. Gani, sa liwat nga pagtukod sang Partido Komunista sang Pilipinas, dapat naton gamiton ang unibersal nga kamatuoran sang Marxismo-Leninismo- Kaisipan Mao Zedong sa kongkreto nga praktika sang rebolusyon nga Pilipino, sa pagtukod liwat sang Partido, sa pagpauswag sang armado nga paghimakas kag sa paggamit sang pungsudnon nga nagahiliugyon nga prente agud maagum ang demokratiko nga rebolusyon sang banwa.

Ang dapat naton tukuron liwat sa Pilipinas subong amo ang isa ka proletaryo nga rebolusyonaryo nga partido nga naarmasan sang Marxismo-Leninismo-Kaisipan Mao Zedong. Ang rebolusyonaryo nga kahublagan sa Pilipinas indi makasulong nga wala nagadungan sa pagsulong sang teorya kag praktika sang kalibutanon nga proletaryo nga rebolusyon. Ang proletaryo nga rebolusyon padayon nga nagasulong, nag-agi na sa tatlo ka malahalon nga halintang: ang una nga halintang ginpamunuan nanday Marx kag Engels sa pagpauswag sa teorya sang syentipiko nga sosyalismo; ang ikaduha nga halintang ginpamunuan nanday Lenin kag Stalin sa pagpauswag sa teorya kag praktika sang proletaryo nga diktadurya sa panahon sang imperyalismo; kag ang ikatlo nga halintang amo ang ginapamunuan subong ni Kaupod Mao Zedong. Bisan sa ikatlo nga halintang, si Kaupod Mao Zedong ara na sa abanse nga detatsment sang Internasyonal nga Komunista nga Kahublagan sa talalupangdon nga pagpauswag niya sa teorya kag praktika sang inaway banwa sa malakolonyal kag malapyudal nga pungsod.

Sa panahon nga ini sang Marxismo-Leninismo-Kaisipan Mao Zedong, indi maangkon sang Partido Komunista sang Pilipinas ang katuyuan sini subong nga pungsudnon nga demokrasya kag ang ginapadulungnan sini nga katuyuan nga sosyalismo kon indi paggamiton ang Marxismo-Leninismo-Kaisipan Mao Zedong sa kongkreto nga kahimtangan sang Pilipinas kag kon indi sini mahakos ang anum ka bahin sang subong nga Marxismo-Leninismo: pilosopiya, ekonomiya pangpulitika, sosyal nga syensya, inaway banwa, pagtukod sang partido kag proletaryo nga rebolusyon pangkultura. Ang Partido Komunista sang Pilipinas mahimo mangin proletaryo nga rebolusyonaryo nga partido kon mahakos sini ang mga kauswagan sa pilosopiya, ekonomiya pangpulitika kag sosyal nga syensya nga gin-amot ni Kaupod Mao Zedong kag ang teorya kag praktika niya sa inaway banwa, pagtukod sang partido kag dungganon nga proletaryo nga rebolusyon pangkultura.

Bilang proletaryo nga rebolusyonaryo nga partido, ang Partido Komunista sang Pilipinas malaparan nga nagatuhay sang kaugalingon sa mga paltik kag rebisyonista nga partido kag grupo paagi sa paggamit sang Marxismo-Leninismo-Kaisipan Mao Zedong bilang pinakamataas nga ubay kag paggamit sini sa rebolusyonaryo nga praktika. Sa pagtib-ong sa Marxismo- Leninismo-Kaisipan Mao Zedong sa teorya kag praktika, ginasikway sang Partido ang suhetibismo, Tuo kag "Wala" nga oportunismo kag iban pa nga salin sang burges nga reaksyonaryo nga linya. Sa ubay lamang sang Marxismo-Leninismo-Kaisipan Mao Zedong masikway sang Partido ang burges nga reaksyonaryo nga linya sang mga Lava kag tanan sang iban pa nga kasaypanan sa ideolohiya, pulitika kag organisasyon nga nagaupang kag nagapugong sa madinalag-on nga pagsulong sang demokratiko nga rebolusyon sang banwa sa Pilipinas.

