Napugos nga buhian sa mga pwersa sa estado ang duha ka aktibistang Cebuano niadtong Enero 16 human mikusog ang panawagan nga ipakita sila. Pugos nga gipasakay sa usa ka van sa mga nagpailang pulis silang Dyan Gumanao ug Armand Dayoha sa dungguanan sa Cebu niadtong kaudtuhon sa Enero 10 taliwala sa daghang nakasaksi. Gidala sila sa usa ka safehouse kung asa gipailalum sila sa sikolohikal nga tortyur. Gibuhian sila niadtong Enero 16 sa usa ka resort sa lungsod sa Carmen human nagpagawas ang pamilya og mga litrato sa pagdagit kanila.

Si Gumanao ang koordineytor sa Alliance of Concerned Teachers para sa Rehiyon 7 samtang si Dayoha boluntir sa balangay sa Alliance of Health Workers sa Cebu. Parehong gradweyt ang duha sa University of the Philippines-Cebu.

Sa usa ka bidyu nga nakuha sa usa ka saksi, makita ang pugos nga pagpasakay sa duha sa usa ka grey nga SUV nga naka-parada sa mismong pyer sa barko nga bawal sa mga pribadong sasakyan. Ayha migawas ang maong bidyu, gilimud sa mga upisyal sa pyer, pulis ug ginsakpan sa barkong ilang gisakyan nga adunay nahitabong “insidente sa pagdagit” niadtong adlawa. Panawagan sa pamilya ug mga grupo sa tawhanong katungod ang independyenteng imbestigasyon kalabot sa pagdagit dili lamang sa mga pulis, apan lakip na sa pyer ug mga personel dinhi.

Pagpatay. Sa kasikbit nga isla sa Negros, duha ka mag-uuma ang gipatay ug usa ang gisulayan pagpatay sa militar sa milabayng duha ka semana. Sama sa ubang kaso, gipagawas niining napatay sila sa mga engkwentro sa mga yunit sa BHB.

Sa Guihulngan City, gipatay sa mga sundalo sa 62nd IB si Orlando Fat sa Sityo Banderahan, Barangay Trinidad niadtong Enero 10. Gisulayan usab pagpatay si Rodrigo Pasinabo sa Sityo Cambaogon niadtong Enero 15.

Kini nga mga kalapasan kabahin sa dakung operasyong kombat sa 62nd IB sa mga barangay nga anaa sa utlanan sa Guihulngan City, Canlaon City ug lungsod sa Moises Padilla.

Sa Himamaylan City, gipatay sa mga sundalo sa 94th IB ang 49-anyos nga mag-uumang si Jose Gonzalez sa Purok Maliko-liko, Sityo Cunalom, Barangay Carabalan niadtong Enero 9.