Giambus sa Bagong Hukbong Bayan (BHB)-Abra ang mga sundalo sa 24th IB sa Mount Basiwag, Barangay Gacab, Malibcong niadtong Oktubre 27. Duha ka tropa ang napatay samtang usa ang nasamdan.

Ang ambus pagsilot sa BHB batok sa maong yunit tungod sa pasistang atake sa katawhan ug pagsumpo sa ilang pagbatok sa lapad nga operasyon sa mina sa Abra ug Apayao. Nagsilbi kining gwardya sa operasyon sa dagkung kumpanya sa mina.

Pagalangkuban sa malukpanong mina ang yutang kabilin sa mga lumad sa mga lungsod sa Malibcong, Lacub, Tineg, Licuan-Baay, ug ang mga utlanan sa Abra sa Apayao ug Kalinga. Lakip dinhi ang pipila ka bahin sa Gran Cordillera Mountain Range.

Kadungan sa planong pagmina sa prubinsya ang focused military operation nga ginagamit aron sumpuon ug bungkagon ang panaghiusa sa mga lumad batok sa magun-ubong minahan.

“Walay laing madawdaw ang katawhan sa large-scale nga mina ug militarisasyon kundili ang nagkagrabeng pagpangilog sa ilang yutang kabilin,” matud sa BHB-Abra.

Gawas sa armadong aksyon niadtong Oktubre 27, gitaho usab sa BHB-Abra ang mga taktikal nga opensiba nga gilunsad niadtong Hunyo 30, Hulyo 9 ug Agosto 18 sa Abra ug Apayao. Lima ka pasistang berdugo ang napatay sa maong mga armadong aksyon.