Giratsada sa mga alipures sa rehimeng Marcos sa Ubos nga Kapunungan ang mga sugyot balaodnon nga Maharlika Investment Fund (MIF) ug Mandatory ROTC (giaprubahan isip National Citizens Service Training Program Act o NCSTP) sa ulahing adlaw sa Kongreso alang niining tuiga niadtong Disyembre 15. Gipamubo ang proseso sa “deliberasyon” human kini gihimong mga prayoridad ni Ferdinand Marcos Jr. Wala kiniy katugbang nga mga balaodnon sa Senado.

Gihikyad sa mga paryente ni Marcos Jr (anak, ig-agaw ug iyang asawa) ang sugyot balaodnon aron mugnaon ang MIF (House Bill 6398) niadtong Nobyembre 28. Suportado kini sa mga “tigdumala sa ekonomiya” sa rehimen. Giulan og pagsaway ang sugyot balaodnon tungod sa plano niining gamiton isip paunang pondo ang gihaguang pensyon nga nakatagana sa GSIS ug SSS. Nag-una sa pagbabag ang mga mamumuo ug empleyado ug ilahang mga representante sa Kongreso. Mialma usab ang mga akademiko, ug bisan ang mga neoliberal nga ekonomista ug negosyante.

Nasayod ang tanan nga mahimong atabay lamang sa korapsyon sa pamilyang Marcos, ilahang mga kroning negosyante ug mga alipures sa Kongreso ang MIF. Nailhan ang mga Marcos sa tibuok kalibutan isip mga tigpangawkaw ug kawatan sa pondo sa katawhan. Naglaway-laway kini sa paunang giban-banang pondo nga ₱275 bilyong pasiunang pondo ug ₱618 bilyon nga mahimong maangkon niini sa mosunod nga mga tuig.

Tungod sa mga pagsaway, gitangtang sa listahan sa tinubdan sa pondo ang GSIS ug SSS, ug ang nahabilin mao ang ₱110 bilyon nga kuhaon sa Landbank of the Philippines ug Development Bank of the Philippines. Gibalita usab nga ibaligya sa rehimen ang walo ka pangpublikong kabtangan, lakip ang Basay Mining nga adunay reserbang mineral nga nagbalor og ₱102.8 bilyon. Plano usab niining solohon ang kita sa mga kasino, haywey ug tugpahanan.

Tin-aw nga walay “sobrang pondo” ang Pilipinas. Makasaysayanon ang kataas sa alkansi niini sa pinansya ug nagtabunok ang utang niini. Gipunting bisan sa mga neoliberalista nga walay nagtunhay nga mga kundisyon sa kalibutan aron molambo kini. Ang tinuod, nangalugi ang mga “sovereign wealth fund” bisan sa nasud nga adunay “sobrang pondo” sama sa Taiwan, Singapore ug Norway tungod sa grabeng krisis nga mihampak sa kalibutanong sistema sa kapitalismo.

Sa Pilipinas, nahimong kapulong sa korapsyon ang mga “sovereign fund” ug susamang pondo. Lakip dinhi ang mga pondong gimugna sa amahan ni Marcos Jr sa dekada 1970 nga nahimong huthutanan sa iyahang pamilya ug kroni. Usa ka pananglitan niini ang coco levy fund nga gitukod aron pugsanong kolektahon ang gamayng kita sa gagmayng mag-uuma sa lubi. Sa laing nasud, bag-ohay lang nga gihukmang sad-an sa korapsyon ug money laundering ang prime minister sa Malaysia tungod sa paggamit niya sa sovereign fund sa nasud isip personal nga bangko.

Apan bungol sa tanang mga pagbabag dinhi, giaprubahan ang sugyot balaodnon sa botong 279-6 human lamang ang 18 ka adlaw. Gawas sa tulo ka representante ilalum sa Makabayan, duha pa ka kongresista gikan sa Bicol ug isa gikan sa Basilan ang mibotar batok niini.

Dungan nga giaprubahan sa parehong adlaw ang NCSTP (House Bill 6486) nga natibuok human gikonsolida ang 27 ka bulag-bulag nga sugyot balaodnon aron ibalik ang pinugos nga pagbansay-militar sa kabatan-onan (Reserved Officers Training Course o ROTC.) Sumala sa mga grupo sa kabatan-onan, aduna kiniy mas bangis nga probisyon kumpara sa unang mga sugyot balaodnon nga ilang gibabagan. Direktang dumalahan sa pasistang Armed Forces of the Philippines ang mga pagbansay, nga mahimong molungtad og duha ka tuig. Ginaduso niini ang militarisasyon sa mga eskwelahan, sukwahi sa pang-akademikong kagawasan. Paglapas usab kini sa mga katungod sa estudyante, nga pugsong mobansay bisan og wala pa sila sa hustong edad. Sumala sa mga estudyante, perwisyo ug paantus lamang ang NCSTP/MROTC tungod sa dugang matrikula ug gamit.

Gawas sa duha ka sugyot balaodnon, nakahan-ay sa Kongreso ang walo ka sugyot balaodnon sa pag-usab sa konstitusyon pinaagi sa pagpatawag og Constitutional Convention. Laraw niining usaban ang langyawng pagpanag-iya sa lokal nga mga negosyo. Tungod sa abtik nga pagbantay sa oposisyon, nasibog sa Enero 26, 2023 ang mosunod nga pagdungog para niini.