Dinisarmaan dagiti nalabbaga a mannakigubat ti New Peoples Army (NPA)-Sultan Kudarat ti despotiko ken ahente ti 57th IB a ni Junior Martinez iti Sityo Badiangan, Barangay Salangsang iti Lebak, Sultan Kudarat idi Nobyembre 15, alas-5 ti agsapa. Nakumpiskar kenkuana ti maysa nga M16, maysa a shotgun, dua a pistola, maysa a hand grenade, ken radyo a VHF.

Us-usaren ni Martinez dagiti makuna nga armas iti panangbutbuteng tapno manggamgam ti daga ti masa a mannalon iti lugar. Suportado ni Martinez ti 57th IB ken aktibo a makitintinnulong kadagiti soldado.

Idi Nobyembre 10, nagirussuat ti operasyon a haras ti NPA-Sultan Kudarat laban iti detatsment ti 37th IB iti Sityo Pangyen, Barangay Hinalaan, Kalamansig. Dadaulo dagiti soldado ti 37th IB iti panagsugal, panagbartek ken dadduma pay a riribuk iti baryo. Masansan met daytoy a mangliplipit ken mangpupwersa kadagiti residente tapno “sumurender.” Naragsakan dagiti residente iti opensiba gapu iti perwisyo a tulod daytoy a tropa iti lugar.

Iti Quezon, rinangrangkay ken siniggedan ti NPA-Quezon ti dua a dumptruck nga usar ti kumpanya a kwari iti ili ti Unisan idi Nobyembre 8. Inyaramid daytoy kas pakdaar kadagiti kumpanya a karaman iti proyekto a makadadael iti aglawlaw.