3-aldaw a sardeng-pasada. Inrussuat dagiti drayber ken opereytor ti dyip, iti panangidaulo ti Piston, ti tallo aldaw a sardeng-pasada manipud Nobyembre 20 aginggana 22. Sungbat da daytoy iti agtultuloy a panangipatungpal ti phaseout iti dyipni ti rehimen Marcos iti rupa ti ingkapilitan a konsolidasyon iti prangkisa da. Iti umuna nga aldaw ti welga, 85% a paralisado dagiti ruta iti Metro Manila. Nakapagrussuat kadagiti panagtignay iti 27 erya iti Manila, kadagiti syudad ti Baguio, Cebu, Iloilo, Bacolod ken Davao, ken iti Cavite, Laguna, Albay.

Pasungbaten ti US iti henosidyo ti Israel. Indauluan ti Bayan ti ginasut a nagrali iti mismo sanguanan ti US embassy iti Manila idi Nobyembre 14 tapno kundenaren ti papel ti US iti henosidyo laban iti umili a Palestino ken panangdurog kadagiti imperyalista a gerra. Innem a raliyista ti nasugatan idi serraan ken pinanggep a waraen dagiti pulis ti martsa sakbay a makadanon iti embahada.

Pilipinas, not for sale. Sinabat ti protesta dagiti organisasyon a Pilipino iti San Francisco, California ti panagdisso ni Ferdinand Marcos Jr ken delegasyon na iti US tapno dumar-ay iti Asia-Pacific Economic Cooperation Summit idi Nobyembre 14. Tinubngar da ti panangilako ni Marcos iti Pilipinas iti natural a kinabaknang ken pigsa’t tegged ti Pilipinas kadagiti ganggannaet a kumpanya.

Hustisya para kadagiti biktima ti Yolanda. Inyun-una ti People’s Rising for Climate Justice Philippines ti protesta iti Mendiola idi Nobyembre 8 tapno singiren ti estado iti “kriminal a panangbaybay-a” daytoy kadagiti biktima dagiti bagyo ken didigra. Inyaramid met ti naduma-duma a grupo a pang-aglawlaw ti maysa a martsa iti San Juanico Bridge, Sta.Rita, Leyte agturong Tacloban City idi Nobyembre 7. Daytoy a martsa ket paset ti 30-aldaw nga daton-pagna tapno lagipen ti maika-10 anibersaryo ti Yolanda.

Walk-out dagiti agtutubo. Tallo gasut nga estudyante ken agtutubo manipud pribado ken pampubliko a pagadalan ti nag-walk-out iti klase idi Nobyembre 20 iti Cebu City tapno irupir ti karbengan da iti edukasyon ken tubngaren ti panangikuspil ti estado. Idi Nobyembre 17, nagirussuat met ti koordinado a panagtignay ti ginasut nga agtutubo iti 16 a sentro ti protesta iti pagilian tapno lagipen ti Sangalubungan nga Aldaw dagiti Estudyante.

Awan pay latta hustisya. Inyun-una ti Alyansa ng Magbubukid sa Asyenda Luisita ti panagtignay iti Department of Agriculture iti Quezon City dagiti mannalon idi Nobyembre 16 tapno lagipen ti maika-19 tawen nga anibersaryo ti masaker iti pito a mangmangged-talon iti maysa a kampuhan tapno irupir ti karbengan da iti daga. Limmaok iti aktibidad dagiti mannalon manipud iti kabangibang nga Asyenda Tinang.

Welga iti Valle Verde. Insayangkat ti Valla Verde Country Club Inc. Employees Union ti welga da idi Nobyembre 11 kalpasan nga agdedlak ti negosasyon para iti CBA da. Nagkedked ti maneydsment iti inrupir dagiti mangmangged a ₱38.50 nayon iti aldawan a sweldo, uray 2019 pay ti maudi a kaadda ti nayon-sweldo.