Brutal nga gimasaker sa mga sundalo sa 7th IB ang lima ka Pulang manggugubat ug usa ka sibilyan sa Sityo Mugti, Brgy. Chua, Bagumbayan, Sultan Kudarat niadtong Nobyembre 23. Walay engkwentro nga nahitabo human nga midesisyon ang lima ka Pulang manggugubat nga dili na makigbayloay og buto tungod nalukong na sila samtang daghang sibilyan sa ilang palibot.

Pugos mang ipangulipas sa Armed Forces of the Philippines, dili nila matago ang labing bangis nga pagpatay ug pagpanamastamas sa 7th IB sa mga biktima nga silang Indot Dulunan (Ka Dennis), Sep Kasa (Ka Ho), Allan Dalimbang (Ka Duran), Annabel Talon (Ka Elena), ug Ka Pogi ug sibilyang si Gerry Kasa.

Sumala sa mga nakakita sa mga patayng lawas, adunay mga timailhan nga gipasakitan ug dul-it nga gipamusil ang unum ka biktima. Lapas sa mga lagda sa gubat ang pagpatay sa mga kombatant nga misurender ug wala na sa kahimtang nga mosukol.

Pagpanganyon. Sa Buenavista, Agusan del Norte, tulo ka beses nga nang-istraping ug nanganyon ang 23rd IB sa tulo ka barangay niining ulahing kwarto sa 2022. Nagbunga kini og kaylap nga kaguliyang ug kalisang sa mga komunidad ug pagkadaut sa mga umahan. Nasamdan sa usa sa mga insidente si Juanito Junaldo, usa ka mag-uuma nga anaa sa iyahang umahan sa Barangay Lower Olave niadtong Disyembre 2. Niadtong Nobyembre 5, gipatay sa mga sundalo si Rene Villa ug gipagawas nga Pulang manggugubat nga nakalas sa usa ka hinimo-himong engkwentro.

Pag-aresto. Walay mandamyento ug iligal nga giaresto sa wala nakaunipormeng ginsakpan sa 10th ID ang kabus nga mag-uuma ug drayber sa habal-habal nga si Danilo Antumikay niadtong Disyembre 10, ala-1 sa hapon. Gidagit si Antumikay sa Barangay Tugaya, Valencia City. Sa kahadlok nga adunay mahitabo kay Antumikay, mikuyog kaniya ang iyahang asawa ug ilahang dos anyos nga anak.

Atake sa pagpamahayag. Lain-laing pagkundena ang misugat sa desisyon sa usa ka korte sa Quezon City niadtong Disyembre 12 nga “sad-an” ang manunulat nga si Frank Cimatu sa kasong cyberlibel. Sumala sa mga midya, gipalig-on sa maong hukum ang “chilling effect” nga ginaatubang sa mga midya sa nasud. Gipanawagan nila ang pagbasura sa mga balaod sa libel labina nga ginagamit lamang kini aron prisohon ang mga midya sa ginabutyag nilang hugawng pulitiko ug atakehon ang katungod sa gawasnong pamahayag.

Pugsanong pagpasurender. Gikundena sa La Union Peace and Justice Advocates niadtong Disyembre 4 ang pugsanong “pagpasurender” sa mga membro sa balangay sa Timpuyog dagiti Marigrigat nga Umili iti Naguilian sa San Antonio ug balangay sa Timek ken Namnamma dagiti Babassit a Mangngalap iti La Union sa San Nicolas West sa Agoo. Nahitabo ang mga insidente niadtong Nobyembre 26, kung diin gipugos sa mga pulis ang mga lider sa duha ka grupo nga magsumite og listahan sa ilahang mga ginsakpan ug mopirma sa mga dokumentong nag-ingon nga “giatras” nila ang ilahang suporta sa nahisgutang mga organisasyon.

Militarisasyon sa Mindoro. Gitaho sa National Democratic Front-Mindoro ang 29 ka kasong paglapas sa tawhanong katungod sa 203rd IBde sa Rical ug Calintaan sa Occidental Mindoro sa bulan sa Nobyembre.

Lakip dinhi ang 13 ka kasong pagkampo sa mga eskwelahan, simbahan ug barangay hall; pito ka kasong pagpangulata, upat ka kasong pagpanghulga, tulo ka kasong iligal nga pagpang-utingkay, duha ka kasong istraping, ug tig-isa ka kasong iligal nga pag-aresto ug detensyon, pugos pagpatahan ug ebakwasyon.

Sa laing bahin, temporaryong nakagawas si Elmer Forro, pangkinatibuk-ang kalihim sa Bayan-Panay niadtong Disyembre 7 human mibayad og pyansa.