Ginkurit sang Marxismo-Leninismo-Kaisipan Mao Zedong ang linya nga nagatunga sa mga matuod nga proletaryo nga rebolusyonaryo sa isa ka bahin kag sa mga burges nga nagapakunokuno nga rebolusyonaryo kag mga rebisyonista sa pihak nga bahin. Sa kalibutanon nga rebolusyonaryo nga kahublagan sa diin ginapahog sang moderno nga rebisyonismo nga ginadumalahan kag ginapamunuan sang traidor nga rebisyonista nga hubon sa Mosku, nagabanaag ang Marxismo-Leninismo-Kaisipan Mao Zedong agud iwagan ang bug-os nga kalibutan, upod na ang Pilipinas, kag agud tabugon sa pinakamadulom nga bahin ang mga traidor nga moderno nga rebisyonista nga pahito sang tatlo ka "malinong" kag duha ka "bug-os". Ang Partido Komunista sang Pilipinas, nga nagatib-ong sa Marxismo-Leninismo-Kaisipan Mao Zedong kag mapag-on nga nagapanindugan nga sentral nga katungdanan sang rebolusyonaryo nga kahublagan ang pag-agaw kag pagpabakod sang gahum pangpulitika, indi matiplang sang mga paltik nga rebisyonista nga teorya sang "malinong nga pagpangabuhi", "malinong nga transisyon", "malinong nga kumpetisyon", "partido sang bug-os nga pumuluyo", kag "estado sang bug-os nga pumuluyo" nga ginalibod sang rebisyonista nga nagahari nga hubon sang Unyon Sobyet sa bug-os nga kalibutan kag sang traidor nga mga rebisyonista nga Lava sa aton pungsod. Moderno nga rebisyonismo ang nagapangunga nga katalagman sa subong sang kalibutanon nga komunista nga kahublagan kag bisan sang rebolusyonaryo nga kahublagan sang Pilipinas.

Ginapabakod sang Dungganon nga Proletaryo nga Rebolusyon Pangkultura ang Republika nga Pungsod sang Tsina bilang isa ka sosyalista nga pungsod kag sentro sang kalibutanon nga proletaryo nga rebolusyon sa pagpamuno ni Kaupod Mao Zedong. Nagtuhaw ang rebolusyon nga ini bilang maragtason nga armas batok sa moderno nga rebisyonismo sa bilog nga kalibutan kag batok sa pagpanumbalik sang kapitalismo sa sulod sang katilingban nga sosyalista. Madalum nga nakaugat ang Marxsimo-Leninismo-Kaisipan Mao Zedong sa kubay sang 700 ka milyon nga pumuluyo nga Tsino kag sa bilog nga kalibutan paagi sa mga matuod nga proletaryo nga rebolusyonaryo nga partido.

Sa Pilipinas subong, ginaubayan sang Marxismo-Leninismo- Kaisipan Mao Zedong ang kahublagan sa pagpanadlong sa nukleyo sang proletaryo nga diktadurya, ang Partido Komunista sang Pilipinas. Isa ka pursigido nga kahublagan sa pagpanadlong, isa ka malaparan nga kahublagan sa pagtuon sang Marxismo- Leninismo-Kaisipan Mao Zedong ang ginalunsar subong agud sagupon ang Partido kag ang mga pangmasa nga organisasyon sini sa mga kapaslawan kag kasaypanan sang mga Lava nga padayon nga nagapabilin sa patag sang ideolohiya, pulitika kag organisasyon. Ang burges nga reaksyonaryo nga linya sang mga Lava Tuo nga oportunismo sa kabilugan kag amo ang matambok nga duta para sa burges nga moderno nga rebisyonismo sa Pilipinas. Ang traidor nga impluwensya sang moderno nga rebisyonismo nakaugat sa suhetibista kag Tuo nga oportunista nga linya nga ginbuhi sang mga Lava sa sulod sang masobra katluan ka tuig kag ginpatuhaw sa malakolonyal kag malapyudal nga kahimtangan sang katilingban nga Pilipino. Sa idalum sang bandera sang moderno nga rebisyonismo, ang mga pangpulitika nga ahente sang mga Lava pursigido nga nagpaninguha nga ihamulag ang armado nga paghimakas sa legal nga paghimakas paagi sa pagpalapta sang mga intriga kag kabutigan batok sa mga nagapauswag sang armado nga paghimakas kag batok sa mga pinakamilitante nga kadre sang Partido.

Santo sa balayon sang paghiliusa-pagsaway-pagtraidor- pag-isa, dapat ilunsar sa kubay sang mga kadre ang pursigido nga kahublagan sa pagpanadlong nga nasentro sa reaksyonaryo nga linya sang mga Lava kag moderno nga rebisyonismo. Ang kahublagan sa pagpanadlong nga ini pagtilaw sa ikasarang sang Partido Komunista sang Pilipinas nga maghimo sang pagsaway sa kaugalingon kag magsikway sang nagapabilin pa kag dalagku nga kasaypanan kag kakulangan nga tama na ka dugay nga nagpaluya sa rebolusyonaryo nga kahublagan sa Pilipinas kag nagdingot sa mga pumuluyo sang rebolusyonaryo nga kadalag-an. Kon wala ang kahublagan nga ini sa pagpanadlong, indi matigayon ang pagtukod liwat sang partido.

