“NOT GUILTY” o wala sang sala ang husgar sang isa ka korte sa Galimuyod, Ilocos Sur sa desisyon sang Septyembre 17 batuk sa lima ka kababainhan nga tagasakdag sa tawhanong kinamatarung. Ginpasaka sang 81st IB ang mga kaso nga napaslawan nga pagpatay sang Enero 26, 2018 batuk kanday Sarah Abellon-Alikes, Sherry Mae Soledad, Joanne Villanueva, Rachel Mariano kag Asia Isabella Gepte. Ang lima gindalahig sang 81st IB sa isa ka ambus sang Bagong Hukbong Bayan sang Hulyo 22, 2017 batuk sa nagapatrulya nga mga suldado sa Salcedo, Ilocos Sur.

Gin-abswelto man sang Court of Appeals (CA) ang organisador sang mamumugon nga si Maoj Maga sa kaso nga illegal possession of firearms with live ammunitions. Sa desisyon sang Septyembre 15, ginbaliskad sang korte ang nauna nga paghusgar sang San Mateo Regional Trial Court nga maysala ang unyonista. Halin Pebrero 2018, iligal nga nakadetiner si Maga sa Metro Manila District Jail 4 sa Taguig City. Sa subong, nagaatubang pa siya sa kaso nga pagpatay sa Cabadbaran, Agusan del Sur nga ginpasaka batuk sa iya sang AFP.

Para sa Kapatid, grupo sang mga pamilya kag abyan sang bilanggong pulitikal, dapat matulod sang desisyon nga ini sang CA ang tanan nga mga korte nga mag-agi sa mas malawig kag mas maid-id nga pagrepaso sa mga kaso sang estado batuk sa mga ginkulong nga aktibista kag kritiko. Sa pagtan-aw sang grupo, tuman ka signipikante ang bag-o nga desisyon bangud indi lang sini ginabaliskad ang husgar batuk sa isa ka aktibista kundi ginhatagan-tum-ok man sini ang nagapanguna nga konstitusyunal nga proteksyon halin sa iligal nga paghalughog kag pagkumpiska.