Saan a bumaba iti 18 soldado ti 8th ID ti napapatay ken lima ti nasugatan iti serye dagiti taktikal nga opensiba ti New People’s Army (NPA) iti Northern ken Western Samar idi Hunyo aginggana Agosto.

Karaman kadagiti natay ti lima a tropa ti 4th Scout Ranger Battalion (SRB), maysa kadagiti kaudian a pwersa nga “elite” nga impakat iti rehiyon tapno “gibusan” ti buyot ti umili.

Iti Northern Samar, lima nga agsasaruno nga operasyon a haras ti inyaramid ti buyot ti umili iti Silvino Lobos ken Las Navas. Lima nga armado nga opensiba met ti inrussuat dagiti Nalabbaga a mannakigubat iti Matuguinao, Western Samar.

Kabayatan na, iti Southern Leyte, inreport iti nabiit ti NPA-Leyte Island ti panang-paay iti maysa a reyd ti 14th IB a napasamak idi Abril ken dagiti pasista a bales nga addang ti yunit militar kadagiti sibilyan a komunidad. Napapatay iti armado nga opensiba ti NPA ti dua nga ahente militar ken nakumpiskar kadakuada ti dua a kalibre .45 pistola, ken tallo a selpon.

Inrussuat dagitoy nga operasyon iti tengnga dagiti focused military operation ti 8th ID nga addaan ginasut a pasista a tropa, ken usar dagiti abante a ramramit pang-gerra kas kadagiti helikopter, drone ken dadduma pay.