Pang-ideolohiya nga pagtukod santo sa Marxismo-Leninismo- Kaisipan Mao Zedong ang una nga rekisito sa pagtukod liwat sang Partido Komunista sang Pilipinas. Ang Rebolusyonaryo nga Iskwelahan sang Kaisipan Mao Zedong sa sulod sang Partido Komunista sang Pilipinas nagaalagad sang daku sa katuyuan sang rebolusyon nga Pilipino paagi sa pagpalapnag sang Marxismo- Leninismo-Kaisipan Mao Zedong kag pagtungod sang makahulusga nga papel sa subong nga kahublagan sa pagpanadlong. Ang kahublagan nga ini sa pagpanadlong dapat himuon labi na sa panahon nga kinahanglan naton liwat tukuron ang Partido sa solido nga pundasyon sang Marxismo-Leninismo-Kaisipan Mao Zedong kag ginapasingki ang mga aktibidad sang tumandok nga rebisyonista nga traidor sa bulig sang nagahari nga rebisyonista nga hubon nga Sobyet kag imperyalismo nga Amerikano agud palapnagon ang moderno nga rebisyonismo, pauswagon ang isa ka partido nga nabase sa syudad kag may oryentasyon-syudad kag nahadlok sa armado nga paghimakas, itib-ong ang angtanay sang reaksyonaryo nga pagdumalahan sang Pilipinas kag sang mga traidor nga nagahari nga rebisyonista nga hubon kag dis-armahan ang mga mangunguma sa pulitika paagi nagapanguna sa pagsalig sa programa nga "reporma sa duta" sang reaksyonaryo nga pagdumalahan.

Ginhambal ni Kaupod Mao Zedong:

Ini ang tatlo ka nagapanguna nga armas nga dapat paninguhaan nga mapauswag sang Partido kag tanan nga kadre kag katapu sini agud matigayon ang subong sini nga katungdanan nga mag-agaw sang gahum pangpulitika.

Ang Partido Komunista sang Pilipinas dapat tukuron liwat bilang pinakamataas nga porma sang organisasyon sang nagapamuno nga sahi, ang proletaryado. Gani, dapat ini maarmasan sang Marxismo-Leninismo-Kaisipan Mao Zedong. Sa paghakos sa rebolusyonaryo nga ideolohiya sang proletaryado maathag nga ginapamatud-an sang aton Partido ang makasahi nga kinaiya sini; pero ang pinakamataas nga pagtilaw ara sa rebolusyonaryo nga praktika kag labaw pa nga rebolusyonaryo nga praktika. Indi bastante nga nagplastar sang isa ka programa nga matahum ang pagkasulat. Kinahanglan buhion ini sang padayon nga determinado nga pangmasa nga paghimakas, himuon nga materyal nga gamhanan nga pwersa ang Marxismo-Leninismo-Kaisipan Mao Zedong paagi sa pagpukaw kag pagpahulag sa malapad nga masa sang pumuluyo agud magrebolusyon sila. Sa iban nga pulong, bilang proletaryo nga rebolusyonaryo nga partido, dapat isahon sang aton Partido ang teorya kag praktika. Dapat madalum nga nakaugat ang aton mga kadre sa masa nga mamumugon kag mangunguma. Dapat natalana sila sang maayo sa bug-os nga pungsod agud makapalig-on sang partido nga may pungsudnon ng sakop. Dapat pursigido nga atubangon sang Partido ang pagpukaw kag pagpahulag sa masa nga mangunguma, upod ang mga mamumugon sa uma, bilang nagapanguna nga kaalyado sang proletaryo kag bilang nagapanguna nga kusog sang demokratiko nga rebolusyon sang banwa.

Dapat ipatuman sang Partido ang dungganon nga istratehiko nga prinsipyo sang paggamit sang kaumhan sa paglikop sa mga syudad, kag hatagan sang nagapanguna nga tum-ok ang hilikuton sang partido sa kaumhan sa baylo nga sa syudad, samtang wala man ginakalimtan ang hilikuton sang partido sa syudad. Dapat tungdan sang aton mga kadre ang ila hilikuton pangpulitika, angkon ang estilo sang pursigido nga pagtrabaho kag pagkinot kag sa matinugahon nga diwa sang pagsalig sa kaugalingon, kag dapat permi sila handa nga maghimo sang pagsaway sa kaugalingon agud padayon nga mapauswag ang ila hilikuton pangpulitika. Dapat sila magsalig kag magsandig sa masa, nagapukaw kag nagapahulag sa mga ini batok sa mga manughimulos.

