Ginsaludaran han Communist Party of India (CPI)-Maoist hi Father Stan Slas Lurd Swamy kahuman ini mamatay hadton Hulyo 5 ha edad nga 84. Namatay hi Fr. Swamy ha atake ha kasingkasing han diri tugutan nga magpiyansa ha luyo han iya kalagas, sakit nga Parkinsons ngan Covid-19. Tagsuporta hi Fr. Swamy han katawhan nga minoriya ngan ira pakigbisog ha Jharkhand ha sakob hin tulo kadekada.

Gin-aresto hi Swamy han armado nga pwersa han India hadton Oktubre 2020 kahuman akusaran han “terorismo,” pagin kaapi han CPI-Maoist ngan pagkadabi ha ginngaranan nga kaso nga Bhima-Koregaon.

Kaupod ha kaso nga Bhima-Koregaon an 14 nga iba pa nga mga aktibista, propesyunal, ngan mga tagdepensa han tawhanon nga katungod. Igindadabi hira ha “kasamukan” ha usa nga katitirok hadton Disyembre 2017 ha Bhima Koregaon, distrito han Pune ha Maharashtra. Gin-akusaran hira nga nagplano nga patayon an tagapangulo nga ministro han India nga hi Narendra Modi. Gin-gamit kontra ha ira an Unlawful Activities (Prevention) Act han 2018 nga gin-amyendaran ngan ginhimo nga mas madarahug hadton 2019. Nanawagan an CPI-Maoist ha ngatanan nga katawhan han India ngan mga demokratiko nga organisasyon ha langyaw nga labnasan nga suportahan an dagmit nga pagpabasura han balaud.