Mabaskog nga ginpakamalaut mga hukom kag abugado ang pagpamahog sa kabuhi ni Manila Regional Trial Court Judge Marlo Magdoza-Malagar. Masobra 600 abugado ang nagpirma sa isa ka pahayag nga nagapanawagan para hatagan proteksyon ang mga husgado nga ginaatake sa social media pareho sa ginahimo sang sadto tagapamaba sang NTF-Elcac nga si Lorraine Badoy. Ginsumiter ang pahayag nga ini sa Korte Suprema sang Septyembre 30.

Ginmando sang Korte Suprema sang Oktubre 4 nga ipaathag ni Badoy kon ngaa indi siya dapat papanaugan sang “contempt of court” kaangut sa iya pagpamahog sa kabuhi sang isa ka husgado.

Nangin sentro sang atake sa Facebook kag YouTube si Malagar pagkatapos nga ibasura niya ang petisyon sang Department of Justice nga ideklarar nga “terorista nga organisasyon” ang PKP kag BHB.

Sang Septyembre 24, nagpahayag ang HUKOM, Inc, asosasyon sang mga hurado sa pungsod, para kundenahon ang amo nga pagpamahog. Nagsuporta man kay Malagar ang Ateneo de Manila University School of Law, Philippine Bar Association, Free Legal Assistance Group kag Integrated Bar of the Philippines.