Sa kaumhan, dapat padayon nga tukuron ang hangaway sang banwa halin sa kubay sang ginahimuslan nga sahi nga mangunguma sa pagpamuno sang proletaryado kag partido. Dapat ipatuman ang programa sang rebolusyon agraryo agud malab-ot ang nagapanguna nga kaundan sang demokratiko nga rebolusyon sang banwa. Agud malab-ot kag mapangapinan ang mga kadalag-an sang rebolusyon agraryo, dapat magtukod ang Partido sang mga base sa kaumhan kag magdumala sa nagkalain-lain nga tipo sang lugar sang paghimakas, halin sa mga mapag-on nga base tubtub sa mga sona panggerilya.

Ang Partido Komunista sang Pilipinas nagahimo sang pag-analisa sa sahi kag sang pagtuhay sa mga abyan kag kaaway sini. Ginakilala sang Partido ang mga imol nga mangunguma kag mamumugon sa uma bilang pinakamasaligan nga kaalyado sang sahi nga mamumugon. Agud magmadinalag-on sa demokratiko nga rebolusyon sang banwa, dapat tukuron ang alyansa sang sahi nga mamumugon kag sahi nga mangunguma nga amo ang sandigan sang isa ka pungsudnon nga nagahiliugyon nga prente nga ginapasakupan sang petiburgesya sa syudad kag mga banwahanon nga bahin sang pungsudnon nga burgesya bilang mga dugang nga kaalyado. Kadungan sini, permi handa ang Partido sa duha ka dagway kag mahuyang nga makasahi nga kinaiya sang pungsudnon nga burgesya bilang isa ka kaalyado sang demokratiko nga rebolusyon sang banwa. Sa pagpabilin kag paggamit sang pungsudnon nga nagahiliugyon nga prente, nahangpan sang Partido nga dapat sini ipabilin ang kaugalingon nga makasahi nga pagpamuno, pagkinaugalingon kag inisyatiba. Ang proletaryo nga makasahi nga pagpamuno, pagkinaugalingon kag inisyatiba bug-os ka sampaton nga napabilin samtang padayon nga ginatukod sang aton mga kadre ang Partido kag hangaway sang banwa. Ang pungsudnon nga nagahiliugyon nga prente dapat panguna nga nakalinya batok sa mga makasahi nga pwersa sang kontra-rebolusyon - ang mga imperyalista nga Amerikano, mga komprador, mga agalon nga mayduta kag mga burukrata kapitalista, kag dapat magserbi sa pagpabakod kag pagsulong sang Pula nga gahum pangpulitika. Sa mga kongkreto nga kahimtangan sang Pilipinas sa subong, dapat gamiton sang Partido ang armado nga paghimakas kag ang pungsudnon nga nagahiliugyon nga prente sang bug-os kasampaton, subong man ang mga pamaagi nga legal kag ilegal kag hilikuton nga tago kag hayag.

Angkon ang proletaryo nga internasyonalismo, may desisyon ang Partido Komunista sang Pilipinas nga tungdan ang kalibutanon nga hilikuton sini nga pakigbatuan tubtub sa katapusan ang imperyalismo nga Amerikano kag tanan nga tumandok nga reaksyonaryo nga ahente sini, ang mga kumprador, mga agalon nga mayduta kag mga burukrata kapitalista. Ginakabig sang Partido nga kalibutanon nga hilikuton sini ang maghimakas sa moderno nga rebisyonismo kag nagabalik nga militarismo nga Hapones nga subong nagabuylo sa pagpakig-alyansa sa imperyalismo nga Amerikano agud ipabilin ang Pilipinas sa kolonyal nga pagkaulipon. Ang paghimakas sang pumuluyo nga Pilipino batok sa mga kaaway nga ini sang pungsudnon nga soberanya, pangkatilingban nga kahilwayan kag kauswagan amot sa kalibutanon nga paghimakas nga ginalunsar subong sang tanan nga pungsod kag pumuluyo nga pigos. Sa Asya, labi na sa Nabagatnan-Sidlangan nga Asya, ang Pilipinas tama na ka dugay nga nagserbi nga kuta sang imperyalismo nga Amerikano, pyudalismo kag burukrata kapitalismo. Kon ang pumuluyo nga Pilipino magtuga sang masingki nga bunal sa mga ini, mabuligan nila ang iban pa nga pungsod kag pumuluyo nga pigos paagi sa pangkabilugan nga paghimakas. Nahibal-an sang Partido Komunista sang Pilipinas nga ang tanan sang iban pa nga pungsod kag pumuluyo nga nagahimakas sa imperyalismo nga Amerikano kag mga reaksyonaryo nga kaalyado sini nagabulig man sa pungsod kag pumuluyo nga Pilipino paagi sa pangkabilugan nga paghimakas. Ang proletaryado nga Pilipino kag ang tanan nga mamumugon kag pumuluyo sang kalibutan ginahugpong sang diwa sang proletaryo nga internasyonalismo.

I II III IV V
Back to top