Magkasunod nga insidente sa pagpanganyon, iligal nga pagpangutingkay ug pagpundo sa sentro sa barangay ang pipila sa grabeng paglapas sa tawhanong katungod nga gihimo sa militar sa Negros niining milabayng mga semana.

Himamaylan City. Nangutingkay ug nanghadlok sa mga lumulupyo ang mga elemento sa 94th IB sa unum ka sityo sa Barangay Buenavista. Alas-4 sa kaadlawon niadtong Oktubre 27, pugos nga gisulod ug giransak sa mga sundalo ang balay sa magtiayong Sandro ug Racel Salcedo sa Sityo Ulo-Tuburan. Kauban nila ang ilang 5-anyos nga anak. Sa parehong lugar niadtong Oktubre 25, iligal nga gipriso ug gitortyur sa 94th IB si Welson Anianio.

Pagpangutingkay ug pagpanghadlok usab ang nasinati sa mga lumulupyo sa Sityo Lanap ug Asaran niadtong Oktubre 20. Pugos usab nga gipalayas ang mga lumulupyo sa Sityo Pisok. Gibaharan sila nga prisohon kung dili mosunod sa mando sa militar. Dili moubos sa 50 ka pamilya ang mibakwit padulong sa Sityo Cantupa ug Tigbao.

Guihulngan City. Dose ka hugna nga gikanyon sa AFP ang Mount Cansanda sa utlanan sa Barangay Magsaysay ug Balugo niadtong Oktubre 31 sa gabii. Nahagsa duul sa mga komunidad ug umahan ang bala sa kanyon mao nang napugos pagbakwit ang mga lumulupyo sa tungang gabii.

Giistraping sa tropa sa 62nd IB ang balay sa pamilya Aliyacyac sa Sityo Pangi, Barangay Magsaysay niadtong Oktubre 30. Dugang niiini, gikontrol sa militar ang paggawas-sulod sa mga lumulupyo sa mga barangay sa Buenavista, Planas ug Villegas gikan Oktubre 29 hangtud 31 nga nakaapekto sa panginabuhian sa mga lumulupyo.

Gikan Oktubre 22, kapin usa ka semanang nag-operasyon ang giusang yunit sa 62nd IB, 33rd DRCoy ug Scout Ranger sa mga barangay sa Basak, Bulado, Binubuhan, Tacpao ug Humay-humay. Pugos nilang gisulod ang mga balay sa mag-uuma, nagpundo sa mga eskwelahan ug simbahan, ug gitigum ang mga myembro sa 4Ps program. Niadtong Oktubre 24, giransak sa 10 ka sundalo ang mga balay nilang Candro Briones ug lain pang duha sa Barangay Bulado.

Sipalay City. Gipabuthan og usa ka M203 ang mag-uumang si Alfredo Dantes dihang iyang nasugatan ang mga sundalo sa 47th IB sa Sityo Looc, Camindangan niadtong Oktubre. Human niini, ginteroga pa sa mga sundalo si Dantes.