Gisugat og mga protesta sa liboang mga Pilipino ang unang pagdumdum sa Internasyunal nga Adlaw sa Tawhanong-Katungod ilalum sa rehimeng Marcos Jr. Nagmartsa niadtong Disyembre 10 gikan sa Liwasang Bonifacio padulong sa Mendiola sa Maynila ang liboan ka mga raliyista aron sawayon ug panubagon si Marcos Jr ug armadong pwersa sa estado sa daghang mga kalapasan sa tawhanong-katungod.

Sa pagpanguna sa Karapatan ug Bagong Alyansang Makabayan, nakalunsad og mga aktibidad ayha ug sa mismong adlaw sa Disyembre 10 sa daghang bahin sa Metro Manila. Gilunsad usab ang mga protesta ug panagtapok sa mga syudad sa Baguio, Naga, Legazpi, Sorsogon, Kalibo, Roxas, Iloilo, Bacolod, ug Davao. Aduna usay susamang mga aktibidad sa Ilocos Sur ug Ilocos Norte, La Union, Kalinga, ug Mt. Province. Nagtapok ang mga Pilipino sa United States, Canada, Europe, Hongkong ug Australia.

Sumala sa Karapatan, nagapadayon ang kultura sa kawalay pagtahud ilalum ni Marcos Jr. Gisaway sa grupo ang kampanyang kontra-insurhensya sa kabukiran nga miresulta sa kaylap nga pagbakwit, dislokasyon sa panginabuhian ug kinabuhi sa mag-uuma, mga iligal nga pagpang-aresto, pagpamomba ug istraping sa mga sibilyang komunidad ug uban pa.

Gidala sa lain-laing mga sektor ang ilahang mga panawagan sa mga protesta ug aksyong masa. Singgit sa mga mamumuo: Makabuhi nga suhulan, pakigbisugan! Panawagan sa mga mamumuo sa panglawas, mga magtutudlo ug kawani sa gubyerno ang pagpataas sa ilang sweldo. Nakighiusa usab sa mga protesta ang kabatan-onan ug mga estudyante tawong-simbahan, kababayen-an, mga midya, mag-uuma ug uban pang demokratikong sektor.

Gikundena nila ang ayudang militar nga gihatag sa US sa rehimeng Marcos nga gigamit sa pagsumpo sa katawhan.