Gintipahan han mga siyentista, kabatan-unan, relihiyoso ngan residente han Dumaguete City an plano han lokal nga gubyerno dinhi nga tambakan hin tuna o i-reclaim an kabaybayunan han syudad agud tindugon an usa nga isla nga gin-ngaranan hini nga “Smart City.” Sigon ha mga naprotesta, maaapektaran han 174 kaektarya nga reklamasyon an upat nga Marine Protected Area nga naserbe komo urukyan han masobra 200 nga klase hin isda nga grabe nga makakaapekto ha panginabuhi han mga parupangisda ha syudad.

Gintugutan han konseho han syudad hadton Hulyo 7 hi Mayor Felipe Remollos nga ihatag an ₱23 kabilyon nga kontrata han proyekto nga reklamasyon ha kompaniya nga E.M. Cuerpo, Inc. (EMCI) nga kasosyo han kompaniya nga Tsino nga Poly Changda Overseas Engineering Company. Naglarab an mga protesta ha pangunguna han No to 174 Dumaguete Islands ngan Kabataan Para sa Karapatan-Negros Oriental ha sumunod nga adlaw.